28/04/2026
भेरी अस्पतालमा कार्यरत चिकित्सकमाथि भएको दुर्व्यवहार, प्रहरीको उपस्थितिमा दिइएको डर तथा धम्की, र त्यसपश्चात् सामाजिक सञ्जालमा देखिएका अराजक तथा ज्यान मार्ने धम्कीपूर्ण अभिव्यक्तिहरूप्रति हाम्रो गम्भीर ध्यानाकर्षण भएको जनाउँदछौँ। हामी भेरीका चिकित्सकहरूसँग निरन्तर संवादमा छौँ।
स्वास्थ्यकर्मीहरू बिरामीको जीवन रक्षा र सेवामा समर्पित पेशाकर्मी हुन्। उनीहरूमाथि यस प्रकारको दुर्व्यवहार, धम्की तथा मानसिक आतंक सिर्जना हुनु अत्यन्त निन्दनीय कार्य हो। यस्ता गतिविधिहरूले सम्पूर्ण स्वास्थ्य सेवा प्रणालीको विश्वसनीयता र प्रभावकारितामाथि समेत गम्भीर असर पार्दछ। साथै, यस्ता कार्यहरू मुलुकी फौजदारी कार्यविधिको अनुसूची–१ बमोजिमका कसुर भएकाले यसमा मिलापत्र गर्न नमिल्ने व्यवस्था रहेको कुरा पनि स्पष्ट पार्न चाहन्छौँ।
प्रहरीको उपस्थितिमा समेत चिकित्सकमाथि डर र धम्की दिनु विधिको शासनमाथि नै चुनौती दिने कार्य हो। त्यस्तै, सामाजिक सञ्जालमा खुलेआम ज्यान मार्ने धम्की दिनु अभिव्यक्ति स्वतन्त्रताको दुरुपयोग हो, जसलाई कुनै हालतमा सहन सकिँदैन।
यस घटनामा संलग्न व्यक्तिहरूलाई तत्काल पहिचान गरी कानूनी दायरामा ल्याई कडा कारबाही गर्न सम्बन्धित निकायसँग हामी जोडदार माग गर्दछौँ। साथै, स्वास्थ्यकर्मीहरूको सुरक्षा सुनिश्चित गर्न विद्यमान कानूनी प्रावधानहरूको कडाइका साथ कार्यान्वयन गर्न तथा यस्ता घटनाहरू दोहोरिन नदिन आवश्यक दुई वर्षदेखि स्वास्थ्य तथा गृह मन्त्रालयले थन्काएर राखेको ‘शून्य सहनशीलता’ सम्बन्धी कार्यविधि र निर्देशिका तत्काल जारी गर्न माग गर्दछौँ।
स्वास्थ्यकर्मीहरूको सुरक्षा र गरिमा सुनिश्चित गर्नु राज्यको जिम्मेवारी हो।
