24/10/2026
මා විසින් රචනාකල අලුත් ම නව කතාව 'තරු මං සලකුණු ' සහ තවත් ග්රන්ථ ප්රකාශන රාශියක් ගාලු පොත් වසන්තයේ C37 ග්රන්ථ කුටියෙන් ඔබට ලබා ගත හැක...
තරු මං සලකුණු
**********************
" ඔ ඔයා කව්ද... කොහොමද මට උන දේ දන්නෙ " ඇය ගොත ගැසුවාය
" විස්තර පස්සෙ කතා කරමු ඔයාට අනතුරක් නෑ නේද මම දැක්කා ඔයා ලිස්සල වැටෙනව "
" විස්තර කතාකරන්න පුලුවන් පස්සෙ කලුවර වැටෙන්න කලින් අපි පාරට යන්න ඕනි හතර වෙද්දි මෙහෙට කලුවර එනව අද වැස්ස නිසා අඳුර කොහොමත් වැඩි වෙයි. ඒ මදිවට ලෙස්සනව අපි දැන්ම යමුද ටිකක් තෙමෙනව කරන්න දෙයක් නෑ තව පරක්කු වෙන්න බෑ එන්න"
කලහැකි අන් දෙයක් නොමැති වූයෙන් ඇය ඔහු පසු පස ඇදුනි.
ඔහු පඳුරු ඈත් මෑත් කරමින් පාර පාදාගෙන ඉදිරියට ගමන් කරමින් සිටියේය. ඇයද ඔහු පාදන ලද මග ඔස්සේ නැවතත් පඳුරු පාර අවහිර කරන්නට පෙර ඔහුගේ ඇඟේ ගෑවෙන නොගෑවෙන දුරින් ගමන් කළාය.
මොහු කව්ද කොහොමද මම මෙතන ඉන්න බව දන්නෙ ඇය පුදුම විය
“දෙවියනේ කලු කුමාරය වත් ද......නෑ නෑ සුදුයි නෙ වෙන්න බෑ
එතකොට හොල්මනක්ද... හෙවනැල්ල වැටෙනවද බලන්න අව්වක්වත් නෑ.
හැබැයි ඇහිපිල්ලම් ගැහුව නේද…” ඇය ඇසෙන නෑසෙන හඬින් තමාටම කොඳුරාගනිමින් ඔහු ඇහිපිය ගැසුවාද යැයි මතකයට නගා ගැනීමට උත්සහ කලාය..
“එක අතකට මොනවද මම මේ හිතන විකාර. කවුරු උනත් දෙවියෙක් වගේ මේ වෙලාවෙ මාව ගලවගන්න ආපු මනුස්සය නේද මට වටිනවද ඒ මනුස්සයව හොල්මන්වලටයි කලුකුමාරයටයි ආදේශ කරන්න හැබෑටම දෙවිකෙනෙක් වත්ද.”
තමාගේ ඔලුව අවුල් වී ඇති සැටියක් යුවිශ්නාට දැනෙයි.
“මෙච්චර ලොකු කරදරයක් වෙලා තියෙද්දි මොනවද මේ ඔලුවට එන මනො විකාර. හරිනම් මේ වෙලේ මේ මනුස්සයගෙ උදව්වෙන් මේ කැලෙන් එළියට යන හැටි නෙ හිතන්න ඕනි.” සිත තුලින් කොඳුරමින් ඇය පසු තැවෙන්නට විය.
ඇය ඉදිරියෙන පඳුරු ඈත් මෑත් කරමින් ගිය අමුත්තා එක්වරම නැවතුනි.ඔහුගේ වේගයෙන්ම පසු පසින් ඇවිද ආ යුවිශ්නා ඔහුගේ ඇඟෙ නොහැපී බේරුනේ අනූනවයෙනි
" ඔයාට අමාරුද? ඒත් අමාරු කියල හරියන්නෙ නෑනේ කලුවර වැටෙන්න කලින් පාරට යන්න ඕනි නැත්තම් අද රෑ අපි දෙන්නට මේ කැලේ ඇතුලෙ තමයි ඉන්න වෙන්නෙ "
ඔහුගේ වදන් ඇය හීතියට පත් කරන්නට සමත්විය. එක අතකට තනියම මේ මහ කැලේ රැයක් ගෙවීමට වඩා මනුස්ස පුලුටක් සමග ගෙවීමට ලැබීම සැනසීමක් ගෙන දෙන්නක් උනත් ජීවිතේ පලමුවතාවට දුටු නන්නාදුනන තරුණයෙකු සමගින් රැයක් ගෙවිම ඊට වඩා භයානක අභියොගයක් නොවේදැයි ඇයට සිතේ. එහෙත් මේ මොහොතේ තමාට ඇති එකම ගැලවුම් කරුවා ඔහුය.
**********************