01/10/2026
ලෝක ළමා හා වැඩිහිටි දිනය - ඔක්තෝබර් 01
රටක අනාගතය භාරගන්නට සැරසෙන දරුවනුත්, ඒ අනාගතය ගොඩනගන්නට තම ජීවිතයේ තරුණ කාලය කැප කළ වැඩිහිටියනුත් අපට එකසේ වටිනා සම්පත්ය. මේ සම්පත් දෙකම ඇගයීමට ලක්කරන සුවිශේෂී දිනයක් ලෙස ඔක්තෝබර් 01 වැදගත් වේ.
මෙවර තේමාවන්:
ලෝක ළමා දිනය: "මනසින් සවිමත් – දරුවන් පොහොසත්"
ජාත්‍යන්තර වැඩිහිටි දිනය: "දීර්ඝායුෂ යුගය, දිගු ජීවිත සඳහා පද්ධති පිළිබඳව නැවත සිතා බැලීම"
අපේ වගකීම
ලොව පුරා විවිධ දිනවල ළමා දිනය සැමරුවද, ශ්‍රී ලංකාව ඇතුළු රටවල් රැසක එය සමරන්නේ අදයි. 1990 දී එක්සත් ජාතීන්ගේ සංවිධානය මගින් වැඩිහිටි දිනය ප්‍රකාශයට පත් කළේ ඔවුන්ගේ ගැටලු කෙරෙහි අවධානය යොමු කිරීමටයි.
අද වන විට ලෝකයේ උපතේදී ආයු අපේක්ෂාව වැඩි වීම නිසා වැඩිහිටි ජනගහනය ක්‍රමයෙන් වැඩි වෙමින් පවතී. විශේෂයෙන් වයස අවුරුදු 60-70 කාණ්ඩයේ වැඩිහිටියන් තවමත් සෞඛ්‍ය සම්පන්නව හා ක්‍රියාශීලීව සිටින බැවින් ඔවුන්ගේ අත්දැකීම් රටේ සංවර්ධනයට යොදා ගැනීම වැදගත්ය.
අනාගතය භාරගන්නට පිපෙන පුංචි කැකුළු වලටත්, අපේ ලෝකය ගොඩනගන්නට දහඩිය හෙලූ වැඩිහිටි පරපුරටත් අපගේ උපහාරය!
