Dr Mead Ramadani - Gastroenterolog

13/11/2026

Ferritina e ulët? Ndoshta problemi nuk është vetëm mungesa e hekurit, por edhe përthithja e tij!

Hekuri është një mineral esencial për organizmin, ndërsa ferritina është proteina që pasqyron rezervat e hekurit në trup.

Por, ka disa gjëra që duhet t’i dimë:

1. Hekuri dhe ferritina nuk janë e njëjta gjë!
👉 Mund të kemi hemoglobinë normale, por rezerva të ulëta të hekurit (ferritinë të ulët).

2. A duhet të merret hekuri çdo ditë?
👉 Jo domosdoshmërisht! Marrja çdo ditë ose një ditë po, një ditë jo (ditë alternative), mund të jenë të dyja mënyra efektive. Marrja në ditë alternative mund të ndihmojë në përmirësimin e përthithjes dhe tolerancës gastrointestinale te disa persona.

3. Po nëse e marrim hekurin, por ferritina nuk rritet?
👉 Atëherë duhet të mendojmë edhe për problemet e përthithjes së tij në zorrë. Disa sëmundje dhe gjendje që mund të pengojnë përthithjen e hekurit janë:

● Sëmundja e celiakisë (intoleranca ndaj glutenit).
● Gastriti kronik atrofik.
● Infeksioni me Helicobacter pylori.
● Sëmundjet inflamatore të zorrëve (Crohn dhe koliti ulceroz).
● Gjendjet pas disa ndërhyrjeve kirurgjikale në stomak ose zorrë.

Mos harroni: Mungesa e hekurit nuk trajtohet vetëm duke zëvendësuar hekurin që mungon. Është po aq e rëndësishme të zbulohet PSE ka ndodhur kjo mungesë!

Në shumë raste, çelësi i trajtimit të suksesshëm është identifikimi dhe trajtimi i shkakut.

07/11/2026

Pas shumë vitesh përvojë si gastroenterolog, ja 3 gjëra që çdo grua duhet t’i dijë për shëndetin e zorrëve, para se të jetë tepër vonë. 👇

3. Mungesa e hekurit pa një shkak të qartë kërkon hetim të traktit gastrointestinal

👉 Niveli i ulët i pashpjeguar i hekurit te gratë (pa menstruacione të shumta) mund të jetë shenja e parë e një inflamacioni të heshtur të zorrëve, celiakisë (intolerancës në gluten) ose kancerit kolorektal (të zorrës së trashë) në fazat e hershme.

2. Stresi kronik ndikon në zorrët e grave më shumë sesa mendohet

👉 Gratë kanë një bosht zorrë–tru më të ndjeshëm. Ankthi, traumat dhe stresi i vazhdueshëm mund të ndryshojnë fizikisht përbërjen e baktereve të zorrëve dhe lëvizshmërinë e tyre, në mënyra që janë të matshme dhe reale.

1. Simptomat e kancerit të zorrës së trashë te gratë shpesh neglizhohen më gjatë sesa te burrat

👉 Lodhja, ngërçet e barkut dhe ndryshimet në jashtëqitje te gratë e reja shpesh i atribuohen menstruacioneve, stresit ose sindromës së zorrës së irrituar (IBS) – ndërkohë që sëmundja mund të përparojë pa u vënë re.

Ndajeni këtë postim me çdo grua që i ka këto ankesa!

06/11/2026

5 shenja të fshehta që tregojnë se trupit tuaj mund t’i mungojnë disa lëndë ushqyese!

Shenja e parë e mungesës së fibrave nuk është kapsllëku.
Është ndjenja e urisë që rikthehet shpejt pas ngrënies.

Shenja e parë e mungesës së proteinave nuk është humbja e masës muskulore.
Është lodhja e vazhdueshme dhe mjegullimi i mendjes (vështirësia në përqendrim).

Shenja e parë e mungesës së kalciumit nuk janë kockat e dobëta.
Janë ndjesitë e shpimit ose mpirjes në gishtat e duarve.

Shenja e parë e mungesës së zinkut nuk është ulja e oreksit.
Është humbja e shqisës së shijes dhe nuhatjes, si dhe shërimi i ngadalshëm i plagëve.

Shenja e parë e mungesës së hekurit nuk është rënia e flokëve apo rrathët e errët nën sy.
Është ndjenja e lodhjes edhe pas një gjumi të mirë gjatë natës.

Ndiheni të lodhur, me vështirësi në përqendrim apo sikur diçka nuk është në rregull kohët e fundit?

Zorra juaj mund të jetë hallka që mungon!

05/11/2026

🌿 Trupi juaj meriton vëmendje. Jo vetëm kur ju detyron të ndaloni.

Lodhje e vazhdueshme? Vështirësi në përqendrim? Ndryshime që shpesh i kaloni me mendimin: “Do të më kalojë”?

Në këtë postim flasim për ushqyerjen dhe sinjalet që ia vlen t’i diskutoni me mjekun.

👉 Shfletoni të 7 faqet.
📌 Ruajeni postimin për ta rilexuar.

Mos harroni: një simptomë nuk është diagnozë. Mos nisni suplemente vetëm mbi bazën e një postimi—kërkoni vlerësim mjekësor.

03/11/2026

7 zakone të mëngjesit që do të doja t’i ndalonin të gjithë ❌👇

7. Pirja e kafesë para mëngjesit, pas një nate me gjumë të dobët.

Një studim me 29 të rritur të shëndetshëm zbuloi se pirja e kafesë së zezë dhe të fortë pas një nate me gjumë të ndërprerë rriti reagimin e sheqerit në gjak ndaj një pijeje me glukozë me rreth 50%.

👉 Pas një nate me gjumë të dobët, konsideroni të hani mëngjes para se të pini kafe, veçanërisht nëse keni probleme me kontrollin e sheqerit në gjak.

6. Marrja e vitaminës D në stomak bosh.

Një studim me 17 pacientë tregoi se marrja e vitaminës D, e cila tretet në yndyrë, së bashku me vaktin më të madh të ditës, rriti nivelet e saj në gjak me rreth 57% pas 2–3 muajsh.

👉 Merreni vitaminën D gjatë një vakti që përmban edhe pak yndyrë të shëndetshme.

5. Marrja e ilaçit kundër refluksit pas mëngjesit.

Kolegji Amerikan i Gastroenterologjisë rekomandon që shumica e frenuesve të pompës protonike (PPI) të merren 30–60 minuta para ushqimit, për të arritur një kontroll më të mirë të aciditetit gastrik.

👉 Nëse merrni një PPI konvencional një herë në ditë, atëherë merreni 30–60 minuta para mëngjesit, përveç rasteve kur mjeku ju ka udhëzuar ndryshe.

4. Ngrënia e bukës para vezëve te pavientët me Diabet të tipit 2.

Një studim me 11 të rritur me diabet të tipit 2 tregoi se konsumimi i proteinave dhe perimeve para karbohidrateve uli nivelin e sheqerit në gjak me 29% pas 30 minutash dhe 37% pas 60 minutash.

👉 Fillojeni mëngjesin me vezë ose ushqime të tjera të pasura me proteina dhe bukën konsumojeni në fund.

3. Marrja e ilaçit për tiroiden së bashku me kafenë.

Kafeja mund të zvogëlojë ndjeshëm përthithjen e levotiroksinës në formë tabletash, duke ulur efektivitetin e saj.

👉 Levotiroksinën merreni me ujë të thjeshtë, në stomak bosh. Prisni 30–60 minuta para mëngjesit dhe idealisht 60 minuta para konsumimit të kafesë.

2. Nxitimi për të dalë nga shtëpia kur zorrët japin sinjalin për jashtëqitje.

Aktiviteti i zorrës së trashë rritet pas zgjimit dhe pas mëngjesit, pjesërisht për shkak të ritmit cirkadian dhe refleksit gastro-kolik.

👉 Pas mëngjesit, ndani 5–10 minuta kohë të qetë për të shkuar në tualet. Mos u sforconi dhe t’a ndaloni jashtëqitjen.

1. Pirja e çajit ose kafesë menjëherë pasi të vlojë uji.

Një studim me rreth 50,000 të rritur lidhi konsumimin e të paktën 700 ml çaj në ditë, në temperaturë 60°C ose më të lartë, me një rritje prej rreth 90% të rrezikut për kancer të ezofagut.

👉 Lërini pijet të ftohen derisa të arrijnë një temperaturë të përshtatshme dhe të këndshme për t’u pirë.

Ndajeni këtë postim me njerëzit tuaj të dashur për të përhapur vetëdijen shëndetësore.

☀️

31/10/2026

7. Të qëndroni ulur pa lëvizur për orë të tëra.
Ecjet e shkurtra pas ushqimit mund të ndihmojnë në uljen e rritjes së nivelit të sheqerit në gjak.
👉 Ecni për 10–15 minuta pas ngrënies.

6. T’i lani dhëmbët menjëherë pas konsumimit të ushqimeve acidike.
Acidet mund ta zbusin përkohësisht smaltin e dhëmbëve.
👉 Prisni rreth 60 minuta para se t’i lani dhëmbët.

5. Të pini çaj të zi ose të gjelbër gjatë vakteve të pasura me hekur.
Çaji mund të pengojë përthithjen e hekurit me origjinë bimore.
👉 Prisni 1–2 orë pas ushqimit, veçanërisht nëse keni nivel të ulët të hekurit.

4. Të bëni ushtrime fizike intensive me stomak të mbushur.
Aktiviteti fizik intensiv pas një vakti të bollshëm mund të shkaktojë të përziera, ngërçe abdominale dhe refluks.
👉 Prisni 3–4 orë pas një vakti të bollshëm para se të bëni ushtrime intensive.

3. Të përdorni mentën për të qetësuar refluksin acid.
Menta mund ta përkeqësojë urthin dhe refluksin te disa persona.
👉 Shmangni çajin e mentës nëse vëreni se ju përkeqëson refluksin.

2. Të shtriheni menjëherë pas darkës.
Shtrirja shumë shpejt pas ushqimit mund ta përkeqësojë refluksin acid, veçanërisht gjatë natës.
👉 Përfundoni darkën të paktën 3 orë para gjumit, sidomos nëse vuani nga refluksi.

1. Të neglizhoni presionin ose shtrëngimin në gjoks duke e konsideruar si çrregullim të tretjes.
Simptomat e infarktit të zemrës ndonjëherë mund të ngatërrohen me urthin ose djegien në stomak.
👉 Kërkoni menjëherë ndihmë mjekësore në rast të shtrëngimit të ri dhe të pashpjegueshëm në gjoks, veçanërisht nëse shoqërohet me djersitje, vështirësi në frymëmarrje ose dhimbje që përhapet drejt krahut apo nofullës.

28/10/2026

Pas vitesh të tëra në gastroenterologji, ja 5 rreziqe të fshehta për zorrët që shumica e njerëzve i anashkalojnë plotësisht. ❌👇
5. Proteina juaj “e shëndetshme” mund të përmbajë shumë prebiotikë.
Rrënja e çikores, inulina dhe oligofruktoza mund të shkaktojnë gazra dhe fryrje të konsiderueshme të barkut, veçanërisht te personat me zorrë të ndjeshme.
👉 Kontrolloni etiketën përpara se të fajësoni glutenin ose produktet e qumështit. Filloni me një porcion më të vogël dhe vëzhgoni reagimin e zorrëve tuaja.
4. Menta mund t’i qetësojë zorrët, por ta përkeqësojë refluksin.
Menta relakson muskujt e zorrëve, por mund të relaksojë edhe sfinkterin që ndihmon në parandalimin e kthimit të acidit të stomakut drejt ezofagut.
👉 Menta mund të ndihmojë disa persona me sindromën e zorrës së irrituar (IBS), por shmangeni nëse vëreni se ju përkeqëson vazhdimisht urthin.
3. Suplementi juaj për gjumë mund të jetë shkaku i diarresë.
Magnezi që nuk përthithet nga organizmi tërheq ujë në zorrë. Pikërisht për këtë arsye, disa forma të magnezit përdoren edhe si laksativë.
👉 Nëse jashtëqitjet e ujshme kanë filluar pas përdorimit të magnezit, kontrolloni dozën dhe formën e tij përpara se të mendoni se keni zhvilluar sindromën e zorrës së irrituar.
2. Orizi i mbetur nga vakti i mëparshëm mund t’ju shkaktojë helmim, edhe pas ringrohjes.
Orizi i gatuar dhe i lënë në temperaturë ambienti mund të krijojë kushte që bakteria Bacillus cereus të prodhojë një toksinë rezistente ndaj nxehtësisë, të cilën ringrohja mund të mos e shkatërrojë.
👉 Vendoseni orizin e gatuar në frigorifer brenda dy orëve dhe ringroheni vetëm pasi të jetë ruajtur në mënyrë të sigurt.
1. Pastrimi i zorrës së trashë nuk largon “toksina misterioze”.
Procedurat e pastrimit të zorrës së trashë mund të shkaktojnë dehidratim, çrregullime të elektroliteve, infeksione dhe, në raste të rralla, perforim të zorrës.
👉 Zorra e trashë e kryen vetë funksionin e eliminimit të mbetjeve. Mbështeteni shëndetin e saj me fibra, hidratim të mjaftueshëm dhe aktivitet fizik

21/10/2026

Kolonoskopia: zbulim, parandalim dhe trajtim

19/10/2026

Candida është njëra nga arsyet e probleme me fryerje e gazra ne bark

16/10/2026