15/09/2026
non vai permanecer calada fronte os ataques aos TES.
Consideramos absolutamente inadecuado que se pretenda sinalar publicamente, con nome e apelidos, a un traballador como responsable dunha suposta perda de calidade do servizo de salvamento e socorrismo de Vigo. Os problemas dun servizo non se solucionan buscando un chibo expiatorio entre os traballadores que están na primeira liña.
Se existen deficiencias, as responsabilidades deben buscarse onde corresponde: na xestión, na organización, na contratación e na supervisión do servizo, así como nas decisións políticas que determinan os medios cos que se presta.
👉 Desde Tesgalicia coñecemos a realidade do Servizo de Praias de Vigo e coñecemos tamén o traballo dos profesionais que desenvolven a súa actividade nel. Por iso resulta especialmente preocupante a deriva que está tomando este servizo.
👉 A eliminación de postos de primeiros auxilios e de persoal de enfermaría supuxo que, por primeira vez en máis de 15 anos, as praias de Vigo quedasen sen persoal de enfermaría integrado no dispositivo. Isto non é unha cuestión menor nin unha decisión que poida pasar desapercibida cando estamos a falar da seguridade e da atención sanitaria da cidadanía.
A maiores, existen cuestións relacionadas cos medios empregados para as intervencións de emerxencia, coa cualificación do persoal e co respecto ás competencias profesionais que deben ser aclaradas.
➡️ Estas cuestións non son novas para Tesgalicia. As posibles irregularidades e deficiencias detectadas na prestación do servizo por parte da empresa responsable xa foron postas en coñecemento do Concello de Vigo, ao que lle corresponde, como administración responsable da contratación e supervisión do servizo, adoptar as medidas que procedan e garantir que as condicións pactadas se cumpran.
Por iso, desde Tesgalicia preguntamos:
👉Que medios se están poñendo realmente á disposición das praias con máis de 50.000 bañistas?
👉Que profesionais están prestando o servizo?
👉Que funcións e competencias ten cada un deles?
👉Quen supervisa que a empresa cumpra co establecido no contrato?
👉E, sobre todo, quen asume as responsabilidades cando estas condicións non se cumpren?
Non aceptamos que se traslade aos traballadores a responsabilidade polas decisións tomadas por empresas privadas ou administracións.
Os Técnicos en Emerxencias Sanitarias estamos para atender, asistir e protexer á cidadanía, non para converternos en responsables dos recortes, da falta de medios ou dunha mala planificación do servizo.
Desde Tesgalicia defendemos a profesionalidade dos traballadores e esiximos respecto polas competencias profesionais, medios suficientes, condicións dignas e un servizo público de calidade e seguro.
E se existen irregularidades na prestación dun servizo público privatizado, o que corresponde non é mirar para outro lado nin buscar culpables entre os traballadores.
Corresponde investigar. Corresponde supervisar. Corresponde actuar. E, se procede, corresponde esixir responsabilidades.
📑 Porque detrás dun contrato público hai cartos públicos.
E detrás dun servizo de emerxencias hai algo moito máis importante: a seguridade e a vida das persoas.
Tesgalicia non vai calar.
Máis medios. Máis profesionais. Máis seguridade.
E, sobre todo, máis responsabilidade.
