04/09/2026
Faatalofa atu i le maualuga o lo tatou Itumalō i lenei vaega o le aso.
Viiga e fa'amua ile Atua Silisili Ese, ua faasopo mai lo outou soifua ma so matou ola i lenei aso. E iai le talitonuga o loo maualuga le aoina o le masina i Tapa'au o lo tatou Itumalō, le nofo fa'afaleupoluga, le Fa'alefia ma le Falesalafai, lo oulua to'alua Ulu ma Lemaota, o faletua ma tausi, tama'ita'i, le malosi o le Itumalō, tupulaga lalovaoa seia oo i fanau iti.
E taofi o loo manuia fo'i le nofo e fia o Fa'afeagaiga tau i le lagi, o loo faafale-le-malu aua le tau asuina o le ipu vai o le ola i lo tatou Itumalō, ina ia maua nisi Agaga mo le Atua ma lona finagalo.
O le aso ananafi, 4 o Setema 2026, na faatino ai se tasi o Poloketi a lo tatou Itumalō, i le fa'ameaalofa lea o WHEELCHAIR mo tatou Tamā ma Tinā matutua, aemaise i latou e iai manaoga faapitoa.
O le faamoemoe autu o lenei poloketi, e fesoasoani lea i le tausiga o nai tatou matua matutua aemaise alo ma fanau o loo moomia tele lenei fesoasoani, ina ia tatou maua avanoa tutusa, e tatou te soifua ai i lenei soifuaga.
Faafetai i le Atua, ua tini tau lau o lenei poloketi. E momoli fo'i le faafetai tele i lana Afioga le Ta'ita'ifono, le Tamā o le tatou Itumalō, Afioga Leatigaga Lauina Iiga Lealali Matafai Lauina, aemaise le maualuga o le Komiti Faatonu i le tofā a'e ma le utaga mamao, ua afua ai lenei faamoemoe tāua.
Momoli le faafetai i le tatou Ofisa, mo le tautuaina o lo tatou Itumalō, aemaise o galuega faatino aua fuafuaga alualu mamao i lenei tausaga.
Ia alofagia e le Atua le faaiuga o lenei aso i lavasiga o feagai ai lo outou mamalu. Tatou folau i le agalelei faasoa o le Atua, ta'ita'i atu lo outou soifua ma so matou ola i lona Aso Sapati taeao Aso Sa muamua o lenei masina.
Faafetai
OFISA FONO FAAVAE FAASALELEAGA 1.
