Dr. Nesreen Mohsen

21/07/2026

حالات نادرة في طب نفس الأطفال

24/06/2026

22/05/2026

# **الأوجاع الجسدية كتير بتكون إشارة إن نفسيتك تعبانة!**

بنتكلم كتير عن الاكتئاب والقلق، لكن مش بنلاحظ إن جسمنا بيتكلم معانا! في ناس كتير بتمرّ بأعراض جسمانية غريبة، وتروح تدور على السبب عند دكاترة القلب والباطنة والجهاز الهضمي.. ولما كل التحاليل تطلع سليمة، تكتشف إن المرض مش عضوي إنما الألم النفسي انعكس علي الجسم.

الاضطرابات النفسية مش بس حزن أو توتر عابر، لا ده جسمك بيصرّخ ويقولك "أنقذني"! الألم اللي من غير سبب عضوي، التعب الدائم، الخفقان، مشاكل الهضم.. كلها إشارات إن نفسيتك محتاجة مساعدة.

في المقالة دي، هنعرف مع بعض إزاى الأعراض الجسمانية دي ممكن تكون جرس إنذار لاضطرابات نفسية خفية، وإزاى تسمع كلام جسمك قبل ما يتدهور الأمر.

# # **أعراض جسمانية شائعة:**

١. **الشد العضلي والألم و الصداع المستمر**: لما تكون عصبي أو قلقان، عضلات جسمك كلها بتكون مشدودة، خصوصًا في الرقبة والظهر. ممكن تحس بتعب جامد من غير ما تكون عملت مجهود.

٢. **الخفقان ووجع الصدر**: القلق الزيادة بيخليك تحس إن قلبك نازل من مكانه بالبلدي كده كأن روحك بتتسحب، أو إن في ضربات القلب مش منتظمة. كتير من الناس بتروح الطوارئ علشان فاكرين إنها جلطة، وتلاقي دكتور الطواريء بينصحهم بزيارة الطبيب النفسي لأن الموضوع كله إن "أعصابك تعبانة".

٣. **مشاكل الهضم**: صعوبة في البلع، انتفاخ، قولون عصبي، إمساك أو إسهال من غير سبب عضوي واضح. كله ممكن يكون بسبب التوتر المزمن.

٤. **الدوخة والزغللة**: نوبات الهلع أو القلق الشديد ممكن تخلّيك تحس إن الدنيا بتلف بيك، أو إنك مش قادر تتنفس كويس.

٥. **التعب المستمر**: حتى لو نمت كويس، الاكتئاب بيخليك تحس إنك دايخ و همدان ومش عايز تقوم من السرير.

٦. **تساقط الشعر وضعف المناعة**: الضغط النفسي الطويل بيأثر على مناعتك ويخليك سهّل تْمرض، وكمان ممكن يخلي شعرك يقع بكثافة.

# # **إزاي تتعامل مع الأعراض دي؟**
- **ما تهملش مشاعرك**: لو حسيت إن الأعراض دي متكررة، ممكن تكون إشارة من جسمك إنه محتاج راحة نفسية.
- **حاول تمارس هواية بتحبها أو تعمل نشاط ترفيهي**: ده بيقلل التوتر و يديك وقت تنبسط فيه و تحس إنك بتعمل وقت لنفسك و راحتها.
- **رياضة وتنفس**: الحركة البسيطة وتمارين التنفس بتفرّق جدًا في تخفيف التوتر.
- **استشارة متخصص**: لو الأعراض زادت، ما تترددش في اللجوء لطبيب نفسي، مش عيب ولا حرام.

الاضطرابات النفسية مش دلع و لا قلة حيلة، دي كيميا بتتلخبط في المخ اللي بيتحكم في الجسم كله و ده معناه إن وظايف الجسم كلها ممكن تتلخبط.

# # # الأمراض النفسية أمراض حقيقية و الطب النفسي مش رفاهية💙

19/05/2026

الأكل العاطفي: لما بناكل عشان مزاجنا
(الهروب إلي الطبق)

الأكل العاطفي (Emotional Eating) ده ببساطة لما بنلجأ للطعام مش علشان جعانين، لكن علشان عندنا ضغط، زهق، حزن، ولا حتى فرح زايد. بدل ما نواجه المشاعر، بنفتح الثلاجة أو نطلب أكل من برا، وبنحس براحة مؤقتة، لكن بعدها بيجيلنا شعور بالذنب أو زيادة في الوزن.

""ببساطة هي طريقة غلط للتأقلم مع المشاعر و الضغوط النفسية""

# # ليه بنعمل كده؟
- ممكن تكون عادة من صغرنا، زي لما أمهاتنا كانت تهدينا بشوكولاتة لما نزعل.
- الضغوط اليومية والشغل والعلاقات بتبوظ المزاج، والأكل بيسكن الوجع لفترة.
- المخ بيتعلم إن الأكل (خصوصا الحلويات والدهون) بيخليه يحس بسعادة سريعة، فبيستنّي أي فرصة يكرر التجربة.

# # إزاي نسيطر على الموضوع؟
١. **خد بالك من نفسك**: قبل ما تمسك السندوتش، اسأل نفسك: "أنا جعان فعلا، ولا بس زهقان/متوتر؟"
٢. **شغل دماغك**: لو حسيت إنك هتاكل عشان مزاجك، حاول تشتت نفسك بشيء تاني – اتكلم مع حد، امشي، اسمع أغنية، اشغل إيدك في أي حاجة و ممكن تستعمل stress ball.
٣. **ما تخليش الأكل قدامك**: لو الجوع مش حقيقي، مش هاتكمل مشوار عشان توصل للبسكويت أو تقوم تعمل ساندويتش!
٤. **ما تعاقبش نفسك**: لو حصل واكلت، متحطش في دماغك إنك "فاشل" و إن مفيش أمل تغير عاداتك. اليوم الجاي حاول تاني.

# # # كلمة أخيرة:
الأكل مش حل للمشاكل، حاول تعوضه بحاجة تانية تخليك تحس أنك أحسن. جرب تكتب مشاعرك، تمشي، أو تتكلم مع حد قريب منك – بس متخليش الطبق هو اللي يسمعك! 😊

07/05/2026

متي تستشير الطبيب النفسي؟

مجرد التفكير في زيارة الطبيب النفسي يقابل عند كثير من الناس بالسخرية أو النفي التام، فلو شخص قرر إنه ينصح شخص آخر بزيارة الطبيب النفسي في أغلب الأوقات سوف يلاقي الرد الأتي "ليه شايفني مجنون قدامك؟؟ بشد في شعري و لا بقطع في هدومي ولا بحدف الناس بالطوب في الشارع!!!!!".....
للأسف الشديد النظرة دي موجودة عند كتيرين بل ربما تكون الأغلبية في المجتمع، بما يسمي علميا "بوصمة الطب النفسي"
الذهاب للطبيب النفسي ليس مقتصر علي الحالات المرضية الشديدة و لا علي حالات "عنبر الخطرين" كما صورتها خطأ الدراما و السينما، و بالمناسبة ليس هناك ما يسمي بعنبر الخطرين في مستشفيات الطب النفسي.
الحالة النفسية لأي شخص بتعتمد علي التناسق و التناغم بين أفكاره و مشاعره و تصرفاته، و لذلك حين يحدث خلل أو تغير ملحوظ في الأفكار أو المشاعر أو السلوك عند هذا الشخص فهو يعتبر إنذار تنبيه لزيارة الطبيب النفسي.
علي سبيل المثال لا الحصر:
١- اضطرابات في الأفكار مثل الوساوس (فكرة ملحة متكررة تؤرق الشخص مع علمه بعدم صحتها) أو أفكار خوف غير منطقية زي الفوبيا باختلاف أنواعها، أو الأفكار الانتحارية.
٢- اضطرابات في المشاعر مثل الحزن أو الفرح أو القلق زيادة عن معدل الشخص نفسه طوال حياته. عدم القدرة علي السيطرة علي الغضب و تقلبات المزاج الشديدة، أو عدم قدرة الشخص عن التعبير عن مشاعره.
٣- اضطرابات في السلوك و التصرفات مثل خروج الغضب عن السيطرة ليتحول إلي عنف لفظي أو جسدي، أو تعمد الشخص إيذاء نفسه بدنياً، أو الاندفاع بكافة أشكاله في تصرفات بها الكثير من الخطورة كتعاطي المخدرات أو المقامرة أو الإشتراك في أفعال خارجة عن اللياقة أو القانون أو الإتيان بأفعال غير منطقية للمحيطين بالمريض.

الطب النفسي لا يتعامل مع مجانين بل مع أشخاص يعانون من اضطرابات يمكن علاجها أو التعايش معها...... و للمفاجأة ليس هناك تشخيص في الطب النفسي يسمي "جنان".

طلب المساعدة النفسية ليس ضعف أو قلة إيمان أو وصمة بالجنون، بل هو خطوة -قد تكون- لبداية حياة متزنة.

ملحوظة: الصورة تم تصميمها بال AI و ذلك لاحترام خصوصية الطبيب و المريض

27/04/2026

21/04/2026

Part 2