Yangon Medical Network

14/10/2026

ခွေးရူးရောဂါက ကိုက်ခံရမှ ဖြစ်တာလား ?

12/10/2026

Leptospirosis
လက်ပ်တိုစပိုင်ရိုးစစ်ရောဂါအကြောင်းသိကောင်းစရာ

🤔 Leptospirosis ရောဂါ​ဘာကြောင့်​ဖြစ်တတ်သလဲ။
👉leptospire spirochaetes ဘက်တီးရီးယားပိုး မျိုးစိတ်​တစ်မျိုးဖြစ်သည့် Leptospira interrogans ဘက်တီးရီးယားပိုး ကူးစက်ခံရသော ကြောင့် ဖြစ်ပါသည်။
👉ထို ဘက်တီးရီးယားပိုး သည်​ကြွက်များကျောက်ကပ်​နှင့်​ဆီးလမ်းကြောင်းတွင် အချိန်​အတော်ကြာ ရှင်သန်နေထိုင်နိုင်ပြီးကြွက်များတွင်တော့ ရောဂါမဖြစ်စေပါ။
👉ထို​ဘက်တီးရီးယားပိုး​ကို​ကြွက်များသာမက ခွေး၊ ဝက်၊ ကျွဲ၊ နွား​တိရစ္ဆာန်​များကလည်းသယ်ဆောင်နိုင်ပါသည်။ ထိုရောဂါပိုးကူးစက်ခံရသော တိရစ္ဆာန်​များ၏ ဆီး​မှတဆင့် လူများကိုကူးစက်နိုင်ပါသည်။
👉ထိုတိရစ္ဆာန်များ၏ ဆီးနှင့်တိုက်ရိုက်​ထိတွေ့ ခြင်းမရှိသော်လည်း မြေကြီး​မှတဆင့် လည်းကောင်း၊ သောက်ရေ၊ သုံးရေများမှတဆင့် လည်းကောင်း​၊ တဆင့်​ထိတွေ့​မိသော သန့်ရှင်းမှုမရှိသော အစားအစာများမှ လည်းကောင်း​ကူးစက်နိုင်ပါသည်။
👉ရောဂါဖြစ်စေနိုင်သော ဘက်တီးရီးယားပိုးမျိုးစိတ်ကွဲ 250 ကျော်ရှိပြီးမြန်မာနိုင်ငံတွင်လည်းတွေ့ရပါသည်။
👉ကြွက်များမှစွန့်ထုတ်သော ဆီးထဲတွင်ပါဝင်သည့် Leptospira bacteria ဘက်တီးရီးယားပိုး သည်​မြေကြီး​ပေါ်တွင်​လည်းကောင်း၊ ညစ်ပတ်သောရေထဲတွင်လည်းကောင်း လပေါင်းများစွာ ရှင်သန်နေထိုင်နိုင်ပါသည်။ထိုအပြင် ရေဆိုးများ၊မိုးရေလျှံခြင်းများဖြစ်ပါကလည်း ထိုအထဲတွင်ပါဝင်ပြီး ထိတွေ့မိသူ လူများ​ကို​ကူးစက်စေနိုင်ပါသည်။
👉 leptospire​ ဘက်တီးရီးယားပိုး သည်​လူ့အရေပြားကိုထိုးဖောက်ဝင်ရောက်နိုင်ပါသည်။ ပွန်းရာ၊ရှရာများရှိသော အရေပြားတွင်ပို၍ လွယ်ကူစွာဝင်ရောက်နိုင်ပါသည်။
👉မိုးရာသီ​တွင်​ ရေကြီးခြင်း၊ရေမြောင်းများရေလျှံခြင်းစသည်တို့ဖြစ်လေ့ရှိဖြင့် ထို​ညစ်ညမ်း​သောရေထဲသွားလာလှုပ်ရှားနေရသော ပြည်သူများအနေဖြင့် သတိပြုသင့်သောရောဂါတစ်ခုလည်းဖြစ်ပါသည်။

🤔ရောဂါ​လက္ခဏာ​တွေ​က​ဘာတွေလဲ။
👉ရောဂါပိုးစဝင်ချိန်မှ ရောဂါ​လက္ခဏာ​ပြသည်အထိရောဂါပျိုးချိန်မှာ 7 ရက်ခန့် ( 2 ရက်မှ​30 ရက်​ခန့်) ကြာတတ်ပါသည်။
ရောဂါ​လက္ခဏာ​များမှာ
🔺ဖျားခြင်း၊
🔺ကိုယ်လက်ကိုက်ခဲခြင်း၊
စသည်​တို့​ဖြစ်တတ်​သည်။
🔷90%ခန့်မှာ မပြင်းထန်ပဲ​ 2 ပတ်​အတွင်း​ပြန်ကောင်းသွားကြသည်။
👉2 ပတ်ကျော်ကြာလာပါက
🔺အဖျားကြာရှည်ခြင်း၊ချမ်းတုန်​ခြင်း
🔺မျက်စိနီရဲလာခြင်း
🔺ခေါင်းကိုက်ခြင်း
🔺ကြွက်သားများနာကျင်ကိုက်ခဲခြင်း
🔺ဗိုက်အောင့်ခြင်း၊
🔺မျက်လုံးဝါခြင်း၊
💢ပြင်းထန်ပါက
🔺ဦးနှောက်​အမြှေးရောင်ခြင်း
🔺ဆီးထွက်နည်းသွားပြီးကျောက်ကပ်ပျက်စီးခြင်း​
🔺အဆုတ်ပျက်စီးခြင်း
🔺နှလုံးကြွက်သားရောင်ခြင်း၊
🔺သွေးဥမွှာအရေအတွက်နည်းလာသဖြင့် သွေးမတိတ်ခြင်း၊ သွေးခြေဥခြင်း၊နှာခေါင်းသွေးလျှံခြင်း
🔺ချောင်းဆိုးသွေးပါခြင်း၊
🔺ဝမ်းမဲမဲသွားခြင်း၊ ဆီးထဲတွင်သွေးပါခြင်း
စသည်တို့ဖြစ်နိုင်သည်။
🚨အချိန်မီမကုသပါက အသက်သေဆုံးနိုင်ပါသည်။

🤔ဘယ်​ရောဂါ​တွေက​ leptospirosis ရောဂါနဲ့မှားတတ်သလဲ။
👉သွေးလွန်တုပ်ကွေး​ရောဂါ
👉ငှက်ဖျား​ရောဂါ​
👉တိုက်ဖွိုက်ရောဂါ
👉Scrub Typhus ရောဂါ
👉Hanta virus ရောဂါ​စသည်တို့နှင့်မှားတတ်ပါသည်။

🤔Leptospirosis ရောဂါ​မှန်းဘယ်လိုသိနိုင်မလဲ။
👉အထက်ပါ​ရောဂါ​လက္ခဏာ​များရှိပါက
သွေးဖောက်​စစ်ဆေးခြင်းဖြင့်လည်းကောင်း၊ခါးရိုးချဥ်ဆီဖေါက်ပြီး ပိုးမွေးစစ်ဆေးခြင်း​( CSF culture) ဖြင့်လည်းကောင်း၊ ဘက်တီးရီးယားပိုး​ PCR စစ်ဆေးခြင်းဖြင့်လည်းကောင်းသိနိုင်ပါသည်။
အခြား​လက္ခဏာ​များအနေဖြင့် အသည်းအင်ဇိုင်းများတက်နေခြင်း၊ သွေးဥမွှာ​အရေအတွက်​ကျခြင်း၊ကျောက်ကပ်ဆိပ်များတက်နေခြင်းစသည်တို့ဖြစ်နိုင်သည်။

🤔ဘယ်လို​လူတွေမှာ leptospirosis ရောဂါဖြစ်တတ်သလဲ။
👉ရေဆိုးများ၊ညစ်ပတ်သောရေများ၊တိရစ္ဆာန်​များအထူးသဖြင့် ကြွက်များမှစွန့်ထုတ်သော ဆီးနှင့်တိုက်ရိုက်သို့မဟုတ် သွယ်ဝိုက်၍ထိတွေ့ရသူများ၊
👉တိရစ္ဆာန်​များ၏ မစင်၊အညစ်အကြေး​များကို​ကိုင်တွယ်​ရသူများ
👉စိုက်ပျိုး​မွေးမြူရေး​လုပ်ငန်း​လုပ်ကိုင်ရသူများ
စသူတို့တွင်ဖြစ်နိုင်သည်။

🤔Leptospirosis ရောဂါ​လို့​သံသယဖြစ်ပါက ဘာလုပ်သင့်သလဲ။
👉ရောဂါ​လက္ခဏာ​ပေါ်မူတည်၍လည်းကောင်း၊ ရောဂါပြင်းထန်မှုရှိမရှိ ပေါ်မူတည်၍လည်းကောင်း၊
ပိုးသတ်ဆေး သောက်ဆေး၊ထိုးဆေးပေးရန်လိုအပ်ပါသည်။
💢အချို့လူနာ​များတွင်​အသည်းအင်ဇိုင်းများတက်နေခြင်း၊ ကျောက်ကပ်​ပျက်စီး​ခြင်း​စသည်​ည်တို့ ဖြစ်တတ်​သဖြင့်​ကျောက်ကပ်​ဆေးခြင်း အပါအဝင်​ သက်ဆိုင်ရာ​ကုသမှုများပြုလုပ်ရန်လိုအပ်ပါသည်။

🤔Leptospirosis ရောဂါမဖြစ်အောင်​ဘယ်လို​ကာကွယ်​ရမလဲ။
👉တကိုယ်ရေသန့်ရှင်းရေးဂရုစိုက်ခြင်း
👉ရေဆိုးမြောင်းများတွင်သွားလာရပါက လည်ရှည်ဖိနပ်များစီးခြင်း၊
👉ရေကြီး​ရေလျှံခြင်းဖြစ်ပြီးနောက် ကြွက်နှင့် အခြားတိရစ္ဆာန်တို့၏ ဆီးများပါဝင်နေသော မသန့်ရှင်းသည့်​ရေ​များတွင်သွားလာရပါက ဆပ်ပြာ​နှင့် စင်ကြယ်​အောင်​ဆေးကြောခြင်း၊
👉အရေပြား​တွင်​ပွန်းရာ၊ရှရာများရှိပါက၊ မိုးထဲရေထဲသွားရသောအခါများတွင်ရေစိုခံပလာစတာများကပ်ထားခြင်း၊
👉သန့်ရှင်း​သော​ရေ​ကို​သောက်​သုံးခြင်း၊ သန့်ရှင်း​သောရေကိုမရရှိပါက ရေကိုကျိုချက်၍သောက်သုံးခြင်း၊
👉ကြွက်နှင့်​သေဆုံးပြီးတိရစ္ဆာန်များကိုကိုင်တွယ်ရပါက တစ်ခါသုံးလက်အိပ်များအသုံးပြုခြင်း၊
👉ပြင်းထန်သော​ရောဂါ​လက္ခဏာ​များရှိ​ပါက​စောစောကုသမှုခံယူခြင်း
စသည်တို့ပြုလုပ်သင့်ပါသည်။

လူတိုင်း​ကျန်းမာ​ရေးကို လက်လှမ်း မှီ စေရန်
ရည် သန်လျက်
Yangon Medical Network

References
https://my.clevelandclinic.org/health/diseases/24021-leptospirosis
Oxford handbook of clinical medicine
Davidson's Principles and Practices of Medicine

10/10/2026

မြို့ဆင်ခြေဖုံးဆေးခန်းလေးတစ်ခုတွင်ဖြစ်သည်။
ကလေးအမေ။. ။ ဆရာ​မရေ​ကျွန်မသားလေးလက်သည်းတွေက အရောင်ပြောင်းလာလို့။ ကလေးကနည်းနည်းလဲမောနေပါတယ်။

ကြည့်လိုက်တော့​လက်သည်းခြေသည်း ဆယ်ချောင်းလုံးက ခရမ်းပြာရောင်ဖြစ်နေပါသည်။ကလေးကမောနေပြီးနှလုံးခုန်နှုန်းမြန်နေသည်။

ဆရာဝန်။. ။ ကလေးကအရင်က မွေးရာပါနှလုံးရောဂါရှိတာလား။
ကလေးအမေ။. ။ အရင်ကတော့​မရှိဘူးဆရာမ​။ အခုနောက်ပိုင်း မကစားနိုင်တော့ပဲမောနေလို့နှလုံးမကောင်းလို့ထင်ပြီး လူပျံတော်ပတ္တမြားသွေးဆေးနဲ့ ခရမ်းဦးချစ်တယ်​နှလုံးဆေးကိုတိုက်ပါတယ်။

ဆရာဝန်။. ။ ဘယ်လောက်ကြာပြီလဲ​အဲဒီဆေးတွေတိုက်နေတာ။
ကလေးအမေ။. ။ (3)ဗူးလောက်တော့ရှိပါပြီဆရာမ။

ဆရာဝန်။. ။ ကလေးမှာ တခြားကောဘာရောဂါရှိသေးလဲ။ မွေးတုန်းကကောလစေ့လား။ ပေါင်ပြည့်ရဲ့လား။ကာကွယ်ဆေး​တွေကောထိုးထားရဲ့လား။
ကလေးအမေ။. ။ လတော့စေ့ပါတယ်ဆရာမ။ ပေါင်ပြည့်မပြည့်တော့မသိဘူးရယ်။ မွေး​တုန်းက​တော့​ထိုးရမယ်ဆိုတဲ့ဆေးတွေထိုးထားတာပဲ။ မွေးတုန်းက အသားဝါ လို့​မီးပြရသေးတယ်။ဆရာဝန်​ကြီး​တွေ​ပြောတာတော့ G6PD ဆိုလား​ဘာဆိုလား အဲဒီရောဂါရှိတယ်ပြောတယ်။ ဆေးတွေလျောက်မတိုက်ဖို့ပြောထားလို့ အင်္ဂလိပ်ဆေးဆိုတော်ရုံတန်ရုံမတိုက်ပါဘူးဆရာမ။ အဲ​တာနဲ့​ဗမာဆေးပဲတိုက်တာပါ။

ဆရာဝန်။. ။ ခက်တော့တာပဲကလေးအမေရယ်။ဆရာမက ခရမ်းဦးချစ်တင်စတဲ့ ဗမာဆေးတွေမကောင်းဘူးလို့ပြောနေတာမဟုတ်ပါဘူး။ သူနေရာနဲ့သူတော့ ကောင်းပါလိမ့်မယ်။ သို့ပေမယ့် ပါဝင်ပစ္စည်းမသိတဲ့ ဆေးမှုန့်တွေကတော့ မကောင်းဘူးပေါ့။ တချို့​ဆေးတွေ​ဆို​စတီးရွိက်လိုဆေးမျိုးတွေကြိတ်ထည့်ထားတာမျိုးရှိတတ်တယ်။
စတီးရွိက်ဆိုတာ အကောင်းနဲ့​အဆိုးဒွန်တွဲနေတဲ့ဆေးပဲ။
နောက်တစ်ခုက​ကလေးမှာ​ G6PD ဆိုတဲ့ရောဂါရှိတယ်။အဲလိုကလေးမျိုးတွေဟာ အချို့သော အဂဵလိပ်ဆေးတွေတင်မကဘူး။ တရုတ်ဆေး၊ဗမာဆေးတွေနဲ့လည်းမတည့်ပါဘူး။ဒါ့အပြင် တချို့​အစားအသောက်​တွေ၊ ပစ္စည်း​တွေ
ဥပမာ
👉ပဲလိပ်ပြာ၊ပဲ​ကြီး၊ မြေပဲနှင့် အချို့သောပဲများ
👉 Blueberry အပါအဝင်ဘယ်ရီသီးများ၊
👉 ပဲနို့၊ပူရှိန်းဆေးပြားများ၊
👉 ပူစီနံကဲ့သို့ အရွက်များ၊ကြက်ဟင်းခါးသီး၊ ခရမ်းသီး၊
👉 ဝိုင်အမျိုးမျိုး၊ကိုလာ၊ Tonic water စသော အချိုရည်များ
👉​ဒန်းဆိုးခြင်း
👉ပရုပ်လုံးအပါအဝင် naphthalene ပါဝင်သည့် ပစ္စည်း များ နှင့်ထိတွေ့ခြင်း
စတာ​တွေက​ ရောဂါရှိသူတွေမှာသွေးနီဥဆဲလ်များပျက်စီးခြင်းဖြစ်အောင်လှုံ့ဆော်ပေးပါတယ်။
သွေးနီဥ​ဆဲလ်​တွေ​ပျက်စီး​တာ ရဲ့​နောက်ဆက်တွဲပြဿနာ​အဖြစ်​သွေး​အားနည်း​ပြီး​ဖြူဖတ်ဖြူရော်ဖြစ်လာတယ်။
နှလုံး​အားနည်းလာတယ်။ အဲတာကိုမှ ထပ်ပြီး​ဗမာဆေးတွေတိုက်တော့ သွေးနီဥ ဆဲလ်​တွေက​အောက်ဆီဂျင်ဓါတ် ကို​တစ်ရှူး(tissues) တွေဆီမပို့ဆောင်နိုင်တော့ပဲ​တစ်​ရှူး​တွေမှာ​အောက်ဆီဂျင်ဓါတ်နည်းလာခြင်း (peripheral cyanosis) ဖြစ်လာရတော့တာပဲ။
ဒါ့အပြင် ကလေးမှာ နောက်ထပ်ရောဂါတစ်ခုတွဲရက်​(double pathology) ဥပမာမွေးရာပါနှလုံးရောဂါရှိနေတာလည်းဖြစ်နိုင်သေးတယ်။
ဒါက​အရေးပေါ်အခြေအနေပါ။
ကလေးကိုအောက်ဆီဂျင်ပေးရမယ်။
သွေး​စစ်ပြီး​သွေးသွင်းဖို့လိုလိမ့်မယ်။
ဆေးရုံသွားမှ ရတော့မယ် ကလေးအမေ​ရယ်… ဟုသာ ပြောလိုက်​ရပါတော့​သည်။

💢​မွေးရာပါ​ G6PD​ရောဂါ​ရှိသူများ​တွင်​ဆောင်ရန်၊ရှောင်ရန်များကိုအထူးသတိထား၍လိုက်နာသင့်ပါသည်။
လူတိုင်း​ကျန်းမာ​ရေးကို လက်လှမ်း မှီ စေရန်
ရည် သန်လျက်
Yangon Medical Network

07/10/2026

🤔​အသက် ၃၀ အရွယ် လူကြီး ၊ ဖျားပြီးတော့ ခန္ဓာ ကိုယ်မှာ အဖု သေးသေးလေးတွေ နေရာ အနှံ့ပေါက်တာ စိုးရိမ်ရလား ဆရာမ ။ အဖုလေးတွေက ယားပါတယ်။
ငယ်ငယ်က ကာကွယ်ဆေး စုံအောင် ထိုးခဲ့လားလည်း သေချာ မသိပါဘူး။

🧑‍⚕️​ဖျားပြီးအရေပြားအကွက်၊ အဖု​သေးသေး​လေးတွေ ဖြစ်တာက​အကြောင်း​အမျိုး​မျိုး​ကြောင့်​ဖြစ်နိုင်​ပါတယ်။
ရိုးရိုးဗိုင်းရပ်စ်ပိုး၊ ဘက်တီးရီးယားပိုး၊ မွှားပိုး၊လှေး၊သန်း၊အင်းဆက်ပိုး၊ သန်ကောင်ကြောင့်ဖြစ်တဲ့မစိုးရိမ်ရတဲ့ရောဂါတွေကနေ​ဓါတ်မတည့်ခြင်း​၊ကိုယ်ခံအားစနစ်ချို့ယွင်းသည့်ရောဂါများ စသည်အသက်အန္တာရာယ်ရှိသော အရေးပေါ် ကုသဖို့လိုတဲ့ရောဂါတွေအထိ ဖြစ်နိုင်ပါတယ်။
💢​ငယ်ငယ်​ကာကွယ်​ဆေးအပြည့်မထိုးခဲ့ရင် ဝက်သက်၊ဂျိုက်သိုး၊ရေကျောက်​စ​တာတွေ​လည်းဖြစ်နိုင်ပါတယ်။
👉​ဖျား​တာနဲ့​အဖု သေးသေး လေးတွေ နေရာ အနှံ့ ပေါ​က်တာ​က​တပြိုင်နက်​တည်း​ဖြစ်တာလား။ မဖျားခင်​အဖုထွက်ပြီးမှ ဖျားတာလား။
👉​အဖု သေးသေး လေးတွေ က​ဘယ်ကနေစဖြစ်ပေါ်သလဲ။ မျက်နှာကလား။ ခန္ဓာကိုယ်​ကစတာလား။
👉​ပန်းရောင်အစက်အပြောက်လိုမျိုးလား၊ ဒါမှမဟုတ်​ပအရည်ကြည်ဖုနဲ့ အရွယ်အစားအမျိုးမျိုးရှိလား၊ အသားရောင် ရှိတဲ့​အဖုလား၊
👉​အဖုတွေက 0.5 cm အောက်သေးငယ်သလား၊ဒါမှမဟုတ်​အဲတာထက်ပိုကြီးသလား၊
👉​အရေပြား​နဲ့​တပြေးညီလား၊ ခြင်ကိုက်ဖုလိုအရေပြားပေါ်ဖောင်းတက်နေတာမျိုးရှိလား။
👉​အလွန်အမင်းယားယံခြင်းရှိသလား။ ညဘက်မှာပိုယားသလား။
👉​လက်ဖဝါး၊ ခြေဖဝါးတွေပါ အဖုတွေရှိသလား။
👉​လက်ချောင်း​ကြား၊ ခြေချောင်း​ကြားတွေမှာကောရှိသလား။
👉​အရေပြား​အောက်သွေးယိုစိမ့်ခြင်းလက္ခဏာဖြစ်တဲ့ အပ်ဖျားခန့်သွေးခြည်ဥအစက်အပျောက်များရှိသလား။
ဖန်ပြား၊သို့မဟုတ်​ဖန်ခွက်​မျက်နှာပြင်နဲ့ဖိကြည့်ရင်မှေးမှိန်သွားခြင်းရှိသလား။
စ​တာတွေ​ပေါ်မူတည်​ပြီးရောဂါရှာဖွေရပါတယ်။
🚨​ဖျားတာအပြင်အရေးပေါ်လက္ခဏာတွေဖြစ်တဲ့
🔺​အရေပြား​အောက်သွေးယိုစိမ့်ခြင်း
🔺 မျက်နှာ၊နှုတ်ခမ်း​များဖူးယောင်၍အသက်ရှု​ကျပ်ခြင်း
🔺​လည်ပင်းတောင့်နေခြင်း၊ကယောင်ချောက်ခြားဖြစ်ခြင်း
🔺 ပါးစပ်၊ မျက်လုံးနှင့် မျိုးပွားအဂဵါအစိတ်အပိုင်းများတွင် အရည်ကြည်ဖုများထွက်ခြင်း၊အရေခွံလန်ခြင်း၊ ပြည်တည်ဖုများ ရှိခြင်း
🔺​အလွန်အမင်းဖျားနာခြင်း၊နုံးချည့်​နေခြင်း၊သွေး​ပေါင်ချိန်​ကျခြင်း
🔺​ဆေးအသစ်တစ်မျိုးမျိုးစသောက်ထားခြင်း
🔺​နဂိုရောဂါအခံ ၊ဆီးချိုရောဂါ၊ကိုယ်ခံအားစနစ်ချို့ယွင်းသည့်ရောဂါများ (Autoimmune, steroids ဆေးသောက်နေရသူများ၊ကိုယ်ခံအားကျသည့် ရောဂါများ (HIV)၊
စ​တာတွေ ရှိရင်တော့ စိုးရိမ်​ရပါတယ်။

05/10/2026

Carbon monoxide poisoning
ကာဗွန်မိုနောက်ဆိုဒ် အဆိပ်သင့်ခြင်း

🤔ကာဗွန်မိုနောက်ဆိုဒ် အဆိပ်သင့်ခြင်း ဆိုတာ​ဘာလဲ။
👉ကာဗွန်မိုနောက်ဆိုဒ် အဆိပ်သင့်ခြင်း ဆိုသည်မှာ​ လူ၏ ခန္ဓာကိုယ် အတွင်း​ ရှုသွင်းသောလေထဲတွင် ကာဗွန်မိုနောက်ဆိုဒ် ပမာဏ​အများအပြားပါဝင်သွားပြီး သေစေနိုင်သော အခြေအနေတစ်ခုဖြစ်ပါသည်။ ဆေးရုံ​သို့​အချိန်မီ​မပို့ဆောင်နိုင်မီ လူနာ​အများစု​သေဆုံးရသည့် အဆိပ်သင့်ခြင်း တစ်မျိုးလည်းဖြစ်ပါသည်။
💢ကာဗွန်မိုနောက်ဆိုဒ်​ဓါတ်​ငွေ့​သည်​ အရောင်မရှိ၊ အနံ့မရှိ၊မမြင်နိုင် သော​ဓါတ်ငွေ့​ဖြစ်ပါသည်။

🤔ကာဗွန်မိုနောက်ဆိုဒ် ဓါတ်ငွေ့​ကို​ဘယ်မှာတွေ့နိုင်သလဲ။
👉ကာဗွန်မိုနောက်ဆိုဒ် ဓါတ်ငွေ့​သည်​ များသောအားဖြင့်​ ဓါတ်ဆီ၊ဒီဇယ်ဆီများလောင်ကျွမ်းရာမှ ထွက်လာလေ့ရှိပါသည်။
ထို့ကြောင့်
🔺ကားအင်ဂျင်များ
🔺လောင်စာဆီသုံး အပူပေးစက်များ (heaters)
🔺ဓါတ်ငွေ့​သုံး​ ဂတ်စ်မီးဖိုများ
🔺အကင်မီးဖိုများ
🔺မီးအိမ်များ
🔺မီးလင်းဖိုများ
🔺ကျောက်မီးသွေး၊ရေနံဆီ၊ သဘာဝဓါတ်ငွေ့၊သစ်သားများလောင်ကျွမ်းခြင်း
စသည်​တို့မှ​ကာဗွန်မိုနောက်ဆိုဒ်​ဓါတ်ငွေ့​များထွက်လာလေ့ရှိသည်။
ထို့ကြောင့်​ကာဗွန်မိုနောက်ဆိုဒ် သည်​ကျွန်ုပ်​တို့​ပတ်​ဝန်းကျင်​တွင်​နေ့စဥ်ရှုသွင်းသောလေထဲတွင် အထိုက်အလျောက်ပမာဏ အနည်းငယ်​ပါဝင်နေပါသည်။ သို့သော်​လူတိုင်း​တော့​ကာဗွန်မိုနောက်ဆိုဒ်​အဆိပ်သင့်ခြင်း မဖြစ်ကြပါ။

🤔ကာဗွန်မိုနောက်ဆိုဒ်​အဆိပ်သင့်ခြင်း ဘယ်လိုဖြစ်သလဲ။
👉ကာဗွန်မိုနောက်ဆိုဒ် ဓါတ်ငွေ့​သည်​ရှုသွင်းလိုက်သောလေထဲတွင်​အောက်ဆီဂျင် ထက်ပို၍ ပါလာပါက အသက်ရှုလမ်းကြောင်းမှတဆင့်သွေးထဲသို့ရောက်ရှိပြီး ပမာဏအနည်းအများပေါ်မူတည်၍ ရောဂါ​လက္ခဏာ​များကိုဖြစ်စေပါသည်။
ကာဗွန်မိုနောက်ဆိုဒ် သည်​အောက်ဆီဂျင်ထက်ပို၍ သွေးထဲရှိ​ဟေမိုဂလိုဘင်ဓါတ်​နှင့် ပေါင်းစပ်နိုင်ပါသည်။ ထိုအခါ ဆဲလ်နှင့်တစ်ရှူးများရှင်သန်ရန် လိုအပ်သော​ အောက်ဆီဂျင်ဓါတ် ကို​ပို့ဆောင်ပေးနေသည့် ဟေမိုဂလိုဘင်၏ လုပ်ဆောင်ချက်များပျက်ကွက်သွားပါသည်။
ထိုအခါ ဆဲလ် များ​ (အထူးသဖြင့်​ ဦးနှောက်အတွင်း ရှိဆဲလ်များ)​ကောင်းမွန်စွာ အလုပ်မလုပ်တော့ပဲ အချိန်မှီ ကုသမှုမခံယူပါက သေဆုံးနိုင်ပါသည်။
👉ကာဗွန်မိုနောက်ဆိုဒ် ပမာဏ​ပြင်းအားပေါ်မူတည်၍ ထိတွေ့​ပြီး​ မိနစ်အနည်းငယ်အတွင်းမှ နာရီအနည်းငယ်အတွင်း အဆိပ်သင့်ခြင်း ဖြစ်ပွားပါသည်။
👉လေဝင်လေထွက်ကောင်းသောနေရာများတွင် ကား​အိတ်ဇောနှင့် လောင်စာ​ဆီများလောင်ကျွမ်းရာမှ ထွက်လာသောကာဗွန်မိုနောက်ဆိုဒ် ဓါတ်ငွေ့​ရှိနေသော်လည်းအဆိပ်သင့်ခြင်းမဖြစ်နိုင်ပါ။
သို့သော်​အလုံပိတ်အခန်း၊သို့မဟုတ်​လေဝင်လေထွက်မကောင်းသောနေရာများတွင်​ ကာဗွန်မိုနောက်ဆိုဒ် ဓါတ်ငွေ့​စုလာပါက အဆိပ်သင့်ခြင်း ဖြစ်စေနိုင်ပါသည်။
👉ဥပမာ​ အလုံပိတ် အခန်းများတွင် မီးစက်​နိုး၍အိပ်ခြင်း
👉ကားအိပ်ဇောစက်နိုး၍ အလုံပိတ်ပြီး ကား​ထဲတွင်​အိတ်ပျော်သွားခြင်း
👉အလုံပိတ်​အခန်းများတွင် မီးဖို၍ အကင်များကင်ခြင်း
👉မီးလောင်နေသော အခန်းများတွင်၊ မီးခိုးများကြားတွင် အချိန်အတော်ကြာပိတ်မိနေခြင်း၊
👉လူငယ်များ​ကြားတွင်ရေပန်းစားနေသော ပလတ်စတစ်ပိုက်နဲ့ ကော်ရှုခြင်း
စသည်​တို့သည်​ကာဗွန်မိုနောက်ဆိုဒ် အဆိပ်သင့်ခြင်း ကိုဖြစ်စေသော အကြောင်းရင်းများဖြစ်ပါသည်။

🤔ကာဗွန်မိုနောက်ဆိုဒ် အဆိပ်သင့်ခြင်း ရဲ့ရောဂါလက္ခဏာတွေက ဘာတွေ လဲ။
👉မပြင်းထန်သောထိတွေ့မှု (ဥပမာ​ အိမ်တွင်း ဂတ်စ်မီးဖို စသည်​တို့မှ​ဓါတ်ငွေ့​များကြောင့်)
🔺အနည်းငယ်​ခေါင်းကိုက်ခြင်း
🔺ပျို့ချင်အန်ချင်ခြင်း
🔺အသက်ရှု ကျပ်ခြင်း၊မွန်းကျပ်ခြင်း
🔺စိတ်ရှုပ်ထွေးလာခြင်းများ
ဖြစ်တတ်​သော်လည်း​သတိထားမိခြင်းမရှိတတ်ပါ။
👉ပမာဏပိုများလာပါက
🔺ရင်ဘတ်အောင့်ခြင်း
🔺ခေါင်းမူးခြင်း
🔺မလှုပ်ချင်မကိုင်ချင် လေးလံ​လာခြင်း
🔺ဂနာမငြိမ်ဖြစ်လာခြင်း
🔺လမ်းလျှောက်ရာတွင် ယိုင်းယိုင်နေခြင်း
🔺သတိလစ်သွားခြင်း
🔺တက်သွားခြင်း
🔺သွေးပေါင်ကျခြင်း
🔺အသက်ရှု မမှန်ပဲရပ်သွားခြင်း
🔺နှလုံးခုန်ရပ်သွားခြင်း
🔺အသက်သေဆုံးခြင်း
အထိဖြစ်နိုင်ပါသည်။
👉ကိုယ်ဝန်​ဆောင်​များတွင်​ ဖြစ်ပါက
🔺ကလေးမွန်းကျပ်ခြင်း​(hypoxia) နှင့်
🔺သန္ဓေသားဗိုက်ထဲတွင် အသက်​ဆုံးရှုံး​ခြင်း
စသည်တို့ဖြစ်တတ်သည်။
👉ရုတ်တရက်​အဆိပ်သင့်ခြင်း ( Acute poisoning) မှ​အချိန်မီကုသနိုင်သော်လည်း
နောက်ဆက်တွဲပြဿနာ အဖြစ်
🔺အတိတ်မေ့သွားခြင်း
🔺ကောင်းစွာအာရုံစူးစိုက်နိုင်မှုမရှိခြင်း
🔺လမ်းလျှောက်ပုံ မူမမှန်ခြင်း
🔺ဆီး၊ဝမ်းမထိန်းနိုင်တော့ခြင်းများကျန်ခဲ့တတ်သည်။
🚨လက်ချောင်း​ထိပ်​တွင်တိုင်းသော အောက်ဆီဂျင်တိုင်းကိရိယာများသည် အောက်ဆီဟေမိုဂလိုဘင်နှင့် ကာဘောက်ဆီဟေမိုဂလိုဘင်ကို မခွဲခြားနိုင်ပါ။ ထို့ကြောင့်​အောက်ဆီမီတာဖြင့်တိုင်းလျင် အောက်ဆီဂျင်မကျပဲရှိတတ်ပါသည်။
🚨ထို့ကြောင့်အထက်ပါ လက္ခဏာ​များဖြစ်ပေါ်လာပါက နီးစပ်​ရာ​ကျန်းမာရေး​ဌာန​တွင်​အမြန်ဆုံးကုသမှုခံယူသင့်ပါသည်။ 🤔ကာဗွန်မိုနောက်ဆိုဒ် အဆိပ်သင့်ခြင်း မဖြစ်အောင်​ဘယ်လို ကာကွယ်​ရမလဲ။
👉မီးလင်းဖိုများ၊ လောင်စာဆီသုံးအပူပေး ကိရိယာများကို အလုံပိတ် အခန်းအတွင်းအသုံးပြုခြင်းမှတတ်နိုင်သမျှရှောင်ကြဥ်ခြင်း၊
👉အိမ်များတွင် ကာဗွန်မိုနောက်ဆိုဒ် တိုင်းတာနိုင်သော ကိရိယာများတပ်ဆင်ထားခြင်း
👉အလုံပိတ် အခန်းများတွင် မီးစက်နှိုးခြင်း၊ဂတ်စ်မီးဖို အသုံးပြုခြင်းမှရှောင်ကြဥ်ခြင်း
👉ကားမီးခိုးများ၊လောင်စာဆီများလောင်ကျွမ်းခြင်းမှ ထွက်လာသောမီးခိုးများနဲ့ကြာရှည်ထိတွေ့မှုမရှိအောင် ရှောင်ကြဥ်ခြင်း၊
👉တတ်နိုင်သမျှ မိမိပတ်ဝန်းကျင် လေကောင်းလေသန့်ရရှိစေရန် ဆောင်ရွက်ခြင်း
👉လူနေအိမ်များအနီးတွင် အမှိုက်​မီးရှို့ခြင်းများ၊လေထုညစ်ညမ်းစေရန်ဆောင်ရွက်ခြင်းများ​မှ​ ရှောင်ကြဥ်ခြင်း
👉အိမ်ခန်းများကိုလေဝင်လေထွက်ကောင်းစေရန် ဆောင်ရွက်ခြင်း
စသည်တို့ပြုလုပ်သင့်ပါသည်။

လူတိုင်း​ကျန်းမာ​ရေးကို လက်လှမ်း မှီ စေရန်
ရည် သန်လျက်
Yangon Medical Network

References
Davidson's Principles and Practices of Medicine
https://www.mayoclinic.org/diseases-conditions/carbon-monoxide/symptoms-causes/syc-20370642
https://my.clevelandclinic.org/health/diseases/15663-carbon-monoxide-poisoning

03/10/2026

ဆရာ၊ ဆရာမ အားလုံးမင်္ဂလာပါ

📖Yangon Medical Network မှ အခုတစ်ခေါက် စီစဥ်ထားတဲ့ course ကတော့ "WASH" training ဖြစ်ပါတယ်။

🧩ယခုလိုမိုးရွာ၊ရေကြီး၊ဝမ်းရောဂါအဖြစ်များသော ကာလတွင် ရေ၊မိလ္လာနှင့် တကိုယ်ရည်သန့်ရှင်းမှုနှင့် ပတ်သက်သောပြဿနာများစွာကို ကြုံတွေ့နေရပါသည်။

🧩အထူးတစ်ဖြင့် မြန်မာနိုင်ငံတွင် လတ်တလောဖြစ်ပွားနေတဲ့ အခြေအနေကြောင့် ဒုက္ခရောက်နေသူတွေအတွက် WASH (Water, Sanitation & Hygiene) ဆိုင်ရာအကူအညီပေးနိုင်ရန်အတွက် ယခု training ကိုစီစဥ်ထားပါသည်။

📌 6.10.26 (7:00 pm)
Topic: WASH training
Platform : Zoom

🩺ဒီ course‌ လေးကိုတက်‌ ရောက်နိုင်ရန်အတွက်အောက်ဖော်ပြပါ Link မှာ Register လုပ်ထားနိုင်ပြီဖြစ်ပါတယ်။
စာရင်းပေးထားတဲ့ email တွေကိုသာ Zoom link ပေးပို့မှာ ဖြစ်ပါတယ်။ Limited Seat ဖြစ်တာမို့ အမြန်လေး register လုပ်ဖို့တော့ လိုမယ်နော်။

https://forms.gle/W8BuWKiBFLVjVgd76
......................

Medical personal တိုင်း
ပြည်သူလူထု ကျန်းမာရေးစောင့်ရှောက်နိုင်စေရန်
ရည်သန်လျှက်
Yangon Medical Network

30/09/2026

ဆရာ၊ဆရာမ များအားလုံး မင်္ဂလာပါရှင်

“WASH” ခေါင်းစဉ်ဖြင့် September 30 ရက်နေ့တွင် ဆွေးနွေးမည်ဟု ကြေညာထားသော Course အား Cancel ကြောင်းနှင့် ပို့ချမည့်ရက်အား ထပ်မံကြေညာ ပေးသွားမည် ဖြစ်ကြောင်း အသိပေးအပ်ပါသည်။

Yangon Medical Network

30/09/2026

28/09/2026

Vomiting (Emesis)
အန်ခြင်း

အစာမကြေလို့အန်တယ်၊ ခေါင်းမူးလို့အန်တယ်၊ကားစီးရတာမူးလို့အန်တယ်၊ အစာအဆိပ်သင့်လို့အန်တယ်၊အထက်လန်အောက်လျောဖြစ်လို့အန်တယ် စသည်ဖြင့် ကြားဖူးကြပေလိမ့်မည်။
လူတစ်ယောက်​အန်ပြီဆိုတာနဲ့ အန်တာရပ်ဖို့ကြိုးစားကြပါတယ်။
ဒါပေမယ့်​ပိုပြီး​အရေးကြီး​တာက​ဘာကြောင့်​အန်ရသလဲဆိုတာပါ။

🤔 အန်ခြင်း ဘာကြောင့်ဖြစ်ရသလဲ။
🧑‍⚕️​အန်ခြင်း​သည်​ရှုပ်ထွေးနေသော​လုပ်ငန်းစဥ်ဖြစ်ပြီး ဦးနှောက်၊ အစာအိမ်၊ အူလမ်းကြောင်းအပြင်၊ စိတ်ခံစားမှုများပါရောထွေးနေသော ဖြစ်စဥ်ဖြစ်ပါတယ်။ဦးနှောက်​မှ​အာရုံကြောများကြောင့်ကော​ အစာအိမ်အူလမ်းကြောင်းကြောင့်ကောဖြစ်နိုင်ပါတယ်။
ဝမ်းဗိုက်​ကြွက်သားများ၊နံရိုးကြွက်သားများ၊ဝမ်းဗိုက်​အမြှေးပါး၊စသည်​တို့​အားဖြင့်ကျုံ့ခြင်းကြောင့် ဝမ်းဗိုက်အတွင်းဖိအားများလာခြင်းနှင့် အစာပြွန်ရှိကြွက်သားများပြေလျော့ခြင်းတို့က အစာအိမ်​အတွင်း​မှ​အစာများကိုထွက်အန်ကျလာခြင်းကိုဖြစ်စေပါတယ်။
🧑‍⚕️ အန်ခြင်း​မှာလည်း​အဆင့်​( 3) ဆင့်ရှိပါတယ်။
1)အန်ချင်တဲ့ ဆန္ဒဖြစ်လာခြင်း​ (Nausea)
2) ပျို့လာခြင်း (Retching)
3)အန်လာခြင်း (Vomiting)
ဆိုပြီးအဆင့်အလိုက်ဖြစ်ပါတယ်။
💢 သို့သော် ဦးနှောက်​အတွင်း​ဖိအားမြင့်တက်ခြင်းကြောင့်ဖြစ်ပါက တခါတရံပျို့ခြင်းမရှိ​တတ်​ပဲ​ထိုးအန်ခြင်း (projectile vomiting) ၊ စိတ်ပိုင်းဆိုင်ရာရောဂါများကြောင့်ဖြစ်ပါက လက်ထိုး၍အန်ခြင်း (induced vomiting) စသည်ဖြင့် ဖြစ်တတ်ပါတယ်။
👉​ခဏတဖြုတ်​အန်ခြင်း (Acute vomiting) ဖြစ်နိုင်သလို
👉​ကာလရှည်​အန်နေခြင်း( Cyclic vomiting syndrome သို့မဟုတ်​ Gastroparesis) ကြောင့်လဲဖြစ်နိုင်ပါတယ်။

💢​အန်​တဲ့အခါမှာ​လည်း​
1)အစာ​ဟောင်း​များအန်ခြင်း
2)သွေးအန်ခြင်း၊ကော်ဖီရောင်၊အညိုရောင်​များအန်ခြင်း
3)ချွဲသလိပ်များအန်ခြင်း
4)လေအန်ခြင်း
5)အစိမ်းရောင်၊ အဝါရောင်​သည်းခြေရည်များကို​အန်ထုတ်ခြင်း
ဆိုပြီး​အန်ဖတ်ကိုကြည့်ပြီး အမျိုးအစားခွဲခြားနိုင်ပါတယ်။

🤔​အန်ရခြင်းဖြစ်ရတဲ့အကြောင်းရင်းတွေက ဘာတွေလဲ။
🧑‍⚕️​အန်ရခြင်းသည်အကြောင်းအမျိုးမျိုးကြောင့်ဖြစ်နိုင်ပါတယ်။
🔷​ဆေးများ၏ ဘေးထွက်ဆိုးကျိုးကြောင့်အန်ခြင်း
👉​အကိုက်အခဲပျောက်ဆေးများ ၊Morphine ကဲ့သို့သောဆေးများ
👉​နှလုံးငြိမ်ဆေး Digoxin အပါအဝင်​အချို့ဆေးများ
👉​အချို့သောပိုးသတ်ဆေးများ၊ကင်ဆာဆေးများ
🔷​အရက်အလွန်အကျွံသောက်ခြင်း
🔷​အသည်းရောင်ခြင်း
🔷 အစာအိမ်​အူလမ်းကြောင်းဆိုင်ရာရောဂါများ
👉​အစာအိမ်​အူလမ်းကြောင်းရောင်ခြင်း၊ အနာဖြစ်ခြင်း
👉 အစာအိမ်ကင်ဆာဖြစ်ခြင်း
👉 အစာအိမ်အူလမ်းကြောင်းပိုးဝင်ခြင်း​( Salmonella​ သို့မဟုတ်​ Novovirus စသောရောဂါပိုးဝင်ခြင်း )
👉 အစာမကြေခြင်း
👉​ဆီးချို ရောဂါ ကြောင့် အစာအိမ်​လှုပ်ရှား​မှု​နှင့်​အစာချေဖျက်မှု အားနည်းခြင်း​( Gastroparesis)
🔷 အရေးကြီး​သော​ဝမ်းဗိုက်ပြဿနာများ(Acute Abdomen)
👉အူအတက်ရောင်ခြင်း
👉​သည်းခြေအိတ်ရောင်ခြင်း
👉​ပန်ကရိယရောင်ခြင်း
👉​အူပိတ်ခြင်း​( Intestinal Obstruction)
👉​ကလေးငယ်​များတွင်​အူစွပ်ခြင်း​(Intussusception)
🔷​ဆီးပိုးဝင်ခြင်း
🔷​ဆီးချို​အလွန်အကျွံ​တက်​ခြင်း​(Diabetes Ketoacidosis)
🔷​Addison disease ကဲ့သို့ဟော်မုန်းရောဂါများ
🔷​ကိုယ်ဝန်ဆောင်​များတွင်​ပျို့အန်ခြင်း (Morning sickness or Hyperemesis gravidarum)
🔷 ကားစီးခြင်း၊လေယာဉ်​စီးခြင်းတို့ကြောင့် မူးပြီးအန်ခြင်း ( Motion sickness)
🔷​အစာ​အဆိပ်သင့်ခြင်း​ (Botulism)
🔷 စိတ်ပိုင်းဆိုင်ရာရောဂါလက္ခဏာများကြောင့်အန်ခြင်း
👉 အဝ​လွန်​မည်စိုး၍ လက်ထိုးအန်ခြင်း (bulimia nervosa)
👉 မနှစ်မြို့ဖွယ် အမြင်အာရုံ၊ အနံ့၊ အရသာတစ်ခုခုကြောင့်အန်ခြင်း
🔷 ဦးနှောက် ပိုင်းဆိုင်ရာရောဂါလက္ခဏာများကြောင့်အန်ခြင်း
👉ခေါင်းထိခိုက်ဒဏ်ရာရခြင်း၊ ဦးနှောက်​အတွင်း​ဖိအားများလာခြင်း
👉 ဦးနှောက်​အမြှေးရောင်ခြင်း
👉 ခေါင်းတစ်ခြမ်းကိုက်ရောဂါများ
🔷​နားတွင်းရောဂါတစ်ခုခုကြောင့်အန်ခြင်း (vestibular neuritis)
🔷 သွေးထဲတွင် ဆိုဒီယမ်ဓါတ်လျော့နည်းခြင်း ကြောင့်အန်ခြင်း
စ​တာတွေ​ကြောင့်ဖြစ်နိုင်ပါတယ်။
💢 ဖြစ်​ရတဲ့​အကြောင်းရင်းမတူညီသလို ကုသမှုလည်း​မတူညီနိုင်ပါ။
💢​အဓိက​ကုသမှု​ကဖြစ်ရတဲ့အကြောင်းရင်းကိုရှာဖွေကုသရခြင်းဖြစ်ပါတယ်။

🤔​အန်ခြင်းကိုပျောက်စေတဲ့ဆေးအားလုံးအတူတူပဲလား။
🧑‍⚕️ ဆရာဝန်​တွေကဖြစ်ရတဲ့အကြောင်းရင်းပေါ်မူတည်၍ အအန်ပျောက်ဆေးအမျိုးမျိုးကိုပေးလေ့ရှိကြပါတယ်။
ဥပမာ
1) ဦးနှောက် အတွင်း​အန်ခြင်းကိုထိမ်းချုပ်သော အစိတ်အပိုင်းများသို့ တိုက်ရိုက်သက်ရောက်သောဆေးများ (Dopamine antagonists)
2)အစာအိမ်၊ အူလမ်းကြောင်းလှုပ်ရှားမှုကိုတိုက်ရိုက်သက်ရောက်သောဆေးများ​( Metoclopramide)
3)ပုံမှန်​သုံးနေကျအအန်ပျောက်ဆေးများ (Serotonin Antagonist, ondansetron)
စသည်​တို့​အပြင်​ လိုအပ်ပါက
👉 နဂိုရောဂါအခံ ကိုကုသခြင်း
👉 ဖြစ်စေသောဆေးများကိုရပ်ထားခြင်း
👉 အပြုအမူပိုင်းဆိုင်ရာ၊စိတ်ပိုင်းဆိုင်ရာမှာ ဆွေးနွေး​ပညာပေး​ခြင်းများ ပြုလုပ် ခြင်း
စ​တာတွေ​နဲ့ကုသရပါတယ်။ 🤔 ဘယ်​အချိန်မှာ အရေးကြီး​ပြီးဆရာဝန်ပြသင့်သလဲ။
👉 အန်ခြင်းက​အကြိမ်များစွာဖြစ်ပြီးအချိန်အတော်ကြာနေခဲ့ရင်
👉​ဝမ်းပျက်​ဝမ်းလျှော ခြင်းပါရှိနေခဲ့ရင်
👉​ရေ​ဓါတ်​ခန်းခြောက်​တဲ့​လက္ခဏာ​များ​ရှိနေခဲ့ရင်
👉 အဖျားရှိနေခဲ့ရင်
👉 အနည်းဆုံး​ (6) နာရီ​ကြာ အောင်ဆီးမသွားပဲရှိနေခဲ့ရင်
👉​ပြင်းထန်သော​ဗိုက်အောင့်ခြင်းပါတွဲရှိနေခဲ့ရင်
👉 ခေါင်းထိခိုက်ဒဏ်ရာရခြင်းဖြစ်ပြီးနောက်ထိုးအန်နေခဲ့ရင်
👉​အန်​တဲ့​အထဲမှာ​သွေးစများ၊သို့မဟုတ်​ကော်ဖီရောင်၊အညိုရောင်​များပါလာခဲ့ရင်
👉​အူအတက်ရောင်ခြင်းကဲ့သို့ ဝမ်းဗိုက်ညာဘက်အောက်ခြမ်းအောင့်ခြင်းတွဲရှိနေရင်
👉​ရင်ဘတ်အောင့်ခြင်း၊အသက်ရှု​ကျပ် လာခြင်း များရှိနေခဲ့ရင်
👉​အန်ခြင်း နှင့် အတူ​ခေါင်းထိုးကိုက်ခြင်း၊လည်ပင်းတောင့်နေခြင်း၊သတိကောင်းစွာမရခြင်းစတဲ့ ဦးနှောက် အမြှေးရောင်တဲ့ လက္ခဏာ​များရှိနေခဲ့ရင်
👉​အဝါရောင်၊ အစိမ်းရောင်​သည်းခြေရည်များအန်တဲ့အထဲမှာပါလာခဲ့ရင်
အရေးကြီးပြီဖြစ်သဖြင့် နီးစပ်​ရာ​ကျန်းမာရေး ဌာန သို့ အမြန်​ဆုံး​သွားပြီး ကုသမှု ခံယူ သင့်​ပါတယ်။

လူတိုင်း​ကျန်းမာ​ရေးကို လက်လှမ်း မှီ စေရန်
ရည် သန်လျက်
Yangon Medical Network

References
Davidson's Principles and Practices of Medicine
https://my.clevelandclinic.org/health/symptoms/vomiting

28/09/2026

ဆရာ၊ဆရာမ များအားလုံး မင်္ဂလာပါရှင်

“Post Food-Nutrition Recovery” ခေါင်းစဉ်ဖြင့် September 28 ရက်နေ့တွင် ဆွေးနွေးမည်ဟု ကြေညာထားသော Nutrition Course အား Cancel ကြောင်းနှင့် ပို့ချမည့်ရက်အား ထပ်မံကြေညာ ပေးသွားမည် ဖြစ်ကြောင်း အသိပေးအပ်ပါသည်။

Yangon Medical Network