Get Fit

Home
Get Fit

صفحة تهتم بصحتك اولاً
نقدم بإذن الله كل المعلومات التي تحتاجها لصحة افضل و اجسام أحلى
(1)

15/12/2020

هرمون الجوع
_____________________________
اسمه جريلين و هو المسؤول عن الاحساس بالجوع بحيث يبعت اشارات للمخ انك لازم تاكل. الدراسات اثبتت انه الاشارات اللي تجي للمخ تجي على هيئة موجات يعني ترتفع في فترات معينه و سواء كليت ولا ما كليتش بعد وقت تنخفض و معش تحس بالجوع مثلا لو انت متعود على ثلاث وجبات في اليوم في اوقات معينه موجة الاحساس بالجوع ح تجيك تقريبا في نفس الوقت كل يوم و لو نشغلت في شي و ما كليتش الاحساس بالجوع يختفي او ينقص و نفس الشي ينطبق على اكل الحلو بعد الوجبات انت عودت جسمك على شي معين و جسمك يبدا يبعت في اشارات للمخ ان الشي هدا حاليا وقته المفروض تاكله.
ح نذكر كم فكرة تساعدك في السيطرة او التحكم في قصة الاحساس بالجوع: 1️⃣ عند الاحساس بالجوع حاول ان تشغل نفسك باي شي خصوصاً في الاوقات اللي في العادة ترتفع فيها نسبة الجوع عندك 2️⃣ الاعتماد على الاكل قليل السعرات الحرارية لان الاحساس بالشبع يكون على طريقتين الاولى السعرات الحرارية و الثانية حجم الاكل اللي كليته يعني لما تاكل صحن كبير سلاطه يمكن يكون في 100 سعرة حرارية و ياخد حيز كبير من المعدة و تحس بالشبع بدل من تاكل مثلا طرف شكلاطة و يكون فيه 300 سعرة حرارية و ما يدير شي بالعكس يخليك تجوع اكثر 3️⃣ التركيز على المصادر الرئيسية للبروتين لانها تحسسك بالشبع و تعتبر ثيرموجينك يعني الجسم عشان يهضمها يحتاج يحرق سعرات حرارية توصل الى اكثر من 20% السعرات 4️⃣ الصيام المتقطع قد يكون حل مناسب في الفترة الاولى و يخليك تتغلب على موضوع موجات الجوع لان ح يكون عندك فترة معينة تاكل فيها كل الوجبات اللي مسموحلك تاكلها 5️⃣ الابتعاد عن السكريات او الاشياء الغنية بالسكر لانها تزيد من الاحساس بالجوع 6️⃣ القهوة في كثير من الحالات تحسسك بالشبع يجب انت تكون بدول اي محليات او كريمة
____________________________
و اخيراً ما ننسوش ان النظام الغذائي المتكامل هو الحل يكون نظام غذائي صحي محسوب السعرات بالاضافة الى الرياضة مهما كان نوعها "الحركة مهمة جداً"

16/11/2020

الـــمـــــكــــــمــــــلات
___________________________
شبه كل يوم يجيني سوال خاص بالمكملات: كابتن نقدر ناخد كدا! كابتن انا كيف بادي نقدر ناخد كدا! كابتن نبي نزيد وزن او ضخامة نقدر ناخد كدا!
اول شي لازم نعرفو ان لااااااازم تنظم اكلك قبل كل شي و تعرف قداش يخش لجسمك من (بروتين - كارب - دهون) و على اساس هدا تعرف شنو ينقصك و تكمله بالمكملات .... و كيف نحسب شنو يخش جسمي الشي هدا تعرفه لما تبدا تاكل في وجبات منظمة و موزونة غير هكي مافيش. هل في حل تاني؟! مع الاسف مافيش تبي تاكل و خلاص و بتخليها بالحظ هدا شي يرجعلك.
انا حالياً ناخد في سكوب واحد واي بروتين و سكوب كرياتين و اوميجا 3 اذا ما كليتش سمك.
المكملات بدون تنظيم اكل مش ح توصلك لاي مكان خسارة فلوس و خلاص اذا تبي نتائج مضمونة نظم اكلك و انك تكسب صحتك و تبني جسمك مش شي تكسبه في يوم و ليلة يبي صبر و مداومة و التزام.
1️⃣ هل تقدر بتني جسم صحي و جميل بدون مكملات؟ اكيد تقدر تاثير المكملات اصلا لا يتجاوز 15-20% فقط 2️⃣ امتى المفروض نبدا ناخدها؟! المكملات تقدر تاخدها حتى من ثاني او ثالث يوم اذا ناوي تستمر في التمرين 3️⃣ افضل وقت ؟ مافيش وقت معين زي ما وضحت مسبقا انت المفروض يكون عندك هدف محسوب من بروتين و كارب و فات توصل لاغلبه من الاكل الطبيعي و تكمل بالمكملات.

10/11/2020

البداية
__________________________
في كل شي البداية تعتبر صعبة و لكن مع الاصرار تصير الحاجة الصعبة روتين يومي يعني من تجربتي الشخصية حتى لما نوقف على التمرين و الدايت لمدة اسبوع او اكثر يجيني الاحساس ان البداية في الدايت و التمرين من جديد صعبة و لكن اول ايام نغصب في روحي عليها غصب لين ما ترجع روتين يومي.
لما يكون عندك هدف و تبي توصله يمكن تقعد تاجل و كل يوم تقول بكرا و هدا يصير معانا كلنا و لكن لازم في يوم تقول خلاص اليوم بمبدا و تغصب روحك غصب عالشي هدا و تستمر فيه لين توصل لو خدينا موضوع الصحة و الرياضة ك مثال اول ما تبدا تشوف في جسمك يتغير و تشوف في نتايج كويسه ح يزيد عندك الاصرار و تبدا كل مره تحط في هدف جديد بعد توصل للهدف متعك.
ف توكلو على الله و ابدو و باذن الله توصلو ..... الرياضة و الاكل الصحي فوق من انها تحسن مظهرك الخارجي تحسن صحتك و تقوي مناعتك و تبعد عنك الامراض و حياتك العامة ح تحسها افضل.

08/11/2020

"الجينات" موضوع كبير و عميق و متشعب كثيراً و له تأثير كبير جدا في شكل جسمنا و حتى صحتنا العامة لان نسبة كبيرة من الامراض تكون وراثية و بعدم اهتمامنا بصحتنا نزيدو من نسبة ظهورها.
________________________
اجسامنا و قابليتها لحرق الدهون و اكتساب الكتلة العضلية تختلف من شخص لشخص و احد الاسباب الرئيسية هي الجينات و لذلك تلاحظو في ناس يمكن ما تبذلش في الجهد اللي انت قاعد تبذله من ناحية الدايت و من ناحية الرياضة و لكن قاعد هو يتحصل على نتائج احسن منك و هدا يرجع للجينات و كذلك مكان تركيز الدهون احد منها كل شخص و وين يتركز عنده الدهون (شوفو مناشير حوق الدهون).
و لكن الشي هدا المفروض ما يخليكش تحط اعذار و يجيك احباط بالعكس المفروض يعطيك دفعه لان حتى لو جيناتك مش الافضل لما تشتغل على نفسك توصل و تشوف نتائج ممتازة و يمكن حتى تغلب اللي جيناته افضل منك.
_________________________
انا ديمه نقارن في موضوع الجينات كانهم شخصين واحد ذكي و واحد يقرا هلبا مش شرط الذكي يتفوق على الشخص اللي يقرا هلبا في حالات كثيرة اللي يقرا هلبا و يتعب على نفسه يتفوق على الكل. ف اشتغل على نفسك و حاول ديمه تطور من نفسك.

31/10/2020

احد المعتقدات الغلط هو الاكل متاخر ليه علاقة ب زيادة الوزن. لازم نعرفو ان زيادة الوزن سببها انك تاكل في سعرات حرارية اكثر من اللي يحرقها جسمك و الوقت ماليشي علاقة ابداً فلهذا لو تلاحظو انا حاليا وزني ينزل و اكبر وجبتين وحدة الساعة 7-8 مساءً و اللي بعدها الساعة 9-10 ليلًا. لازم نعرفو ان اطول فترة صيام هي لما ترقد لين تنوض يعني تقريبا 7 ساعات دون اكل ف "وجبة قبل النوم" مهمة في تغذية الجسم خلال فترة النوم و لازم نختارو اشياء تكون غنية بالالياف مثل الخضروات و قسم كبير من الفواكه زي الفراولة و التوت لان فترة هضمها اطول و جسمك يستفيد منها لفترة اطول و لو تتمرن مقاومة ضيف معاها بروتين بطئ الامتصاص زي الكاسين او زبادي يوناني مثلاً عشان جسمك يتفيد من البروتين طول فترة النوم.
__________________________
افضل دايت هو اللي تقدر تستمر عليه اطول فترة ممكنه مش الدايت اللي يخليك تحس روحة في مهمة مستحيلة و كانك تعذب في نفسك.

19/10/2020

#الضخامة
____________________________
نسبة كبيرة من الناس واخدين فكرة غلط على الضخامة و يحساب روحة كان تمرن و خدى مكمل (ماس) بولي زي اللي في الصورة و هدا شي غلط مليون في المية اولا لان اللي في الصورة مستحيل توصله طبيعي لان هو بروحة ياخد في هرمون ثاني شي اذا انت تفكر في المكملات او الهرمون مهما كان اسمها او نوعها قبل ما تفكر في الاكل و الدايت انت هكي ماشي في طريق غلط.

بناء العضلات مش محصور على زيادة الوزن اذا انت اصلا نسبة الدهون عندك عالية تقدري تبني كتلة عضلية و تحرق دهون في نفس الوقت اما اذا انت اصلا ضعيف هلبا و تبي يازدة ف لازم تنظم نظام اكلك قبل كل شي.
الموضوع طبعاً في منه جانب وراثي كبير و ح نتكلم على الجانب الوراثي و تاثيرة على شكل الجسم في منشور خاص.

05/10/2020

عدد كبير من الناس يبدا ماشي في دايت معين و بعد فترة يبدا يحس ان الوزن ثبت و يخش على النت و يدا يسمع في حاجات زي (القهوة تثبت الوزن - الخبزه تثبت الوزن و غيرهم) من الكلام الفاضي.
ثبات الوزن اسبابه: 1️⃣ عدم وزن الاكل و عدم حساب والسعرات الحرارية او الحساب بشكل خطا 2️⃣ في فترة التخسيس لما وزنك ينقص جسمك ح يحتاج سعرات حرارية اقل يعني وزنك لما كان 100 يحتاج سعرات حرارية اكثر من لما يكون وزنك 80 ف الدايت يحتاج تعديل 3️⃣ قلة الحركة.
___________________________
✅ للمرة المليون خسارة الوزن و حرق الدهون تعتمد اعتماد كلي حساب السعرات اللي بحتاجها جسمك و السعرات اللي تحرقها.
✅ القهوة النسكافيه اذا فيها حليب و محليات او كريمة و مش حاسب السعرات الحرارية اللي فيها ضمن سعراتك اليومية يمكن تكون سبب ثبات الوزن زيها زي اي شي ثاني ما تحسباش زي المكسرات او زيت زيتون او حتى الفواكه حتى الاكل اللي يعتبر صحي بدون حساب يمكن يكون سبب في ثبات الوزن.

21/09/2020

‎المكملات الغذائية
__________________________
‎طبعاً المكملات من اسمها تقدر تفهم الغرض منها و هي انها المفروض تكمل شي المفروض يكون موجود من الاساس و هو ((التغذية او النظام الغذائي)). و لكن حالياً يمكن تخش لمحل مكملات لين تدوخ من كثرتهم و الشركات اللي تصنع فيهم و لكن لو انا بنصنفهم حسب الأهمية و اللي لو عندك فلوس و تبي تاخد مكملات المفروض تاخدهم اول شي هما:
‎1️⃣ البروتين سواء واي او كاسين او سوي يعتبر من اهم المكملات الغذائية لان لما تكون انت انسان رياضي و خصوصاً اللي يتمرن مقاومة يصير عندك هدم للانسجة العضلية و اهم شي لاستشفاء العضلات هي الاحماض الامينية الموجودة في البروتين و اوقات صعب توصل لحاجة جسمك من البروتين من الاكل الطبيعي فلهذا يجي دور مكمل (البروتين) و لازم تاخده حسب احتياج جسمك بعد تحسب كم جرام بروتين تقدر توفر من الاكل الطبيعي. 2️⃣ الكرياتين و حتى هو انواعه عديده و اشهرهم لفعليته و لان سعره منخفض المونوهيدرات و هو تقريبا من اكثر المكملات اللي تم عليهم بحوث و اثبتو انه امن و ماليشي اضرار و فعال جداً الكرياتين يضخ الماء في العضلات بحيث يعطيها شكل اكبر و اجمل و كذلك يعطيك طاقه و قوة اضافية وقت التمرين اللي تساعدك ترفع و اوزان اكثر و بذلك تبني عضلة اكبر اوزان اكثر مع الوقت ح تحس بالفرق الجرعة اللي تحتاجها 3-5 جرام في اليوم. 3️⃣ البري ورك اوت (مكملات الطاقة) اذا كنت من النوع اللي يواجه صعوبه بعض الايام و تحس روحك مكسل في التمرين ف مكملات الطاقة يمكن تساعدك و لكن لازم تاخدها بكميات محدوده و ما تاخدها كل يوم خليها للايام اللي تحس نفسك فاشل فيها فقط لان جسمك يتعود عليها و تبدا مع تاثر اذا تاخدها كل يوم.

11/09/2020

بسم الله توكلنا على الله
__________________________
اليوم نبدو ناخدو اول مجموعه للناس اللي تبي تشترك في النظام الخاص و النظام ح يشمل:
١- جدول غذائي محسوب السعرات و الاوزان و كمية الكارب و البروتين و الدهون.
٢- جداول كارديو فيها نسب تقريبية لمعدل الحرق نختارو نوع و ندة الكارديو اللي يناسبك و بعدين لو حبيت تغير تقدر تختار من الجدول.
٣- معلومات على الدايت و كيف تنظم اكلك و الطريقة اللي تساعدك في حساب السعرات.
٤- طرق تحضير وجبات خفيفه (سناكس حلوه) محسوبه السعرات تقدر تكسر بيها روتين الدايت لو حبيت تغير.
____________________________
ح ناخد 15 مشترك فقط حالياً و نص الشهر ناخد 15 باذن الله.
________________________
للاستفسار اكثر تواصلو معاي على الخاص

07/09/2020

موضوع (((( الطول )))) يمكن يهم نسبة كبيرة من الاصدقاء على الصفحة.
________________________
تمرين الحديد ماليشي علاقة ابداً بالطول لان موضوع الطول جيني ف اذا انت اصلا عندك جينات الطول ح تطول و مافيش شي ح يأثر على الشي هدا.
ديمة نربطو موضوع كمال الاجسام بالطول لان اغلب اللي نشوفو فيهم ابطال اصلا يعتبرو مش طوال لان بناء و زيادة الكتلة العضلية على الشخص القصير اسهل يعني مثلا اذا زدت 5 كيلو عضلة صافية على شخص طوله 165 ح يبان معبي اكثر من انك تزيد 5 كيلو عضلة صافية على شخص طولة 195.
____________________________
كولو صح و تمرنو صح و ما تشغلوش بالكم من موضوع الطول.

30/08/2020

الحركة السلبية هي الحركة اللي نسبة كبيرة من اللي يتمرنو مش مركزين عليها و غافلين على الفائدة اللي تجي منها ... ملاحظ في الجيم عدد كبير تلقاه شاد الوزن مثلاً و يتمرن باي و يرفع الوزن و لما ينزله يرخيه ينزل بسرعه بدون تركيز او لما يلعب ظهر سحب تلقاه يسحب و بعدين يرخي الوزن لين يخبط منه و هذا غلط ... التمرين حركتين و الزوز لازم تركز فيهم عشان العضلة تستفيد ب اكبر قدر ممكن.
فيدوات توضيحية مع البوست على صفحتنا على الاسنتقرام
gett__fitt

21/08/2020

زيت الزيتون
__________________________
يعتبر من الدهون الصحية الي ليها فوائد تبي منشور بروحها لو بنعددها فلهذا ننصح انك تضيفه للدايت متعك ((((((( و لكن ))))) لازم نعرفو ان السعرات الحرارية اللي في الدهون عالية جداً يعني على كل جرام دهون 9 سعرات حرارية و كل 100 مل زيت زيتون تقريباً 900 سعرة حرارية.
اجسامنا تاخد الفائدة اللي في الاكل اللي يدخل جسمنا و نفس الوقت تتعامل مع السعرات اللي في الاكل يعني اذا اكل مفيد و سعراته عالية ح يكون سبب في زيادة الوزن حتى و لو كان مفيد. (((( مافيش شي اسمه هدا كويس للدايت و هدا لا كل شي تقدر تاكله اذا ضمن سعراتك الحرارية و الاشياء المفيدة لازم تكون محسوبه ضمن السعرات زيها زي غيرها ))))

17/08/2020

الوجبة المفتووووحة
________________________
طبعاً هي وجبة تكون خارج نطاق الدايت اللي مفروض ماشي عليه و تكون "وجبة" في اليوم مش يوم كامل مفتوح. في نقاط نبي نوضحها: 🔹في اللي نديرله برنامج قبل يبدا في البرنامج يسالني امتى اليوم المفتوح تعرفه ان خاش غلط و يبي يوم مش وجبة🔹الوجبة المفتوحة المفروض تكون ك مكافأة على انجاز درته يعني لو محدد انك تخسر مثلا كيلو كل اسبوع و ماشي صح حسب الخطه تقدر كل اسبوعين تدير وجبة مفتوحة. 🔹خليها اخر وجبة في اليوم بش ما تخربش يومك كله لان لاحظت لما تديرها وقت الغدا مثلا تلقى روحك كل مره خاطرك في حاجة و تخرب اللي درته في اسبوعين 🔹الوجبة المفتوحة ماليهاش مدة يعني مش لازم كل اسبوع او كل اسبوعين مافيش رقم معين هي المفروض اذا ماشي صح تديرها اما اذا انت اصلا ماشي غلط و كل مره تجي حاجه في خاطرك تقول لا ما تضرش معناها انت مش مخلي شي في خاطرك و مافيش داعي ليها. 🔹 اذا ماشي على دايت متوازن و صحي ح تلقى نفسك في الغالب امورك تمام و توصل لهدفك و موضوع الوجبة المفتوحة مش مهتم بيه هلبا لان تاكل و منوع في مصادر اكلك 🔹اذا ماشي على دايت الخيار و الزبادي الصراحة ما نلومكش حتى لو درته يوم بعد يوم لان بجد ربي يعينك على عقلك و صحتك اللي بتهلكها. 🔹تقدر تشرب ميا قبلها او تاكل شي صحي خفيف قبلها بش تحس بالشبع و ما تاكلش هلبا اذا تبي تدير وجبة مفتوحة على الخفيف و انت من النوع اللي صعب تسيطر على نفسك. 🔹اذا حاس نفسك تمام و ماشي في الدايت صح و تشوف في نتائج كويسه و مش خاطرك في شي مافيش داعي ليها استمر.

11/08/2020

الفرق بين انك تاكل أكل صحي و انك تاكل عشان تخس.
________________________
معلومة مغلوطة عند نسبة كبيرة من الناس انك اذا اكلت اكل صحي ف انت بالضرورة ح تخسر وزن او اذا مثلا اتبعت نظام زي "الكيتو" ف انت ح تخسر وزن مهما كانت كمية الأكل و هذا غلط 100%.
خسارة الوزن سببها الوحيد هو انك تاكل في سعرات حرارية اقل من اللي يحتاجها جسمك على مدار اليوم مهما كان نوع الأكل اللي تاكله سواء كانت السعرات الحرارية من الاكل الصحي او حتى من قطع شكلاطه.
تقدر تتبع نظام كله اكل صحي و يكون غير محسوب و يزيد وزنك بدل ما تنقص و تتبع نظام ثاني يكون محسوب و فيه شكلاطة و ينزل وزنك.
طبعا الحل الافضل هو انك تتبع نظام غذائي صحي و يكون محسوب مع ممارسة الرياضة اما انك تحرم نفسك من كل شي و تاكل زبادي و خيار و تفاح و تشرب خلطات سحرية على الريق هذا اولاً غير صحي ثانياً ما تقدرش تمشي عليه فترة طويله و ح تمل منه و تكره الدايت.
النظام الغذائي الصحي يكون شي متنوع و متزن بكميات محسوبه.
لما تغير من الاكل الغير صحي الى الاكل الصحي هدي خطوة ممتازة و لكن بروحها غير كافية لضمان انقاص الوزن لان في اكل صحي و يكون عالي في السعرات الحرارية مثل المكسرات و زيت الزيتون و الافوكادو و غيرها و حتى الخبز الاسمر او الشعير اذا تاكل منه كميات فوق حاجة جسمك ح يكون سبب في زيادة الوزن.

21/07/2020

علاقة تمرين الحديد بالترهلات و هل هو شي صحيح او لا.!!
_________________________
أكثر من مره يواجه فيا تعليقات لناس خايفه او ما تبيش تتمرن حديد لان يسبب في ترهلات بعد توقف تمرين .. اولاً لازم نعرفو ان الترهلات تصير للناس اللي يكون وزنها فوق المعدل الطبيعي ب هلبا سواء شحم او عضلات يعني مثلا واحد طوله 174 وزنه الصحي الطبيعي المفروض ما بين 70-75و هو حاليا يوزن 130 و قرر يخس و خس بسرعه و بدون دايت صحي في الغالب ح يصير ترهلات او واحد في نفس الوضع بس بدل من الدهون عضلات و وقف الهرمونات اللي ياخد فيها لان مستحيل توصل للوزن هذا بكمية العضل طبيعي اجسامنا عندها حدود يعني اللي تشوفو فيهم في المسابقات كلهم واخدين منشطات بش يوصلو للحجم العضلي اللي تشوفو فيه اللي وزنه 120-130 عضله و وقف الهرمونات و التمرين ح ينقص وزنه و احتمال يصير ترهل.
الترهلات ليها علاقه ب تمدد الجلد بشكل مش طبيعي سواء كان سبب التمدد دهون او عضلات ف احتمال الترهل موجود.
انت اذا كنت تتمرن طبيعي و اكل صحي و منظم وحباتك و تاكل صح و تتمرن صح و وزنك في المعدل الصحي ف ما تخافش ابدا مستحيل توصل للمراحل اللي يصير فيها ترهل.

14/07/2020

بناء العضلات
____________________________
عشان تبني كتلة عضلية عوامل لازم تتوفر من اهمها: ١- الراحة (النوم) ٢- لازم تزيد نسبة البروتين في اكلك و اذا ما قدرتش توصل لإحتياجك من الاكل الطبيعي تستعين بالمكملات ٣- تمارين المقاومه (الحديد) و التمرين لازم يكون ي اوزان مناسبة بحيث تحط العضلة تحت ضغط يخليها تكبر و تحاول تزيد الوزن كل فترة و لكن ما تخليش الوزن يأثر على تكنيك التمرين.
ملاحظه: في فرق بين انك تبني عضل و ان العضلة تكون ناشفه يعني بناء العضلات حتى لو عليها دهون تقدر تبني عضل لكن مش ح يبان العضل الا لو نزلت نسبة الدهون في جسمك و لما تبي تخش ضخامه ما تتخيلش روحك ح تبني عضل عالناشف الضخامه فيها دهون هلبا ف حاول تبني عضل باقل نسبة دهون و اذا عندك نسبة الدهون عالية مافيش داعي تخش ضخامة اصلا (تقدر تبني عضل و تحرق دهون فنفس الوقت)

05/07/2020

أيهما افضل لحرق الدهون!
_________________________
طبعا حالياً المفروض معروف عند الكل ان افضل شي و المتحكم الرئيسي لخسارة الوزن هو تنظيم الاكل ولا يوجد رياضة في العالم يمكنها المساعده في حرق الدهون اذا اكلك غير منتظم و لكن اذا قارنا بين الكارديو و تمرين الحديد نسبة كبيرة من الناس يعتبر في تمرين "الحديد" ك وسيلة لحرق الدهون و غاض الطرف على الكارديو و لكن اذا كنت تبي افضل نتيجة لحرق الدهون يجب ان تدخل الكارديو ضمن نظامك الرياضي ف الكارديو (مشي سريع-هرولة-دراجة) افضل وسيلة لحرق سعرات حرارية. تمرين الحديد يعتبر وسيلة لبناء العضلات هذا لا يعني انك لا تحرق سعرات حرارية وقت تمرين الحديد و لكن السعرات قليلة مقارنتا بالكارديو.
__________________________
ملاحظة: انا شخصيا لا اعتبر "الحديد" رياضة اصلا لانها ماتشغلش عضلة القلب بشكل كافي و اذا تتمرن حديد بس تجري عشر خطوات تدهش و انا الشخص اللي هكي ما نشوفش فيه رياضي الصراحة حتى لو كان عضلات و س*س باك.

بسم الله توكلنا على الله__________________________اليوم نبدو ناخدو اول مجموعه للناس اللي تبي تشترك في النظام الخاص و الن...

02/07/2020

Address

Telephone

+218918883134

Website

facebook.com

Alerts

Be the first to know and let us send you an email when Get Fit posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Get Fit:

Videos

صبااااح الخير و يومكم مبارك بإذن الله _______________________________ باي سبس (سوبر ست) _______________________________ ملاحظة: اغلبنا حالياً يتمرن في البيت و التجهيزات بسيطة جداً و الاوزان مش نفس الاوزان اللي في الجيم فهذا نصيحتي عشان تحافظ على اكبر قدر ممكن من الكتلة العضلية انك تتبع نظام (To Failure) و هو انك تتمرن و ما تلتزمش بالعد و لكن تتمرن لين تحس نفس قريب من العجز.

للمهتمين بالرياضة، ولمن يتبعون أنظمة غدائية صحية ومتوازنة، لا تفوتوا موعد افتتاحنا اليوم . مقهى Get Fit يتشرف بزياراتكم، بوسعاية البديري الساعة 5:30 عصرا .

احد #اهم تمارين #باي💪🏼 ________________________ #ملاحظه تمرين الباي: كل ما يكون ظهرك ثابت اكثر كل ما يكون التمرين مركز على الباي اكثر ف تثبيت الظهر في تمرين الباي #مهم_جداً ____________________________ #ملاحظه_عامة التركيز في التمرين و الاداء الصحيح بحيث ما تقعدش ترفع و تنزل و خلاص بدون تركيز ف حاول تركز في الحركتين #السلبية و #الايجابية.

#تكنيك الباي _____________________ التركيز وقت التمرين و الاداء الصحيح للتمرين من اهم الحاجات اللي تخليك تستفيد من التمرين و تتجنب الاصابات. خصوصاً في الباي عدد كبير نشوف فيهم يلعبو ب اوزان كبيرة عليهم و الشي هدا يخليه يطبق التمرين غلط و ما يستفيدش بشكل كبير بالعكس ممكن تسبب اصابات. تثبيت الظهر مهم جدا لان لما تبدا تمرجح في ظهرك مع الوزن ظهرك ياخد جزء من الوزن مش الباي اللي يقيم في الوزن كله و ظهرك يتحرك بشكل غلط يمكن يسببلك اصابات ما تخليش تركيزك كم تقيم وزن و تبدا تعاند و تسكر في راسك الموضوع مش عناد و خلاص. ✔️ ثبت ظهرك و ح تحس ان التمرين اصعب و التركيز على الباي اكبر و الفايدة مضمونه 💪🏼✌🏼.

تمرين #بطن - Abs #متقدم . تغير تكنيك التمرين متعك مهم جدا لان العضلات تتعود على التمرين و تتعود على الاوزان و يبدا تطورها صعب فلهذا حاول تغير في تكنيك التمرين ... التكنيك اللي ماشي بيه انا و الحمدلله ديمه في نتايج كويسه هو (الدروب_ست) بالتكنيك هذا صعب العضلة تتعود على الوزن لان فيه انهاك للعضلة بشكل كبير جدا و هكي العضلة تتطور و تكبر في فيدوات في الصفحة بالخصوص. . تقدر تستعمل تكنيك الدروب ست مع جميع العضلات و اي تمرين تقدر تديره تدروب ست.

الرفعة الميتة / Dead lift __________________________ #ليش_مهم: ١- يلعب اكثر من عضلة زي الرجلين و الظهر و السواعد في تفس الوقت. ٢- يساعد في بناء الجزء العلوي من الجسم. ٣- يقوي عظلات الظهر السفليه و عظلات الفخد الخلفيه و حتى البطات. ٤- يجنبك الاصابات بحيث يقوي عضلات الظهر السفلية و عضلات البطن و هكي يزيد يحسن و يقوي و يثبت العمود الفقري. _____________________ #ملاحظة: ضروري تلعب التمرين صح و تبدا ب وزن خفيف خصوصاً اذا كنت مبتدئ و #الحزام اذا تبي تتمرن بوزن رزين.

#الأكتاف . ✔️ من اهم العضلات اللي تعطي شكل متناسق و خصوصاً للناس اللي تبحث عن ال V shape يعني اكتاف عراض و خصر نحيف. . تكنيك #الدروب_ست نستعمل فيه مع كل العضلات تقريبا استفدت منه بشكل ممتاز الحمدلله. . الدروب ست هو انك تبدا ب وزن مناسب في حالتي انا نبدا ب 14 ندير عشر عدات و بعدين بدون راحه ناخد وزن ال 10 و ندير عشر عدات و على طول بدون راحه ناخد ال 6 و ندير عشر عدات. #للمتقدمين في اللعبه اللي كيف بادي يتمرن عادي افضل ك بداية و بعد فترة يقدر يخش على الدروب ست.

تمرين #ظهر . - كان احد العضلات الضعيفة عندي بس الحمدلله في تخسن ملحوظ. . 👇🏼تابعو صفحتنا على الانستا 👇🏼 @GetFitLibya ✔️ فيدوات و صور لنصائح خاصة #بالتغذيه و #التمرين

تمرينة #كتف_امامي. . راي الشخصي في التمارين و انت جالس ان يعطي تركيز اكثر على العضلة اللي تتمرنها سواء باي او اكتاف او غيره. لو تلاحظو في ناس تتمرن واقفه و تلقاهم يهزو مع الوزن و هذا يرجع الى سببين - الوزن رزين عليك - ظهرك مش ثابت . #جربو التمرين و انت جالس و ح تحس الفرق.

😂😂😂😂 . شنو توقعاتكم !! من بيقيم #الكاس السنة؟

السلام عليكم. . كما وعدتكم #الفيديو القادم ح يكون اهم تمارين و روتين #الظهر طبعاً على طول عندي تغيرو تمارين جديده نضيف فيهم الى الروتين بس اللي في الفيديو يعتبرو #الاساسيات. . التمارين تنزل #لايف على ستوري #الانستا تقدرو تابعونا للناس المهتمه #بالتمارين و طرق تحضير #وجبات صحية. . 👇🏼 صفحتنا على #الانستا 👇🏼 @Getfitlibya

Shortcuts

Address
Telephone
Alerts
Contact The Business
Videos
Claim ownership or report listing
Want your business to be the top-listed Health & Beauty Business?

Country:

City: