16/01/2023
ကလေးအစာမစားလျှင် -
ကလေးတွေပုံမှန်ထက် အစားအသောက် လျော့နည်းရတဲ့အကြောင်းရင်းတွေကတော့အောက်ပါအတိုင်းဖြစ်ပါတယ်။
၁၊ ကြီးထွားမှုနှုန်း ပုံမှန်လျော့နည်းသွားခြင်း
ကလေးတစ်ယောက်ဟာ မွေးပြီးတစ်နှစ် အတွင်းမှာကြီးထွားနှုန်းမြန်သလိုဒီလိုကြီးထွားမှုအတွက် လိုအပ်တဲ့အစားအသောက်ကိုလည်းပိုမိုပြီးစားသုံးပါတယ်။ တစ်နှစ်ကျော်တာနဲ့သူ့ရဲ့ကြီးထွားမှုနှုန်းက ပုံမှန်လျော့သွားတဲ့အတွက် ဒါနဲ့လိုက်လျောညီထွေစွာသူ့ရဲ့အစားအသောက်စားသုံးမှုဟာ လျော့နည်းသွားပါတယ်။ ဒါဟာပုံမှန်ပါ။
တချို့ကလေးတွေက အစောပိုင်းမှာ ပေါင်ချိန်တအားတက်ပြီး နောက်ပိုင်း အရင်ထက် တက်နှုန်း စားနှုန်း လျော့နည်းသွားတာလည်းရှိပါတယ်။
၂၊ သာမန်နေမကောင်းခဏခဏဖြစ်ခြင်း
ကလေးတွေဟာအကြောင်းတစ်ခုခုကြောင့်နေမကောင်းဖြစ်လျှင်- ဥပမာဖျားတယ်၊ လည်ချောင်းနာတယ်၊နှာစေးချောင်းဆိုးဖြစ်တယ်၊ ဝမ်းပျက်တယ်၊ စသည်တို့ ဖြစ်လာလျှင် ခံတွင်းပျက်ပြီးတော့အဲဒီအချိန်မှာအစားအသောက်လျော့နည်းတတ်ပါတယ်။သုံးလေးနှစ်ကလေးတွေ မူကြိုကျောင်း စတက်တဲ့အချိန်မှာ ကလေးအချင်းချင်းအတွေ့များပြီးရောဂါပိုစုံတတ်ပါတယ်။ အဖျားအနာထူတတ်ပါတယ်။အစားသောက်ပျက်ပါတယ်။
၃၊ ဆေးဝါးများ
ဒါဟာအထက်မှာပြောခဲ့တဲ့မကြာခဏနေမကောင်းဖြစ်ခြင်းတွေနဲ့ဆက်စပ်မှုရှိပါတယ်။ ကလေးနေမကောင်းဖြစ်တိုင်း၊ ဆေးတွေတိုက် မယ် အထူးသဖြင့်ပိုးသတ်ဆေးတွေတိုက်မယ် ဆိုရင် ဒီဆေးတွေကြောင့်လည်းအစားအသောက်ပျက်နိုင်ပါတယ်။
တချို့မိဘတွေဟာ ဆေးကိုအင်မတန်တိုက်ချင်ပါတယ်။ တကယ်တော့ကလေးအတော်များများမှာဖြစ်တဲ့သာမန်နေမကောင်းခြင်းအများစုဟာ သူ့အလိုအလျောက်နှစ်ရက်သုံးရက် အတွင်းမှာပျောက်ကင်းသွားတဲ့ရောဂါတွေဖြစ်ပါတယ်။
၄၊ စိုးရိမ်သောကများခြင်း၊ စိတ်ဓါတ်ကျခြင်း
ဒီနှစ်ခုဟာဆက်စပ်နေနိုင်ပါတယ်။
ကလေးတွေမှာလည်းသူ့အရွယ်အလိုက်စိုးရိမ်သောကဒဏ်ကိုမခံနိုင်တာဖြစ်တတ်ပါတယ်။ ဒီလိုစိုးရိမ် သောကများလာတယ်၊ Stress များလာတယ်ဆိုရင် အစားအသောက် ပျက်လာတတ်ပါတယ်။ ကလေးတွေမှာ stress များနိုင်တဲ့၊ စိတ်ဓါတ်ကျနိုင်တဲ့ အကြောင်းရင်းတွေကတော့
- မိသားစုအတွင်းမှာပြဿနာရှိခြင်း
- ကျောင်းမှာ ကလေးအချင်းချင်းအနိုင်ကျင့်ခံရခြင်း၊
- ကျောင်းစာ၊ အိမ်စာ၊ မိဘဖက်မှဖြစ်သင့် တာထက်ပိုပြီးပညာရေးနှင့် ပတ်သက်၍ မျှော်လင့်ချက်ထားတာကို ဒဏ်မခံနိုင်ခြင်း
- ပတ်ဝန်းကျင်ဟာ စိုးရိမ်စရာ ပတ်ဝန်းကျင်တစ်ခု ဖြစ်နေခြင်း - ဥပမာ ခုလို COVID-19 ကာလ
ဒီအချက်တွေကို မိဘတွေဘက်ကသတိထားလိုက်နာသင့်ပါတယ်။
၅၊ သွေးအားနည်းခြင်း
သွေးအားနည်းတာနဲ့ သွေးပေါင်ကျတာမတူပါဘူး။ သွေးပေါင်ကျတယ်ဆိုတာသွေးပေါင်ချိန် တိုင်းကြည့်လို့ Pressure ကျတာပါ။ ကလေးတွေမှာတော်ရုံတန်ရုံရောဂါမရှိလျှင် သွေးပေါင်ဆိုတာကျလေ့မရှိပါဘူး။ သွေးအားနည်းတယ်ဆိုတာတော့သွေးထဲမှာရှိတဲ့ဟီမိုဂလိုဘင် (hemoglobin)ဆိုတဲ့ဓာတ်တစ်မျိုးနည်းတာပါ။ ဒီလိုနည်းရင် ကလေးငယ်ရဲ့လက်ဖဝါး၊ မျက်ခမ်းနဲ့ သိပ်ဆိုးလာရင်အရေပြားပါ ဖြူဖတ် ဖြူရော်ဖြစ်လာပါတယ်။ မြန်မာနိုင်ငံမှာအဖြစ်များတဲ့သွေးအားနည်းတဲ့အကြောင်းရင်းကတော့ သံဓာတ်ချို့တဲ့လို့ဖြစ်ပါတယ်။
ဒီလိုသွေးအားနည်းလာမယ်ဆိုရင် ကလေးတွေဟာအစားအသောက်ပျက်မယ်၊ နုံးမယ်၊ကစားချင်စိတ် စားချင်စိတ်မရှိဘူး၊ ကျောင်းစာစိတ်မဝင်စားဘူး၊ စသည်တို့ဖြစ်လာနိုင်ပါတယ်။ရေရှည်မှာကလေးရဲ့ ရုပ်ပိုင်းဆိုင်ရာ၊ အသိဉာဏ်ပိုင်းဆိုင်ရာဖွံ့ဖြိုးမှုကိုပါ အဟန့်အတားဖြစ်စေပါတယ်။ မိမိကလေးမှာသွေးအားနည်းတယ်လို့ယူဆရင်၊ ဖြူဖတ်ဖြူရော်ဖြစ်နေတယ်ဆိုရင် ဆရာဝန်နဲ့ပြသတိုင်ပင်သင့် ပါတယ်။ သွေးစစ် ကြည့်လို့ရပါတယ်။
၆၊ သန်ကောင်များ
သန်ကောင်တွေရှိရင်လည်းကလေးဟာအစားအသောက်ပျက်တတ်ပါတယ်။ သွေးအားလည်း နည်းနိုင်ပါတယ်။ ဒါကြောင့် ကလေးတွေကိုနှစ်နှစ်နောက်ပိုင်းကစပြီးအနည်းဆုံး ၆လ-တစ်နှစ် တစ်ကြိမ် သို့မဟုတ် ဆရာဝန်ညွှန်ကြားတဲ့အတိုင်းသံချသင့်ပါတယ်။ အိမ်မှာအိမ်မွေးတိရစ္ဆာန်လေးတွေ- ကြောင်ခွေးစသည်တို့မွေးထားရင်လည်းသူတို့ကိုပါသန်ချပေးသင့်ပါတယ်။
၇၊ ဝမ်းချုပ်ခြင်း
အစားအသောက်ပျက်ခြင်းနဲ့ ဝမ်းချုပ်ခြင်းဟာလည်းအပြန်အလှန်ဆက်သွယ်မှုရှိပါတယ်။ အစားအသောက်ပျက်လို့ဝမ်းချုပ်နိုင်သလိုဝမ်းချုပ်နေတဲ့ကလေးတစ်ယောက်ဟာလည်းပြန်ပြီးတော့အစားအသောက်ပျက်တတ်ပါတယ်။
၈၊ ခံတွင်းသန့်ရှင်းရေးမကောင်းလျှင်
ကလေးတွေခံတွင်းသန့်ရှင်းရေးမကောင်းလို့ သွားဖုံးရောင်မယ်၊ သွားပိုးစားမယ်ဆိုရင်လည်းနာကျင်နေတတ်တဲ့အတွက်အစားလျော့တတ်ပါတယ်။
၉၊ ရောဂါတစ်ခုခုရှိခြင်း
ခန္ဓာကိုယ်မှာရောဂါတစ်ခုခုရှိလာမယ်ဆိုရင်လည်း အစားသောက်ပျက်ပါတယ်။ ဒါဆိုရင် ကလေးတွေဟာပေါင်ချိန်ကျရုံမက တခြားသောအဲဒီရောဂါရဲ့လက္ခဏာတွေပါယှဉ်တွဲတွေ့လာတတ်ပါတယ်။
ဥပမာတီဘီရောဂါဖြစ်တယ်ဆိုရင် ရက်ရှည်ဖျားခြင်း၊ ချောင်းဆိုးခြင်းစသည်တို့ဖြစ်ပါတယ်။ ဒါကြောင့် အစားအသောက်ပျက်တဲ့ကလေးတွေကို မိဘတွေဟာပုံမှန်ပေါင်ချိန်သင့်ပါတယ်။ ပေါင်ချိန်တဖြည်းဖြည်းကျကျလာတယ်ဆိုရင် ဆရာဝန်နဲ့ပြသတိုင်ပင်သင့်ပါတယ်။
ေးကျန်းမာသိကောင်းစရာ
