13/05/2026
جسم جي گرمي پد ۾ ڦيرگهير
عام جسم جو گرمي پد 37 ڊگري سينٽي گريڊ سمجهيو ويندو آهي جيتوڻيڪ پوري ڏينهن ۾۽ هڪ ماڻهو کان ٻئي ماڻهو جي لاءِ هن ۾ فرق ايندو رهندو آهي. صبح جو عام طور تي گرمي پد 36.1 ڊگري سينٽي گريڊ کان شروع ٿي ڪري شام جو 6 بجي کان 10 بجي جي وچ ۾ اهو 37.2 ڊگري سينٽي گريڊ جي بلندي تائين پهچي ويندو آهي.
ڪنهن آرام ڪندڙ ماڻهو جو 37.2 ڊگري سينٽي گريڊ کان مٿي وارو گرمي پد عام طور تي ڪنهن بيماري جي طرف اشارو ڪري ٿو.وڌيڪ وقت تائين ورزش ڪندڙ ماڻهن جو گرمي پد پڻ وڌي سگھي ٿو.
ڪنهن ڊوڙندڙ ماڻهو جو جسماني گرمي پد 39 کان 41 ڊگري سينٽي گريڊ تائين ٿي سگھي ٿو ڇاڪاڻ ته ورزش مهل پيدا ٿيندڙ گرمي، جسم جي گرمي کي ختم ڪندڙ قابليت کان وڌي ويندي آهي. عام جسماني گرمي پد کان 3.5 ڊگري سينٽي گريڊ کان وڌيڪ جون تبديليون جسماني سرگرمين تي اثرانداز ٿيڻ شروع ڪن ٿيون.
جڏهن جسم جو گرمي پد 41 ڊگري سينٽي گريڊ کان وڌيڪ وڃي ته هن حالت کي هائپرٿرميا (hyperthermia) سڏيو ويندو آهي. اها حالت خاص طور تي بدن جي آڪڙ جو سبب بڻجي سگھي ٿي جنهن جي ڪري مستقل طور تي دماغ کي نقصان رسي سگھي ٿو.ڏينهن لڳڻ (Heatstroke) 41.1 ڊگري سينٽي گريڊ کان مٿي ٿئي ٿو. پگهر اچڻ بند ٿي وڃي ٿو ۽ چمڙي خشڪ ۽ گرم ٿي وڃي ٿي. نبض جي شرح بلند ٿي وڃي ٿي ۽ ساهه کڻڻ جو عمل ڪمزور ۽ تيز ٿي ويندو آهي. ماڻهونيم بيھوش ٿي سگھي ٿو ۽ ڪوما ۾ وڃي سگھي ٿو. اندروني عضون جو نقصان وڏي ڳڻتي جي ڳالھ هوندي آهي ۽ تمام جلد هن جو علاج شروع ڪرڻ گھرجي جنهن ۾ مريض کي برف واري پاڻي ۾ غسل شامل آهي.
جسم جو سڀ کان گھٽ گرمي پد 28.5 ڊگري سينٽي گريڊ تائين هيٺ ڪِري سگھي ٿو. هن حالت کي هائپوٿرميا (hypothermia) سڏيو ويندو آهي. هن ۾ ماڻهو ٿڌو ۽ ڦڪو نظر ايندو ۽ هن جي دل جي حرڪت بي ترتيب هوندي. جيڪڏهن گرمي پد 26.7 ڊگري سينٽي گريڊ کان هيٺ ٿيندو ته بيهوشي واري حالت به ٿي سگھي ٿي. ساھ کڻڻ جو عمل سست ۽ تانگهو ٿي وڃي ٿو ۽ تاندورن جي آڪسيجڻ سازي گھٽ ٿي ويندي. هن جي علاج ۾ آڪسيجن مهيا ڪرڻ ۽ گلوڪوز ۽ لوڻياٺو پاڻي ڏئي ڪري رت جي مقدار ۾ واڌارو شامل آهي.
