motherhood.trip

03/11/2026

⁨هو فعلاً في امهات عندها حليب كتير
وامهات حليبها قليل ؟

الاجابة :
ان كل الامهات تقدر تكفي احتياج طفلها (مدام مفيش مشكلة صحية تمنع ده) 🤱🏻

دخول الصناعي وشك الأم في عدم كفايتها هو اكبر سبب لقلة الحليب ..
لاننا بنأثر على دايرة العرض والطلب
وبالتالي انتاج الجسم بيقل فعلاً ⬇️

يعني سبب المشكلة غالباً مننا احنا
بس المشكلة اصلاً مكنتش موجودة !

يا ترى ايه السبب اللي خلاكي تضطري لدخول الصناعي ؟⁩

01/11/2026

⁨ عمرك حسيتي فجأة بحزن أو خنقة أو إحساس غريب أول ما الحليب يبدأ ينزل أثناء الرضاعة؟

والأغرب إن الإحساس ده بيختفي بعد ثواني أو دقايق وترجعي طبيعية كأن مفيش حاجة حصلت!

الحالة دي اسمها D-MER، وكتير من الأمهات ممكن يمروا بيها من غير ما يعرفوا إن ليها اسم أو تفسير بيولوجي محتمل.

الأهم إنك تعرفي إن المشاعر دي مش ذنبك، ومش دليل على إنك مش بتحبي الرضاعة أو البيبي 🫂♥️

⁨ لو البوست فادك أو تعرفي أم بتمر بالموضوع ده متنسيش تشاركيه معاها 🥰

28/10/2026

26/10/2026

الالتقام الصحيح من اهم عوامل نجاح الرضاعة الطبيعية عشان كده ضروري كل أم تكون عارفة ازاي توصله وايه علاماته👌🏻
ابعتي الفيديو لكل حامل وأم جديدة تعرفيها ♥️

24/10/2026

ولسه بحبها عادي 😂♥️

الحقيقة إني عمري ما كنت بحب اللمة ولا التجمعات، ولا حتى فكرة إني أتعرف على ناس جديدة..
ولما كانت بتجيلي فرصة أحضر تجمع، كنت بفكر إزاي أهرب منه 🤦🏻‍♀️

كنت بحكي للأمهات في التجمع التاني لينا وبقولهم:
تخيلوا إني أنا شخصيًا كنت بهرب من القعدات دي! 😂

والجميل ان كلهم ردوا نفس الرد: وإحنا كمان وعمرنا ما فكرنا ننزل تجمع زي ده غير لما إنتي قولتي 😍

وهنا اتأكدت ان إحنا مش بنكره اللمة نفسها،
قد ما بنحتاج نكون في لمة شبهنا..
لمة مفيهاش ضغط إنك تبقي اجتماعية أو مثالية، لكن تقدري تكوني فيها على طبيعتك، تتكلمي عن نفسك ومشاعرك، وتلاقي اللي يفهمك لأنه مرّ بتجارب شبهك.

وده بالظبط اللي كنت بتمنى أعمله🥺

تجمع يكون ليكي إنتي، لمشاعرك وتجاربك، وللأم اللي جواكي بعيدًا عن كل الأدوار والمسؤوليات اللي بتعيشيها كل يوم ..

ويمكن أكتر حاجة أنا ممتنة ليها هي إني اتعرفت على مجموعة من الأمهات المثقفة الواعية اللي موجودة معانا، واللي كل مرة بتأكدلي إننا فعلًا محتاجين المساحة دي أكتر ما كنا متخيلين🥰

الفيديو من تجمعنا التالت، ولسه اللي جاي أكتر وأحلى بإذن الله ♥️✨

22/10/2026

ازاي اختار الببرونة او اي نوع كويس سؤال بيتكرر كتير :

اختاري الببرونة تدفقها بطيء ..

اختاري ح**ة الببرونة على شكل مثلث وابعدي عن الح**ة اللي قاعدتها عريضة عشان بتعلم البيبي انه يمسك طرف الح**ة فقط ..

اختاري التوقيت اسمحي للبيبي انه يتقن الرضاعة الطبيعية تماماً قبل دخول الببرونة لتجنب ارتباك الح**ة ..

اختاري الوضعية استخدمي طريقة paced bottle feeding الرضاعة البطيئة اللي بتسمح للبيبي انه ياخد وقت اطول في الرضعة ويكون هو المتحكم في المص بعكس الطريقة المعتادة اللي بتسهل على البيبي نزول الحليب بدون اي مجهود وبالتالي نتعرض لرفض الرضاعة .

بعد ما شوفتي الفيديو عرفتي ان اختيارك للببرونة كان صح ولا غلط ؟

20/10/2026

⁨ ⁨ ⁨ ⁨ من اكتر من ٦ سنين كنت راكبة مع زين في كرسي العربية الخلفي
لسه فاكرة المشهد بالظبط
كان اخر يوم ليا في الشغل
عشان ظروف مادية في المكان اللي كنت فيه وقرروا هيقفلوا المكتب
كنت في قمة الاحباط واليأس طبعاً ..
وانا بقلب في الموبايل
قولت لجوزي: بقولك ايه في كورس انا حابة اخده بس مش عارفة هستفاد بيه ولا لا !
قالي هيديكي شهادة ايه؟
مرشدة رضاعة
سألني يعني ايه؟
قولتله فاكر لما زين كان عنده مشاكل في الرضاعة وكنت بدور على اي حد يساعدني واسأل في المستشفيات اهو هي دي ..
قالي ماشي

قولتله بس الكورس غالي اوي (وقتها مكنش في غير اماكن بسيطة اوي اللي بتوفر الكورسات وطبعاً مع فرق العملة كان فعلاً المبلغ رهيب)

انا بتكلم وانا في دماغي افكار كتير
هتعملي ايه بالكورس؟
هيفيدك فعلاً؟
ولا هتاخديه على الفاضي؟

قطع افكاري بجملة عمري ما هنساها
اي فلوس مقابل العلم مش خسارة ..

دخلت بسرعة احجز الكورس
ايوه ايوه
عارفين النحس 😂
تم اكتمال العدد استني السنة الجاية
انهرت وقعدت اعيط وكأن حياتي كانت متوقفة على الكورس اللي انا اصلاً كنت لسه من دقيقتين بفكر اخده ولا لا 😂

بس قولت الحمدلله لعله خير وسلمت ..

بعد يومين كلموني قالولي في حد مكملش اجراءات الدفع لو تحبي تدخلي
قولتلهم احب طبعاً 😍😍

وبدأنا ومع كل يوم وكل كلمة كانت تتقال في الكورس كنت اقول سبحان الله واغرق في حب الرضاعة اكتر واكتر
واحس فعلاً اني لقيت شغفي (الكلمة اللي لما كنت بسمعها عمري ما كنت بحس يعني ايه)
وحمدت ربنا ألف مرة على الخطوة دي ♥️

ومن مرشدة رضاعة لأخصائية رضاعة لحد ما ربنا كرمني وحصلت على البورد الدولي لاستشاري الرضاعة وبقيت استشاري دولي رضاعة طبيعية شهر ٩/٢٠٢١
بعد رحلة طويلة من التعب والمذاكرة والمجهود والمعافرة مع طفل عنده سنة ونص والسهر اللي عمري ما سهرت زيه في حياتي .

انا برغي الرغي ده ليه؟
عشان اقول اني الحمدلله انهاردة
استلمت تجديد شهادتي كاستشاري رضاعة
ومعاكم ٥ سنين كمان لمساعدتكم ومساعدة ولادكم بكل الحب والطاقة والشغف لأهم و احلى شهادة اخدتها في حياتي ♥️

الطريق اللي شدني ليه
مش انا اللي روحتله
واللي ربنا هيألي كل الأسباب اني اكمل فيه مهما كنت بييأس وبتعب
ورغم اني درست تغذية اطفال وتثقيف ولادة بعده الا انه سيظل شغفي وحبي الأكبر 😍

انا فاكرة انا بدأت ليه
وان هدفي طول السنين دي متغيرش
(ان كل أم تستاهل تلاقي حد يساعدها ويدعمها)
وانهاردة بقول الحمد والشكر لله على كل حاجة وصلتلها
الحمدلله ان ربنا بيقفلنا ابواب عشان يفتحلنا ابواب تانية 🤩

(اللهم انفعني بما علمتني وعلمني ما ينفعني وزدني علما)⁩⁩⁩⁩

19/10/2026

رحلة الأمومة محتاجة معرفة ووعي عشان نكون أهدى وعارفين ايه طبيعي وايه لا 🤱🏻

شاركي الفيديو مع كل حامل وأم جديدة تعرفيها ♥️

وقوليلي ايه المعلومة اللي مكنتيش عارفاها قبل الولادة ؟

17/10/2026

⁨ ⁨ ⁨ رحلة الأمومة بتبقى اسهل لما نلاقي اللي يشاركنا فيها ♥️
يشاركنا مشاعرنا
مشاكلنا
احلامنا
اخطائنا
الحاجات اللي بتحسسنا بالذنب
فتحس في الاخر انك قادر تتقبل كووووول ده وقلبك مرتاح وهادي وعندك طاقة تحاول تبدأ من جديد ..

وده اللي الأمهات قالوه عن قعدتنا
انها مش مجرد قعدة أمهات ده group therapy 🫂🥰

فخورة جداً بكل الأمهات الجميلة اللي كانوا معايا وفخورة بطاقتهم و عطائهم وحبهم
واد ايه القعدة معاهم كانت كلها مشاعر واحاسيس حلوة 🥹

ومتحمسة جداً للقائنا التالت ولو عايزة تبقي معانا اكتبيلي في التعليقات وهبعتلك لينك الجروب 😍⁩⁩⁩

12/10/2026

اد ايه اليوم العادي والروتين اليومي المتكرر والتفاصيل المملة اللي بنزهق منها وبتبقى تقيلة علينا طلعت نعمة كبيرة اوي ..

الحمدلله على جميع النعم ما ظهر منها وما بطن 🤲🏻
اللهم لك الحمد كما ينبغي لجلال وجهك وعظيم سلطانك، ولك الشكر على نعمك التي لا تعد ولا تحصى ♥️