14/10/2026
U nisëm vetëm, u kthyem mikesha: 10 gra shqiptare zbulojnë mirëqenien pas të 45-ave në Baden-Baden
Face Yoga, ujëra termale, meditim, art dhe miqësi të reja. Një udhëtim që na kujtoi se kujdesi për veten nuk është luks, por një kënaqësi që ia vlen t'ia dhurojmë vetes.
Nga Laura Xhaxhiu | Laura_faceyoga
Sa shumë kohë, përkushtim dhe mbështetje u japim të tjerëve. Familjes. Punës. Njerëzve që duam. Dhe sa lehtë e shtyjmë kohën për veten për «një moment tjetër».
Këtë herë, dhjetë gra vendosën të mos e shtynin më.
U takuam në aeroportin e Rinasit, shumica për herë të parë. Na prisnin tri ditë në Baden-Baden, qytetin elegant gjerman të ujërave termale. Ishim gra mbi 45 vjeç, me profesione e histori të ndryshme, por me një dëshirë të përbashkët: t'i dhuronim vetes pak qetësi, kënaqësi dhe lirinë për të shijuar jetën pa u ndier në faj.
Nga Face Yoga te Wellness on Tour
Si trajnere e Face Yoga, kam kuptuar se kujdesi për fytyrën është shumë më tepër sesa një ritual bukurie. Është edhe një moment për të ndalur, për t'u çlodhur dhe për t'i kushtuar vëmendje vetes. Me kohën, lindi dëshira që këtë ndjesi ta përjetoja së bashku me gratë edhe përtej praktikës: në udhëtime, mes natyrës, artit, relaksit dhe miqësive të reja. Kështu lindi Wellness on Tour by Laura_faceyoga. Dhe Baden-Badeni ishte vendi ku kjo ide mori forme.
Kur kujdesi për veten bëhet kënaqësi
Mëngjeset tona nisnin me Face Yoga. Përpara se të dilnim për të zbuluar qytetin, i dhuronim vetes disa minuta masazhi, frymëmarrjeje dhe qetësie. Donim të shkundnim lodhjen dhe ta nisnim ditën me energji të mirë.
Më pas na priste Baden-Badeni aristokratik, me ndërtesat elegante, kafenetë, restorantet dhe vitrinat që të grishnin të hyje brenda. Dalëngadalë, grupi po gjente ritmin e vet. Ajo energji e bukur që përcillej nga njëra grua te tjetra ishte, për mua, një tjetër formë mirëqenieje.
Në Caracalla kaluam katër orë mes pishinave termale, hamamit dhe xhakuzit. Gurgullima e ujit, muzika në sfond dhe fytyrat tona të çlodhura më kujtuan diçka të thjeshtë: kujdesi për veten nuk ka pse të jetë gjithmonë përpjekje për një rezultat. Ndonjëherë është thjesht kënaqësi.
Friedrichsbad na dhuroi një përvojë tjetër. Në këtë kompleks historik, të njohur për ritualin romano-irlandez me 17 stacione, gjithçka na ftonte të ngadalësonim.
Më ka mbetur në kujtesë fundi i ritualit: të mbështjella me batanije të ngrohta, duke dëgjuar muzikë klasike, pa pasur nevojë të organizonim asgjë. Dhe, mbi të gjitha, pa na vrarë ndërgjegjja se nuk po bënim asgjë!
Për gra të mësuara të kujdesen për gjithçka e për të gjithë, edhe kjo heshtje ishte një dhuratë.
Nga qetësia e meditimit te eleganca e mbrëmjeve
Në Lichtentaler Allee dhe mes peizazheve të Pyllit të Zi, meditimi na ftoi të ndienim barin nën këmbë, të dëgjonim gjethet dhe të përjetonim çastin.
Pas kthimit, Lida më tregoi sa shumë e kishte prekur kjo përvojë. Të nesërmen, në vend që të shkonte në zyrë, kishte takuar dy mike për t'u rrëfyer udhëtimin tonë. Pastaj më shkroi: «Laura, duhet ta zgjerosh grupin!»
Edhe Moza, Ela dhe Vjollca më treguan se meditimi u kishte shkuar «drejt e në shpirt». Por kishin shijuar po aq edhe atmosferën e Kazinosë!
Dhe kjo më pëlqeu. Sepse mirëqenia mund të jetë qetësia e meditimit në mëngjes dhe emocioni i një mbrëmjeje elegante disa orë më vonë.
«Si do të vishemi sonte?» Kjo pyetje mbartte një gëzim aq femëror! Këshillat për veshjet, fotografitë, buzëqeshjet përpara pasqyrës…
Një mbrëmje na çoi në Kazinonë historike të Kurhaus-it, mes sallave madhështore, shandanëve dhe atmosferës së epokës Belle Époque. Mbrëmje të tjera i kaluam në restorante, mes bisedave dhe të qeshurave.
Zbuluam edhe anën kulturore të qytetit: historinë e tij, Muzeun Frieder Burda dhe një shfaqje teatrale në natyrë, ku disa prej nesh u bënë spontanisht pjesë e lojës.
Secila shihte diçka ndryshe në art, në qytet, në njerëz. Dhe përmes këtyre këndvështrimeve po njihnim më mirë njëra-tjetrën.
«Laura, kur do të udhëtojmë sërish?»
Në avion, teksa ktheheshim në Tiranë, Klodi më tha diçka që më preku shumë. Më tregoi se gjatë gjithë udhëtimit kishte ndier qetësinë, pozitivitetin dhe kujdesin tim. Madje shtoi se do të vinte sërish me mua, kudo në Europë.
U ndjeva mirë dhe, pse jo, edhe pak e mikluar.
Fjalët e saj ishin shpërblimi për ditët e punës, kërkimit, përzgjedhjes së vendeve dhe ndërtimit të itinerarit. Por sidomos për atmosferën që kisha dëshiruar të krijonim së bashku.
Dhe kur, në Rinas, Ale më pyeti: «Laura, kur do të udhëtojmë sërish?», e kuptova se po ndaheshim me dëshirën për t'u ritakuar.
U ktheva nga Baden-Badeni me një bagazh kujtimesh të bukura, miqësi të reja dhe bindjen se kishim përjetuar një dimension tjetër të mirëqenies.
Për mua, kjo është lidhja magjike mes Laura_faceyoga dhe Wellness on Tour. Kujdesi për veten nuk është vetëm kujdes për fytyrën apo pamjen e jashtme. Është edhe liria për të eksploruar, për të qenë kurioze, për të krijuar miqësi dhe për t'u ndier e bukur, e lumtur dhe e plotësuar brenda vetes.
Këtë e pashë te gratë e këtij udhëtimi.
Dhe u ndjeva e përmbushur.
---
Rreth autores
Laura Xhaxhiu është trajnere e Face Yoga, krijuese e Laura_faceyoga dhe ideatore e Wellness on Tour, një koncept përvojash mirëqenieje për gra mbi 45 vjeç, që ndërthur Face Yoga, natyrën, kulturën, relaksin dhe miqësinë.
