13/10/2026
O pasado xoves foi o acto do Día Mundial da Saúde Mental no Concello de Vigo.
Comezamos pintando máscaras coa proposta «Desenmascárate». Porque ás veces por fóra parece que todo vai ben, pero por dentro sentimos outras cousas.
Despois chegaron os Furafollas, que nos fixeron rir e desfrutar coa súa función Os do Freixo. Quedou claro que de talento imos ben servidos/as!
Tamén houbo momentos para parar e escoitar: a presidenta de DOA compartiu unhas palabras e dúas persoas usuarias puxeron voz ao Manifesto do Día Mundial da Saúde Mental, lembrándonos que aínda queda moito por facer para deixar atrás os prexuízos e o estigma.
Para rematar, interviñeron as autoridades do Concello de Vigo, acompañándonos nesta xornada tan especial.
Grazas a todas as persoas que fixestes posible este día, ás que pintastes, actuastes, lestes, falastes e aplaudistes. E tamén ás que viñestes simplemente a acompañarnos, que estar aí xa é moito!
Porque a saúde mental é cousa seria, pero iso non significa que non poidamos abordala cun sorriso.
E lembrade: nunca sabemos o que hai detrás dunha máscara… pero sempre podemos facer o esforzo de mirar máis alá.
