Baby steps - خطوات صغيرة

12/03/2022

كل سنة و انتم طيبين اللهم بلغنا رمضان

تفتكرو الامهات اللي بيرضعو ممكن يصومو رمضان ولا لأ ؟

08/03/2022

كل عام و كل امرأة ناجحة و مؤثِرة في مجتمعها .
"أنتن الحياة!"

31/01/2021

أعراض فيروس كورونا في الأطفال ممكن تيجي في صورة إسهال أو قيء أو أعراض تنفسية .
معظم الحالات مش بتحتاج أكتر من علاج منزلي و الحجز بيبقى لأي أطفال تظهر عليهم أعراض خطيرة زي الجفاف الشديد نتيجة القيء و الإسهال المستمر أو الأعراض التنفسية الحادة زي سرعة النفس و النهجان و الزرقة .
أهم حاجة نهتم بتقوية مناعة الطفل : أكل صحي و مصدر مياه نظيف و البعد عن المواد الحافظة و مهم جدا التعرض للشمس .

12/11/2019

06/11/2019

لا توحِشِ النَفْسَ بخوف الظُنون
واغْنَمْ من الحاضر أمْنَ اليقين.
:D

04/11/2019

أنيميا الفول
مرض وراثي بيتنقل من الأم عن طريق كروموسوم X , للأبناء سواء ذكور أو إناث

البنت بتبقى حاملة للمرض لكن مش بيظهر عليها أي أعراض( إلا نادراً جداً) و بتورثها للذكور و الإناث

الولد بيظهر عليه أعراض المرض و بيورثه للإناث لكن مش بيورثه للذكور

يعني ببساطة ، الولد اللي عنده أنيميا الفول مش هيظهر في أولاده المرض ده ، لكن ممكن يظهر في أحفاده من الذكور لو عنده بنات ( حاملة للمرض)
الطفل المصاب بأنيميا الفول
طفل طبيعي جدا زي أي طفل في سنه و نموه الجسدي و العقلي بيبقى طبيعي .
اختلافه عن أي طفل أنه لو أكل أنواع طعام معينة أو أخد أدوية معينة بيحصله تكسير في كرات الدم الحمراء و ممكن يحتاج نقل دم بصورة طارئة
أيه الأكل الممنوع
البقوليات بأنواعها ( أي نبات ليه فلقتين )
الفول الأخضر أخطرهم و ممكن يحصل التكسير لمجرد أن الطفل عدى في أرض مزروع فيها فول أخضر ( عشان بيستنشق حبوب اللقاح )
الفول العادي و منتجاته و البسلة و اللوبيا و الفاصوليا
فول الصويا ممنوع و لازم ناخد بالنا أن المنتجات اللي فيها صويا بتتمنع زي اللانشون و بعض الحلويات المعلبة و بعض الألبان البودرة
في بعض زيوت الطعام بتبقى خليط بين عباد الشمس و الصويا
العدس من البقوليات و بيتمنع برضه
بس في ملاحظة مهمة : إن في اختلاف و تنوع كبير بين الأطفال اللي عندهم أنيما الفول يعني ممكن طفل يأكل حاجة من الموانع زي العدس و الصويا و المكسرات و ما يحصلش تكسير
و ممكن طفل تاني يحصله تكسير منهم .
فلازم يبقى في متابعة .
أيه الأدوية و الكيماويات الممنوعة
أي أدوية تحتوي السلفا ، الكلور أمفينيكول ، أدوية الملاريا ( و الطفل المصاب بأنيميا الفول بيبقى عنده مناعة ضد الملاريا )
فيتامينC فوار
فيتامين k أحيانا بيعمل تكسير .
النفتالين
في أطفال ( الحنة ) بتسببلهم تكسير .
اكتر خافض حرارة أمن هو البارسيتامول .
مع الوقت كمية الأنزيم الناقص بتزيد و بتوصل للطبيعي و بنبتدي ندخل الأطعمة الممنوعة بالتدريج .
في البوست الجاي هتعرف إزاي بنشخصها و أيه أعراض التكسير ..
Like & share :)

01/11/2019

الفترة الحالية بدأت تنتشر النزلات المعوية في صورة قيء و إسهال ، أهم حاجة نعملها خاصة في الأطفال تحت سنتين ، هو التعويض بالسوائل في صورة أكياس معالجة الجفاف ( حسب وصف الطبيب) بالإضافة إلى شراب الزنك .
في خطأ كبير بيوصل الأطفال لإختلال في أملاح الجسم وإرتفاع الصوديوم في الدم و دي حالة خطيرة بتستلزم دخول الطفل الرعاية المركزة للأطفال .
أكياس معالجة الجفاف لازم تتحل في ٢٠٠ سم ماء و تعطى للطفل حسب وزنه و درجة الجفاف بعد فحصه من طبيب الاطفال.
لو تم إذابتها في أقل من ٢٠٠سم بيزيد تركيز الصوديوم فيها و بالتالي العلاج بيتحول لضرر بالغ ممكن يوصل للوفاة .

31/10/2019

أنيميا الفول
هي نوع من أنواع الانيميا التكسيرية و بتحصل نتيجة نقص إنزيم معين أسمه G6PD ، أهمية الإنزيم دا أنه مهم لتكوين مركب اسمه glutathione reductase و دا بيحافظ على كرات الدم الحمراء من التكسير نتيجة عوامل الأكسدة oxidative stress و بالتالي نقصه هيسبب زيادة تعرض كرات الدم الحمراء للتكسير .

في البوستات الجاية هنعرف ايه أسبابه و ازاي بيتم تشخيصه

26/10/2019

بالنسبة للأم اللي بتشتغل و هتغيب فترات عن الطفل فترات طويلة ، مش هتحتاج تدخل اللبن الصناعي و تقدر تستمر في الرضاعة الطبيعية عن طريق ال expressed breast milk
انها تجمع لبن الأم عن طريق المضخات الخاصة و دي منها أنواع يدوية و أنواع كهربية و هي الأفضل عشان بتوفر الوقت و المجهود و بتقدر تضخ كميات أكبر في وقت أقل .
تقدر الأم تحفظ اللبن و تخزنه في عبوات زجاجية أو بلاستيكية و في أكياس معقمة مخصصة لحفظ لبن الأم و هي اكتر طريقة حفظ مضمونة و عملية
ممكن بعده يتم تخزينها في الفريزر لمدة ٦ شهور أو في الثلاجة لمدة ٤٨ ساعة
بعد ما يخرج من الثلاجة أو الفريزر بيتم تدفئته تحت مياه جارية
بس لازم الأم تخلي بالها إن اللبن بعد خروجه من الثلاجة أو الفريزر و تحوله للصورة السائلة يتم استخدامه في خلال ٢٤ ساعة بعدين نتخلص منه .
وطبعا ممنوع تعريضه لدرجة حرارة عالية زي (الميكروويف) !
الرضاعة الطبيعية أحسن اختيار لطفلك و هتفرق في حياته الجاية جسديا و نفسيا .
اختاري صح ! :)

23/10/2019

الرضاعة الطبيعية - الجزء الثالث

22/10/2019

- كلها كام شهر و هيكبر و مش هيىرضع تاني :D
- إيه !!!!

21/10/2019

الرضاعة الطبيعية - الجزء التاني

شركات الأدوية و الأغذية أنتجوا الألبان الصناعية كبديل للبن الأم في حالة لو في مشكلة صحية عند الأم تمنعها من الرضاعة
زي

إصابة الأم بفيروس التهاب الكبدي الوبائي (B )
الأم اللي بتاخد علاج كيماوي للأورام
الأم المصابة ب قرح هربس نشطة في الث*ي
active herpes simplex virus lesion
الأم المصابة بالدرن بتمنع الرضاعة لغاية ما تخلص أسبوعين من العلاج الخاص بالدرن

الأم المصابة بفيروس التهاب الكبدي الوبائي
(C)
تقدر ترضع عادي
أو
لو في مشكلة صحية عند الطفل ( زي أمراض التمثيل الغذائي اللي بيحتاج فيها الطفل أنواع معينة من الألبان الصناعية زي ال PKU و ال galactosemia) و دي أمراض نتيجة نقص أنزيمات معينة عند الطفل بتمنع عملية التمثيل الغذائي لبعض الأحماض الامينية و السكريات البسيطة فبيزيد تركيزها في الدم و تضر الطفل

شركات الأدوية حاولوا انهم يوصلوا لتركيب يقرب من لبن الأم في كمية البروتين و الكربوهيدرات و الدهون لكن طبعا مقدروش يوصلوا للتركيب المشابه ١٠٠٪ ، لأن لبن الأم فيه مركبات بتبني مناعة الطفل ضد الأمراض و مركبات بتساهم في نمو الجهاز العصبي و تطوره .
لبن الأم فيه
secretory IgA
وده نوع من الأجسام المضادة المناعية بيدي مناعة للطفل ضد الميكروبات
في معلومة عظيمة : أثناء الرضاعة ، الطفل بيدخل جزء من اللعاب في ث*ي الأم ، عملية أسمها backwash
، الجهاز المناعي للأم بيتعرف على الميكروبات الموجودة عند الطفل و بيفرز أجسام مضادة متخصصة في النوع ده من الميكروبات و بالتالي ممكن نعتبر الرضاعة انها
sensor
مناعي
للطفل ، بيعمل
adjustment
لتركيب اللبن حسب حالة الطفل

أول لبن بينتج بعد الولادة بيبقى كميته قليلة لكن بيحتوي على كمية كبيرة جدا من الأجسام المناعية اللي بتحمي الطفل من أمراض كتير
نضيف على كل ده أن في دور وقائي للرضاعة الطبيعية في أمراض زي الإسهال ، التهاب الأذن ،
الحساسية ، مرض السكر النوع الأول .
لبن الأم فيه الأحماض الدهنية الأساسية اللازمة لنمو و تطور الجهاز العصبي و ده مهم جدا للنمو العقلي للطفل .
د/ محمد أحمد

19/10/2019

بعد الولادة و أول ما بيتطمن طبيب حديثي الولادة و الأطفال على المولود بتبقى أول نصائحه للأم إنها تشيل المولود و تلامسه skin to skin contact
و تبدأ ترضعه طبيعي .
و بيكون رد أقارب الأم و الأب من السيدات :D
يعني مش هتكتبلنا على أعشاب ؟!!
مش هنديلة شوية جلوكوز ؟!!
الأم مش فايقة و مش هتقدر ترضعه !
مش بينزل لبن كافي ، مش هيشبع !
الردود دي بيتم تكرارها بصورة كبيرة جدا .
، مفيش حاجة اسمها أعشاب أو جلوكوز نديه لمولود !
الطفل المولود قدامه خياران من (اللبن) :
لبن الأم
أو
اللبن الصناعي رقم ١ ( في حالة الضرورة الطبية القصوى !)
المعلومة اللي بتكون غائبة عن أهلنا ، إن كمية اللبن اللازمة لإشباع المولود أول يوم بتكون قليلة جدا ، لكن اصرارنا على الرضاعة الطبيعية أول يوم بيتوقف عليه مسار الرضاعة الطبيعية في كل الشهور اللي بعد كدة
ليه لبن الأم مهم جداً ؟!
الأكاديمية الأمريكية لطب الأطفال و منظمة الصحة العالمية وضعوا إرشادات واضحة على ضرورة الرضاعة الطبيعية بصورة مطلقة
(exclusive breast feeding )
في أول ٦ شهور من حياة المولود
لأن بعد دراسات وجدوا إن في فوائد كتيرة للبن الأم مش موجودة في أي منتج من الألبان الصناعية .
ليه ماينفعش ندي الطفل جلوكوز أو أعشاب أو ماء ؟!
لأن الطفل المولود بيحتاج كمية كبيرة من الطاقة و كميات محددة من العناصر الغذائية و الأملاح و المعادن كافية إنها تواكب نموه السريع جدا
أي سوائل هياخدها الطفل المولود غير اللبن هتمنعه إنه يرضع لبن الأم ، و مش هتديله العناصر الغذائية اللي محتاجها بالإضافة إنها ممكن تغير تركيز الأملاح في الدم و تعمل مشاكل زي
نقص الصوديوم
Hyponatremia،
غير إن أعضاء الجسم بتكون غير ناضجة بالشكل الكافي فبيبقى صعب التخلص من بعض المركبات الموجودة في الأعشاب و عشان كدة لازم نبقى حريصين جدا في أي حاجة بنديها لحديث الولادة .
البوست الجاي هنكمل الكلام عن الرضاعة الطبيعية و فوائدها
د محمد أحمد

18/10/2019

ومن حُسْن حظّي أنيَ ما زلت هشاً
لأدخل في التجربةْ!
للشاعر ( محمود درويش)

17/10/2019

شايفين أيه أكثر عدداً في محيط معارفكم من الأمهات الجدد :
الرضاعة الطبيعية ولا الرضاعة باللبن الصناعي ؟

عشان يوصلكم الموضوعات الجديدة ،
Like , follow page and , share !

17/10/2019

نصيحة لكل الأمهات
الأطفال خاصة حديثي الولادة و الرضع لازم يتم الكشف عليهم بواسطة دكتور الأطفال فقط عشان يحدد الحالة العامة و يشخص المرض بصورة صحيحة و يكتب العلاج المناسب حسب وزن الطفل و عمره .
بيجيلنا كتير في الرعاية المركزة للأطفال ، حالات كتير في حالة سيئة عشان تأخير التشخيص و العلاج ، على الرغم إن بداية المرض كان أعراض بسيطة و سهلة العلاج في البيت .
الفحص الإكلينيكي للطفل بواسطة طبيب الأطفال أهم مرحلة في العلاج .
حافظوا على أولادكم :)

16/10/2019

كم أم في الصفحة تعرض مولودها أو مولود حد تعرفه للصفرا بعد الولادة ، و ظهرت عند عمر كام يوم ، و احتاجوا يتحجزوا في ( الرعاية المركزة لحديثي الولادة ) ولا لأ ؟!

15/10/2019

لما يقعد يفكر هاصحيهم إزاي بالليل ؟!!

14/10/2019

النزلات المعوية - gastroenteritis - الجزء الثاني
منظمة الصحة العالمية قدرت توصل لفكرة بسيطة وهي أكياس معالجة الجفاف و هي بتتكون من تركيزات معينة من الجلوكوز و الصوديوم و البوتاسيوم
الكيس بيتحل علي 200 سم ماء نظيف ( مياة معدنية أو ماء مغلي و مبرد)
وبياخدها الطفل بالمعلقة الصغيرة أو السرنجة بالفم بكمية يحددها طبيب الأطفال حسب وزن الطفل على مدار 4 ساعات
وبكدة بنبقى عوضنا الطفل بالأملاح و السوائل اللي بيفقدها و تأثيرها مساوِ لتأثير المحاليل الوريدية
الدراسات أثبتت إن في دور كبير لل( الزنك) في علاج النزلات المعوية
ولو الطفل أخد من 10 ميللجرام ل 20 ميلليجرام في اليوم لمدة 14 يوم بيساعد في الشفاء من النزلة المعوية
الأدوية اللي بتمنع الإسهال و بتقلل حركة الأمعاء مش مثبت إن ليها دور في علاج النزلات المعوية و أحيانا بتعمل مشاكل و مضاعفات
لإن الاسهال طريقة الجسم الطبيعية عشان يتخلص من السموم اللي سببت النزلة ،المعوية ، و بالتالي لما بنمنع الإسهال بتفضل السموم متراكمة في الجسم
موانع القيء دورها بيبقي السماح للطفل أنه ياخد محلول معالجة الجفاف بالفم
أكياس معالجة الجفاف لازم تتحل في 200 سم ماء مش أقل من كدة عشان مايزيدش تركيز الصوديوم في الدم و دي حالة خطيرة جدًا
يبقى كدة
علاج النزلة المعوية والجفاف البسيط (أكياس معالجة الجفاف عن طريق الفم ) و شراب الزنك
لكن الجفاف المتوسط و الشديد علاجهم الحجزفي المستشفى و المحاليل الوريدية
الطفل لازم يكمل على الرضاعة الطبيعية لأن ليها دور كبير في تقليل شدة النزلة المعوية و بتحميه من الجفاف
طبيب الأطفال المتخصص هو اللي هيحدد بفحص الطفل درجة الجفاف والعلاج المناسب .

13/10/2019

لما يسمع إن ميعاد التطعيم قرب .

12/10/2019

النزلات المعوية - Gastroenteritis - الجزء الأول

النزلة المعوية هي إصابة الطفل بنوبات متكررة من الإسهال و القيء و أسبابها كتير ممكن يبقى سببها
(فيروسي - بكتيري - طفيليات)
فيروس الروتا هو أشهر سبب للنزلات المعوية في الأطفال اللي بتوصل للجفاف الشديد و بتحتاج دخول المستشفى والمحاليل الوريدية
لحسن الحظ في تطعيم ( اختياري) لفيروس الروتا ممكن ياخده الطفل ، جرعتين عند شهرين و أربع شهور
التطعيم مش بيمنع الإصابة بفيروس الروتا ، لكن أهميته أنه بيقلل شدة النزلة المعوية و احتمالية الدخول في جفاف شديد
السالمونيلا و إي كولاي و الكامبيلوباكتر من أشهر أنواع البكتريا اللي بتسبب النزلات المعوية ، وفي الغالب مع الإسهال و القيء بيبقى مصحوب بارتفاع شديد في درجة الحرارة و دم في البراز و إعياء.
طفيلي (الجيارديا) و الأميبا من أشهر الطفيليات المسببة للنزلة المعوية
ازاي نعرف إن النزلة المعوية بدأت تدخل الطفل في جفاف ؟!
هنلاحظ جفاف لسان الطفل وحلقه ، مفيش دموع مع البكاء ، جفاف الجلد
ومع زيادة درجة الجفاف : بتقل كمية البول و بيزيد بكاء الطفل وعينه بتبقى غائرة
علامات الخطر و الجفاف الشديد : برودة الأطراف ، غياب الوعي .
النزلات المعوية على الرغم إنها لو اتشخصت بدري و الطفل أخد علاجه الصحيح في الوقت المناسب بيتم الشفاء منها من غير أخطار
إلا أن مضاعفات تأخر العلاج زي الجفاف الشديد بتبقى خطر جدًا وممكن توصل
للوفاة نتيجة حموضة الدم أو التغير في أملاح الصوديوم و البوتاسيوم في الدم .
عشان كدة أول ما الطفل تجيله نزلة معوية لازم يتم فحصه بواسطة طبيب الأطفال عشان نتطمن إن مافيش جفاف
المضادات الحيوية مش هي العلاج الرئيسي للنزلات المعوية ، هي علاج تكميلي في حالات النزلات المعوية نتيجة التهاب بكتيري
أهم علاج للنزلة المعوية هي ( السوائل )
الطفل بيبفقد سوائل وأملاح جسمه في الإسهال و القيء و بالتالي الحل المنطقي هو تعويضه بالسوائل المناسبة عشان ما يدخلش في جفاف
هنعرف العلاج في البوست الجاي

12/10/2019

إحنا أطباء أطفال وحديثي الولادة

هدفنا نوصل المعلومة الطبية بصورة سهلة و واضحة للأم و الأسرة من غير الدخول

في مصطلحات طبية معقدة أو وصف أدوية ،

هنقول شرح مبسط للأمراض و الأعراض الشائعة و نعرف

إمتى نتطمن و نتعامل مع العرض في البيت ؟! و امتى نروح للطبيب ؟!.

نعرف نفرق بين العادي و الطبيعي و بين الخطر اللي يستلزم اننا نروح المستشفى

مع نصايح مهمة و مفيدة في تغذية الطفل

وصف الدواء لازم يتم بعد فحص الطفل مباشرة بواسطة طبيب الأطفال المتخصص .

نتمنى ليكوا و لأولادكم حياة سعيدة و صحة :)

11/10/2019

- مش هتروح تكشف النهاردة ؟
- لا ، الدكتور اللي بنروحله هيفضل يسأل( الكبيرة) أسئلة كتير و يقعد يكشف علي و بيزهقني !
- يا عم دا غلبان ، مش بيكتب حقن
- يا لئيم ! أمال كنت راجع بتصوت ليه أخر مرة و أيدك على رجلك :P

10/10/2019

أي حاجة هتحصل للطفل من ساعة الولادة بتأثر على كل
حياته نفسيا و جسديا لغاية ما يكبر ..

أثروا في حياة أولادكم صح ! :)

محمود درويش كتب قصيدة بتشرح نفس المعنى و غنتها صاحبة الروح المقاومة (ريم بنا ) :

أَثر الفراشة
أَثر الفراشة لا يُرَى
أَثر الفراشة لا يزولُ

هو جاذبيّةُ غامضٍ
يستدرج المعنى، ويرحلُ
حين يتَّضحُ السبيلُ

هو خفَّةُ الأبديِّ في اليوميّ
أشواقٌ إلى أَعلى
وإشراقٌ جميلُ

هو شامَةٌ في الضوء تومئ
حين يرشدنا الى الكلماتِ
باطننا الدليلُ

هو مثل أُغنية تحاولُ
أن تقول، وتكتفي
بالاقتباس من الظلالِ
ولا تقولُ…

أَثرُ الفراشة لا يُرَى
أُثرُ الفراشة لا يزولُ!

08/10/2019

تحبوا نتكلم عن أيه المرة الجاية ؟
الرضاعة الطبيعية ، أو النزلات المعوية ، أو حساسية الألبان ؟!
أو نخلي بوست مفتوح للأسئلة ؟! :D

08/10/2019

إيه علاج الصفرا ؟!
أول ما تلاحظ الأم الصفرا في الطفل لازم تروح بيه لطبيب الأطفال و قياس نسبة الصفرا بجهاز قياس الصفرا عن طريق الجلد أو أكثر دقة ، قياس نسبة الصفرا في الدم
بعد ما الطبيب بيعرف نسبة الصفرا بيقارن النسبة بمنحنيات بيانية و أرقام معينة بتتوقف على العمر الرحمي و التاريخ الطبي للمولود
لقراءة المقال كامل :

الصفرا نتيجة نقص الرضاعة breast fed jaundice : ودي بتحصل نتيجة أن الطفل ما بيرضعش بالصورة الكافية و بيتعرض للجفاف فبتزيد نسبة الصفرا...

07/10/2019

ارتفاع نسبة (الصفرا)في الدم من الأعراض الشائعة جدا عند حديثي الولادة و بيحصل
فيها ان مركب البيليروبين
bilirubin
بيرتفع تركيزه في الدم و نتيجة لتركيزه العالي بيظهر اللون الأصفر في الجلد و الأغشية المخاطية و كل ما زادت النسبة ، كل ما اتدرج اللون من الأصفر إلى البرتقالي ، و ممكن الأخضر و ده في حالة ارتفاع نسبة البيليروبين المباشر في الدم .
لقراءة المقال كامل :

الصفرا - jaundice ارتفاع نسبة الصفرا في الدم من الأعراض الشائعة جدا عند حديثي الولادة و بيحصل فيها ان مركب البيليروبين bilirubin بيرتف...

07/10/2019

تمارين منزلية لتخفيف المغص في الرضع 👌

ملحوظة مهمة : لازم نتعامل برفق شديد و احنا بنعملها للمولود :)

How do you care for a baby with colic? This instructional video developed by the Center for Women & Infants helps new moms and mothers-to-be learn how to car...

06/10/2019

مغص الأطفال

خاصة عند الأطفال حديثي الولادة من أكتر الأعراض المتعبة للأم قبل الرضيع واللي لازم نبقى فاهمين سببه عشان نقدر نتعامل معاه صح من غير مبالغة أو إهمال .
أول و أهم تصرف نعمله لازم نستبعد وجود سبب جراحي
دا حالة خطيرة لو أعراضها موجودة لازم نتوجه بالطفل لطورايء أقرب مستشفى فورًا و ( زي (انسداد الأمعاء
الأعراض ممكن تيجي في صورة : قيء شديد جدًا ، ظهور دم مع مخاط في البراز ، انتفاخ شديد في البطن ، علامات الأعياء الشديد ، بكاء شديد مستمر ، تحجر البطن

قراءة الموضوع كامل هنا : https://funnypediatrics.blogspot.com/2019/09/baby-colics.html

مغص الأطفال خاصة عند الأطفال حديثي الولادة من أكتر الأعراض المتعبة للأم قبل الرضيع واللي لازم نبقى فاهمين سببه عشان نقدر نتعامل مع...

06/10/2019