24/09/2026
زي م الجسم ممكن يتحسس من أكله أكلها او حاجه لمست الجلد او
حتى روايح نفاذه
ويترتب عليه رد فعل عنيف من الجسم
بسبب الحساسيه للحاجه دي....
نفس الفكره بتحصل ف الجهاز العصبي....بيجيله حساسيه لكن بسبب الألم ...
اي الم مستمر ف الجسم مش بيقف ولا بيهدا
من المفاصل او القولون او العضلات
او نقص الفيتامينات او شوية قلق وتوتر وضغوط نفسيه...
أي الم من اي مكان مطلوب من المخ انه يتعامل معاه ويحل مشكلته...
طيب لو الألم كتير و مستمر لدرجة ان الجهاز العصبي بقى صعب عليه يتعامل معاه...
هيعمل ايه؟
هيحصله حساسيه للألم
يعني اي الم صغير هيترجمه انه الم كبير
لدرجة ان الانسان هيبقى قاعد بيراقب اي ألم
خايف يتألم اي ألم صغير فيقلب معاه لألم كبير ومنتشر ف الجسم كله...
علشان كده بنلاقي الجسم كله ف حالة الم ومعاه توتر وصداع وقولون ...
لدرجة تصحى من النوم كانك منمتش اصلا
وكل اللي بنحكيه ده بيحصل ف الفيبروميالجيا
حساسية الأعصاب المركزيه
علشان كده ف العلاج بنركز على اكتر من مسار ف العلاج
ادويه تتحكم ف الم الأعصاب زي deluxetin
وكمان نتعلم ازاي نتحكم ف جسمنا ونتعامل معاه ..العلاج المعرفي السلوكي
وندخل وسائل طبيعيه تريح الأعصاب زي تمارين التنفس ووضعيات الاسترخاء
ونستبعد وتعالج اي مشاكل تانيه ف الجسم بتسبب ألم..
وهكذا
وهشرح كل ده ف فيديو بالتفصيل والعلاجات الجديده ان شاءالله
ولو فيه اي سؤال اكتبه ف التعليقات علشان اغطيه ف الفيديوهات الجايه
مع السلامة ❤️
تنويه
اي معلومات بنشرها هدفها نشر العلم والثقافه الطبيه وبس ولا يبنى عليها أي قرار طبي
ممنوعوتاخد اي دوا او تعمل اي نصيحه بدون اشراف مباشر من طبيبك الشخصي.
