GReeN AppLe DR.HadeeR Esmail

26/09/2026

👌👌👌

24/09/2026

لكل اللى يحب يستفيد من القافلة بكرا بإذن الله ❤️

بكرة الجمعة ٢٥ سبتمبر، بإذن الله هكون متواجد في القافلة الطبية المجانية بمستشفى الغندور ببلبيس ❤️

📍 هكون موجود من الساعة ٤ لـ ٦ مساءً لاستقبال الحالات والكشف عليها.

القافلة بتقدم كشوفات طبية مجانية في جميع التخصصات، وكمان فيه ٣٠ عملية جراحية مجانية بالكامل للحالات اللي تستحق بعد الكشف والتقييم الطبي.

لو عندك مشكلة في العظام أو محتاج تطمّن على حالة معينة، تعالى اكشف واستفيد من القافلة.

📍 مستشفى الغندور – بلبيس – طريق عبد المنعم رياض

ربنا يجعلها خطوة في الخير، ونقدر نساعد أكبر عدد من أهلنا في بلبيس والشرقية ❤️




#بلبيس

24/09/2026

كلنا مهم ناخد كالسيوم ومش لازم يكون من اللبن بس
في مصادر كتير ممكن ناخد منها الكالسيوم اللى جسمنا محتاجه ..

في أكلات بنأكلها كل يوم وممكن تساهم بشكل كويس في احتياجنا من الكالسيوم زي:
👈 السمسم والطحينة وبذور الشيا
من المصادر النباتية الغنية بالكالسيوم وسهل جدًا تدخلهم في أكلك.

👈 السردين
خصوصًا لو بيتاكل بالعظم الطري لأن العظم نفسه غني بالكالسيوم.

👈 الفول والحمص والبقوليات
مش هيعوضوا منتجات الألبان لوحدهم، لكنهم بيساهموا في إجمالي احتياجك اليومي.

👈 الجبن الطبيعيه والزبادي
ومن أسهل الطرق للحصول على كمية جيدة من الكالسيوم بصورة منتظمة.

بس خلي بالك من نقطة مهمة: مش كل كالسيوم موجود في الأكل الجسم بيمتصه بنفس الكفاءة، وكمان فيتامين د له دور أساسي في امتصاص الكالسيوم فلازم ناخده او نتعرض للشمس بانتظام عشان جسمنا ينتجه ..



#الكالسيوم

23/09/2026

قومي يابت إربطي الحته إللي بتوجعك برباط ضغط وشوفي اللي وراكي😂😂🤭

22/09/2026

مهم ناخد بالنا لو بيجيلكم حموضة كتير ❤️

21/09/2026

السلام عليكم ❤️
كنت حابة أنوه عن حاجه بخصوص الجلسات ( جميع الجلسات )
الجلسات مينفعش معاها عك ف الاكل او أنك ترجع تأكل بشراهه ونهم وانت متخيل أن الجلستين اللي انت عملتهم هتمحي تراكمات السنين وهتاكل وهتدوس اوي اوي

لا مينفعش ...جميع الجلسات بتحتاج تظبيط اكلك مش ريجيم مش هقولك اعمل ريجيم ولكن بنحتاج مناكلش عشر ارغفه في اليوم و٣ ولا ٤ اطباق رز وزيهم مكرونه
👈👈👈بتحتاج تكون معتدل ف اكلك
والحمد لله بفضل الله تعالي معايا ناس كتير عاملين الجلسات بقالهم اكتر من سنه وعايشين نظام اكل عادي ومحصلش زيادة نهائي بفضل الله تعالي
حتي كل اللي عكو ف رمضان ورجعو تاني مفيش ولا سم زيادة بفضل الله تعالي

واظن الأغلب برده جرب جلسات ف اماكن أخري وعارف الفرق بين عندنا وعند اي حد الحمد لله بحاول اوفر عليكم قدر الإمكان واحيانا كتير ناس بقولها لا متعملوش جلسه ولا حاجه التزموا بس شهر وكل حاجه هتكون تمام وبيكون علامات الاستغراب علي وجوههم انا ازاي رفضت المكسب المادي

ولكن يبقي الضمير الحي هو مقياس لعملي اولا واخيرا ❤️

وفي ناس عندها تيبس ف الدهون بتحتاج فوق ال ١٥ جلسه عشان المنطقه تنزل وده ع حسب حجم المنطقه
وده انا بقوله عشان الناس اللي هتعمل الجلسات وتروح تاكل الاخضر واليابس ومتخيله أن الجلسه هتعطيها افضل النتائج لا والف لا ماانتي لازم تضحي عشان تاخد الافضل والاقيم
ثانيا مبقولكش تعمل ريجيم بدليل عندي حالات كتير جدا بيعملوا جلسات بدون اي ريجيم ولكن اعتدل في طعامك تنعم بحياتك

شكرا لسعه صدوركم 🌹🌹🌹🌹

د.هدير إسماعيل

20/09/2026

183 ➜ 99 كيلو 🔥
84 كيلو في سنة و3 شهور… من غير أدوية ولا حقن.

النتيجة دي ماجتش بالسحر ولا بالحلول السريعة، لكن بالعلم، والمتابعة، والالتزام، ومجهود بيتعمل مع الحالة خطوة بخطوة.

أنا مش محتاجة أدي دواء عشان أثبت إني شاطرة…
النتيجة نفسها هي اللي بتتكلم. 🍏😄

د.هدير إسماعيل

هتلاقي باقي متايج بطلاتنا على الهاشتاج دا 👇


منشن لصاحبتك اللي مأجله الدايت هاتيها من ايدها وتعالي 🤣🩷

19/09/2026

عمرك أكلتي وجبة كويسة وبعدها بوقت قليل حسيتي إنك عايزة تاكلي تاني؟👀
الموضوع مش فجع لا 🤣🤣
جسمك عنده نظام معقد لتنظيم الجوع والشبع.

اللبتين من أهم الهرمونات في النظام ده وبيطلع بشكل أساسي من الخلايا الدهنية وبيبعت للمخ إشارات تساعد على تنظيم الشهية واستهلاك الطاقة.

لكن في حالات السمنة ممكن يكون مستوى اللبتين مرتفع فعلا ومع ذلك الجسم مايبقاش مستجيب لإشارته بشكل كويس وده يُعرف بـ مقاومة اللبتين.

وكمان وقت نزول الوزن وتقليل الأكل لفترات ممكن يقل اللبتين، فتزيد إشارات الجوع والرغبة في الأكل.

عشان كده الجوع المستمر مش معناه تلقائيًا إن عندك مشكلة في هرمون الشبع
لكن النوم، البروتين، الألياف، شكل الوجبات وعادات الأكل كلهم بيفرقوا.

والحل مش إننا نرفع هرمون اللبتين وخلاص لكن نفهم سبب الجوع ونظبط اكلنا بطريقة تساعدك تشبعي فعلا .

✍️ د. هدير إسماعيل
أخصائي التغذية العلاجية والسمنة والنحافة

16/09/2026

نكمل سلسلة بوستات العودة للدراسة 🙆‍♀️😅
جماعة بجد النظام الدراسي بقى مرهق جدا بين مدارس ودروس ولازم نهتم بالتغذية مش مجرد اكل يسد جوعهم وخلاص
عشان تركيزهم وتحصيلهم الدراسي وطاقتهم وعشان صحتهم قبل اى حاجه ..

تعالي اقولك ازاي تحضري اللانش بوكس يخليكي مطمنه انه بيتغذى كويس 👇👇

🟢 مصدر بروتين: بيض، جبنة، زبادي، فراخ زي ماتحبي
🟢 مصدر نشويات مشبعة: عيش بطاطس رز مكرونه اللى تحبيه 😂
🟢 خضار أو فاكهة اختاري اللى يريحك واللى يحبه واللى تقدري عليه
🟢 وطبعا طبعا اهمممم حاجه ماية كفاية خلال اليوم 💧

والأهم من كل ده:
❌ بلاش نخلي الحلويات والعصاير المعلبة هي الاختيار السهل كل يوم.
❌ وبلاش نضغط على الطفل عشان يخلص كل اللي في اللانش بوكس.

ممكن تبقى تفاصيل بسيطة بس تأثيرها كبير على صحة وتركيز اولادنا ربنا يحفظهم ❤️

لو عندك اي سؤال سيبيه ف الكومنتات وهنرد عليكي 🩷👇

15/09/2026

استكمالا لسلسلة العودة للمدارس 🫣🙆‍♀️
جمعتلكم اغلب الجبن الطبيعية الصحية خالية من الزيوت النباتية

تنفع فى الدايت بدل القريش وللولاد فى السندوتشات تحفه جدا😋❤️