27/10/2026
"BHW POCKET GUIDE CASCADING ACTIVITY"
Ang Cascading Activity alang sa mga Barangay Health Workers (BHW) nga adunay tema nga “Enhancing Community Work through the BHW Pocket Guide” gipahigayon gikan sa Hulyo 6, 2026 hangtod Septiyembre 30, 2026 sa Munisipalidad sa Kapalong, Davao del Norte. Kini nga kalihokan gihimo pinaagi sa Municipal Health Office ug sa mga Barangay Health Center, nga giapilan sa mga BHW gikan sa nagkalainlaing barangay sa munisipyo, lakip ang Capungagan, Florida, Gabuyan, Katipunan, Luna, Mabantao, Mamacao, Maniki, Pag-asa, Sampao, Semong, Sua-on, ug Tiburcia.
Ang maong kalihokan nagtumong sa pagpaambit ug pagpasabot sa mga BHW sa importansya, katuyoan, ug hustong paggamit sa BHW Pocket Guide isip ilang praktikal nga giya sa pagtuman sa adlaw-adlaw nga buluhaton sa komunidad. Kini nga pocket guide naglangkob sa mga importanteng impormasyon ug giya nga makatabang kanila sa paghatag og edukasyon bahin sa panglawas, pagpasiugda sa paglikay sa mga sakit, pagtabang sa pagpatuman sa mga programa panglawas, pag-ila sa mga panginahanglanon sa mga pamilya, ug paghatag og tukmang impormasyon ug referral ngadto sa Municipal Health Office o Barangay Health Center kon gikinahanglan.
Gipasabot kini sa mga BHW aron mas masabtan nila ang ilang mga katungdanan ug responsibilidad, mapalambo ang ilang kahibalo ug kahanas, ug masiguro nga ang mga serbisyo panglawas nga ilang ihatag sa komunidad husto, epektibo, ug nahiuyon sa mga programa sa Municipal Health Office.
Ang Munisipalidad sa Kapalong pinaagi sa pagpalig-on sa kapasidad sa mga BHW isip unang tinubdan sa impormasyon ug tabang panglawas sa matag barangay. Pinaagi sa hustong paggamit niini, mapaayo ang koordinasyon tali sa Municipal Health Office, mga Barangay Officials, Barangay Health Center, ug mga BHW, mapalapad ang kahibalo sa mga lumulupyo bahin sa panglawas, ug mapalig-on ang pagpatuman sa mga programa sa panglawas. Kini nga inisyatibo makatampo sa mas hapsay nga paghatag sa serbisyo panglawas ug sa pagpalambo sa kinatibuk-ang kahimtang sa panglawas sa mga lumulupyo sa Munisipalidad sa Kapalong.
