15/09/2026
কি অজীৰ্ণত কি খাব লাগে
নাৰিকলৰ অজীৰ্ণত চাউল খাবা
আমৰ অজীৰ্ণত গাখীৰেৰে ভাল পাবা।
ঘিঁউৰ অজীৰ্ণত ৰস জমিৰি নেমুৰ
কলৰ অজীৰ্ণত হিতকৰ ঘিঁউ
ঘেঁহুৰ অজীৰ্ণত ককড়ী খাবা
মাংসৰ অজীৰ্ণত কাঞ্জীৰে ভাল পাবা।
কমলাৰ অজীৰ্ণত গুড়,
কঠালত অজীৰ্ণ কলে কৰে দুৰ।
নেমুৰ অজীৰ্ণত নিমখ লাগে,
নিমখত চাউলধোৱা পানীয়ে ভাগে।
মাটিমাহ খাই অজীৰ্ণ হ'লে তক্ৰ বা চেনী
বুটমাহত অজীৰ্ণ,মূলা পথ্য তাকে থোৱা জানি।
মগুমাহ হজম ন'হলে আমলখি খাবা
কুলথিমাহৰ বদহজম তিলতেলে ভাল পাবা।
আপেল-পিষ্টাত মুন্নকা ভাল,
বাদাম-তৰমুজত লঙৰ পাল।
ৰহৰমাহৰ অজীৰ্ণ কাঞ্জীয়ে কৰে লয়,
লুঠুৰীত শীতল পানী খালেই ভাল হয়।
খিচৰীত সৈন্ধৱলৱন অজীৰ্ণ নাশৰ বিধি
মাহৰ বড়ত নীমৰ শিপাই হজম কৰিব সিদ্ধি।
পায়স অজীৰ্ণ মগু দাইল পানীৰে দুৰ
মাছৰ অজীৰ্ণত খাবা আমচুড়
কাছৰ মাংস অজীৰ্ণত কাশতৃণৰ শিপাৰ ৰস
আলুৰ অজীৰ্ণ চাউল পানীত বশ।
ওলকচুৰ অজীৰ্ণ ভাল কৰে গুড়ে
খাৰ খাই অজীৰ্ণ হ'লে তক্ৰ পানত এৰে।
গাইৰ তক্ৰত গৰম নিসনীয়েই ভাল
ম'হৰ তক্ৰত সৈন্ধানিমখ গুচাই জঞ্জাল।
ম'হৰ দৈৰ অজীৰ্ণ শংখভস্মত লয়,
ৰাবৰি খাই হজম ন'হলে ত্ৰিকটু প্ৰয়োগ হয়।
চেনী-গুড়ত বদ হজম খাবা শুকান আদা,
কুঁহিয়াৰত আদা খালে অজীৰ্ণৰ বাধা।
এইদৰে যোগৰত্নাকৰত উল্লেখ কৰা আছে
অজীৰ্ণ নাশৰ সহজ উপায় মনত ৰাখিবা পিছে।
দ্ৰব্যৰ দোষত দ্ৰব্যই প্ৰতিৰোধ—
আয়ুৰ্বেদৰ এই পুৰণি বোধ।
