07/08/2019
عمرك سألتي نفسك هو أنا ليه مبخسش ؟!
رغم ان دلوقتي في اختراع اسمه جوجل فيه ملايين مواقع وصفات التخسيس وانواع الاكل وسعراتها وكل التفاصيل ، ولو مشيتي في الشارع هتلاقي يفط اخصائي السمنة والنحافة اكتر من او يساوي يفط دكاترة السنان ( الاتنين اكتر من الهم علي القلب😅)
لو سألتي او حتي مسألتيش انا ناوي اصدمك بالإجابة ؛ ألا وهي ان حضرتك مدمنة ، تاتا تا (موسيقي شريرة لفيلم قديم )
العلماء اثبتو في كتير من الابحاث ان الاكل وخاصة السكر والملح بيشتغل علي مراكز السعادة الي في المخ الي بيشتغل عليها المخدرات زي الهيروين والكوكايين
بمعني ان حضرتك بتاكلي عشان تعملي دماغ ، طبعا مش نف دماغ المخدرات ولكن هي دماغ علي كل حال
لو لغاية دلوقتي مش مصدقة او مقتنعة ، انا هقنعك
هو تعريف الادمان ايه ، التمسك بعادة او بشئ رغم انه بيسبب للانسان اضرار ، ومن غيره بيحس بوجع نفسي ما
طيب تعالي نطبق التعريف دا علي ادمان الأكل :-
١-بتاكلي وانت مش جعانة
٢-بتبدأي الأكل ناوية تاكلي معلقتين رز ، تلاقي نفسك خلصتي الحلة
٣-بتطلي اكل لما تحسي ان بطنك اتملت لدرجة مش قادرة تتنفسي
٤- بتأنبي نفسك لما تكلي كتير
٥-كل يوم واخدة قرار الريجيم الي مبيستمر اكتر من ساعة
٦-بتطلعي حجج لنفسك زي مثلا مانا حياتي دمها تقيل هي جت علي المتعة الوحيدة الي في حياتي
٧-الشعور بالاكتئاب او التأثر النفسي اثناء فترة الريجيم، واللجوء الي الشيكولاتة في لحظات الاكتئاب
٨-البعض الاكل الكتير بيسببله امراض ، منها الخطير زي لسكر وتصلب الشرايين ، ومنها البسيط زي التهاب جدار المعدة رغم كدا مبتبطليش الاكل
٩-وزنك بيزيد وبتصابي بالسمنة وانت عارفة ان جوزك او خطيبك مضايق من. زيادة وزنك ، او بتسمعي تعليقات سلبية علي مظهر جسمك ورغم كدا بتاكلي
لو عندك معظم الصفات الي مكتوبة ، فأبشر حضرتك انك مدمنة اكل ، يعني من الاخر حضرتك محتاجة دعم نفسي مش دكتور تغذية ونظام اكل
انشاء الله المقال الجاي هنتكلم عن طريق ازاي نبدأ نقاوم ونخرج من الدايرة الهباب دي بسلام، وشكرا 🙂
