16/10/2026
# # # தலைசுற்றல், மயக்கம் – ஏன் புறக்கணிக்கக் கூடாது?
நமக்குத் திடீரெனத் தலைசுற்றலாம். சிலருக்குத் தலையைச் சுற்றுவது போன்ற உணர்வு ஏற்படும். சிலருக்கு மயக்கம் வருவது போல இருக்கும். இன்னும் சிலர் நடக்கும்போது தடுமாறலாம்.
இவை எல்லாமே ஒரே காரணத்தால் ஏற்படுவதில்லை. சில காரணங்கள் சாதாரணமானவை. ஆனால் சில நேரங்களில் உயிருக்கு ஆபத்தான நோய்களின் அறிகுறியாகவும் இருக்கலாம்.
# # # 1\. தலைசுற்றல் என்றால் என்ன?
1\. சுற்றுவது போன்ற உணர்வு
அறை அல்லது சுற்றியுள்ள பொருட்கள் சுழல்வது போலத் தோன்றும். படுக்கையில் படுத்து எழும்பும்போதோ, தலையைத் திருப்பும்போதோ ஏற்படலாம்.
காரணம்: உள் காதில் உள்ள சமநிலைப் பிரச்சினைகள் போன்றவை.
2\. மயக்கம் வருவது போன்ற உணர்வு
கண்கள் இருட்டுவது, உடல் பலவீனமாக இருப்பது, விழுந்துவிடுவோமோ என்று தோன்றுவது.
காரணம்: இரத்த அழுத்தம் குறைதல், இரத்தச் சர்க்கரை குறைதல், இரத்தசோகை போன்றவை.
3\. நடக்கும்போது தடுமாறுதல்
நேராக நடக்க முடியாமை, ஒரு பக்கமாகச் சாய்தல் அல்லது உடல் சமநிலையை இழத்தல்.
காரணம்: உள் காது அல்லது நரம்பு மண்டலப் பிரச்சினைகள் உட்படப் பல காரணங்கள்.
# # # 2\. தலைசுற்றலுக்கான முக்கிய காரணங்கள்
1\. உள் காதில் ஏற்படும் பிரச்சினைகள்
தலையைத் திருப்பும்போது அல்லது படுக்கையில் பக்கத்தை மாற்றும்போது சில விநாடிகள் தலைசுற்றலாம். காதில் இரைச்சல் அல்லது கேட்கும் திறன் குறைதலும் சில நோய்களில் ஏற்படலாம்.
2\. இரத்த அழுத்தம் குறைதல்
படுத்திருந்து திடீரென எழும்பும்போது மயக்கம் வரலாம். நீர்ச்சத்து குறைதல் அல்லது சில மருந்துகளும் இதற்குக் காரணமாகலாம்.
3\. இரத்தசோகை
இரத்தத்தில் ஹீமோகுளோபின் குறைவதால் சோர்வு, மூச்சுத்திணறல், இதயத்துடிப்பு அதிகரித்தல் மற்றும் தலைசுற்றல் ஏற்படலாம்.
4\. இரத்தச் சர்க்கரை குறைதல்
குறிப்பாக நீரிழிவு நோய்க்கு மருந்து அல்லது இன்சுலின் எடுப்பவர்கள் உணவைத் தவிர்க்கும்போது வியர்வை, நடுக்கம், பசி, மயக்கம் ஏற்படலாம்.
5\. நீர்ச்சத்துக் குறைதல்
வெயிலில் வேலை செய்தல், அதிக வியர்வை, வாந்தி, வயிற்றுப்போக்கு அல்லது போதிய தண்ணீர் குடிக்காமை காரணமாக ஏற்படலாம்.
6\. மூளைக்குச் செல்லும் இரத்த ஓட்டத்தில் பாதிப்பு
பக்கவாதம் (Stroke) அல்லது மூளையின் சமநிலையைக் கட்டுப்படுத்தும் பகுதிகளில் ஏற்படும் பாதிப்புகள் திடீர் தலைசுற்றல், தடுமாற்றம் போன்றவற்றை ஏற்படுத்தலாம்.
7\. இதயப் பிரச்சினைகள்
இதயத்துடிப்பு சீரற்ற நிலை அல்லது இதயம் போதுமான இரத்தத்தை உடலுக்குச் செலுத்த முடியாத நிலைகளில் தலைசுற்றல், மயக்கம் ஏற்படலாம்.
இதர காரணங்களாக சில மருந்துகளின் பக்கவிளைவுகள், ஒற்றைத்தலைவலி (Migraine), தொற்றுகள் மற்றும் சில நரம்பியல் நோய்களும் இருக்கலாம்.
# # # 3\. எந்த அறிகுறிகள் இருந்தால் உடனடியாக மருத்துவமனைக்குச் செல்ல வேண்டும்?
# # # ஆபத்தான எச்சரிக்கை அறிகுறிகள்
கீழே உள்ள அறிகுறிகளில் ஏதேனும் இருந்தால், தலைசுற்றல் சாதாரணமானது என்று நினைத்துப் புறக்கணிக்க வேண்டாம்.
* முகம் ஒரு பக்கமாகக் கோணலாகுதல்.
* கை அல்லது காலில் திடீர் பலவீனம் அல்லது உணர்விழப்பு.
* பேச்சுக் குழறல் அல்லது பிறர் பேசுவதைப் புரிந்துகொள்ள முடியாமை.
* திடீரென நடக்க முடியாமை அல்லது உடல் சமநிலையை இழத்தல்.
* இரட்டையாகத் தெரிதல் அல்லது திடீர் பார்வைக் குறைவு.
* திடீரென ஏற்பட்ட மிகக் கடுமையான தலைவலி.
* மயங்கி விழுதல், நெஞ்சுவலி, மூச்சுத்திணறல் அல்லது இதயத்துடிப்பு சீர்குலைதல்.
இவை பக்கவாதம் அல்லது பிற அவசரநிலைகளின் அறிகுறிகளாக இருக்கலாம். உடனடியாக அவசர மருத்துவ உதவியை நாடுங்கள். அறிகுறிகள் சில நிமிடங்களில் சரியானாலும் அவசரப் பரிசோதனை அவசியம்.
# # # 4\. தலைசுற்றலை ஏன் புறக்கணிக்கக் கூடாது?
* பக்கவாதத்தைத் தவறவிடலாம்: ஆரம்பத்தில் தலைசுற்றல் அல்லது சமநிலையின்மை மட்டுமே இருக்கலாம்.
* விழுந்து காயமடையலாம்: குறிப்பாக வயதானவர்களுக்கு இடுப்பு எலும்பு முறிவு போன்ற ஆபத்துகள் உள்ளன.
* இதயப் பிரச்சினையைத் தவறவிடலாம்: இதயத்துடிப்பு சீரற்ற நிலைகள் சில நேரங்களில் மயக்கத்தை ஏற்படுத்துகின்றன.
* சிகிச்சை தேவைப்படும் நோய்கள் கண்டறியப்படாமல் போகலாம்: இரத்தசோகை, இரத்த அழுத்தக் குறைவு அல்லது இரத்தச் சர்க்கரைக் குறைவு போன்றவை காரணமாக இருக்கலாம்.
# # # 5\. தலைசுற்றல் ஏற்பட்டால் என்ன செய்ய வேண்டும்?
* உடனடியாக உட்காருங்கள் அல்லது பாதுகாப்பாகப் படுத்துக்கொள்ளுங்கள்.
* வாகனம் ஓட்டாதீர்கள்; தனியாக நடக்க முயற்சிக்காதீர்கள்.
* நீரிழிவு நோய் இருந்தால், முடிந்தால் இரத்தச் சர்க்கரையைப் பரிசோதியுங்கள்.
* இரத்த அழுத்தத்தை அளக்க முடிந்தால் அளவிடுங்கள். ஆனால் அளவு சாதாரணமாக இருந்தாலும் ஆபத்தான காரணங்களை முழுமையாக நிராகரிக்க முடியாது.
* முதன்முறையாக ஏற்படும் தலைசுற்றல், நீடிக்கும் தலைசுற்றல், மீண்டும் மீண்டும் ஏற்படுதல் அல்லது அன்றாடச் செயல்களைப் பாதித்தல் போன்றவற்றுக்கு மருத்துவரிடம் பரிசோதனை செய்துகொள்ளுங்கள்.
* பக்கவாத அறிகுறிகள் இருந்தால் உணவு, தண்ணீர் அல்லது மாத்திரைகளை வலுக்கட்டாயமாகக் கொடுக்காமல் உடனடியாக அவசர உதவியைப் பெறுங்கள்.
# # # 6\. மருத்துவர் என்னென்ன பரிசோதனைகள் செய்வார்?
அறிகுறிகளைப் பொறுத்து இரத்த அழுத்தம், இரத்தச் சர்க்கரை, நரம்பியல் பரிசோதனை, இரத்தசோகைக்கான இரத்தப் பரிசோதனை, ECG மற்றும் தேவையானபோது மூளைப் படப்பரிசோதனைகள் மேற்கொள்ளப்படலாம். எல்லோருக்கும் எல்லாப் பரிசோதனைகளும் தேவையில்லை.
முக்கியமாக நினைவில் கொள்ளுங்கள்: தலைசுற்றல் என்பது ஒரு நோய் அல்ல; அது பல்வேறு காரணங்களால் ஏற்படும் ஓர் அறிகுறி. எதனால் ஏற்படுகிறது என்பதைக் கண்டறிவதே முக்கியம். குறிப்பாகத் திடீரெனத் தொடங்கும் கடுமையான தலைசுற்றலுடன் நடக்க முடியாமை அல்லது நரம்பியல் அறிகுறிகள் இருந்தால் அவசரமாகச் செயல்பட வேண்டும்.
